تىلشىلەرىمىز حۋاڭ يان، يان جيە، ۋاڭ جىحۋا، ٴپاتيما حابارلايدى. 3 - ايدىڭ 14 - كۇنى ىلە وبلىستىق حالىق ۇكىمەتىنىڭ اقپارات كەڭسەسى ”15·3“ حالىقارالىق تۇتىنۋشىلاردىڭ ۇقىق - مۇددەسىن قورعاۋ كۇنى بايلانىسىمەن اقپار جاريالاۋ ٴماجىلىسىن اشىپ، بيىلعى جىلدىق تۇتىنۋ ۇقىعىن قورعاۋداعى ”ريزا بولارلىق تۇتىنۋدى بىرگە قالىپتاستىرۋ“ نەگىزگى تاقىرىبىن جاريالادى ٴارى 2024 - جىلعى ىلە وبلىسىنىڭ تۇتىنۋشىلاردىڭ ۇقىق - مۇددەسىن قورعاۋ جانە جالعان، جارامسىز ونىمدەردى جونگە سالۋ، سوققى بەرۋ قىزمەتىندەگى جەتىستىكتەردى حابارلاندىردى.

بيىل ”ريزا بولارلىق تۇتىنۋدى بىرگە قالىپتاستىرۋ“ سـىندى تۇتىنۋ ۇقىعىن قورعاۋ نەگىزگى تاقىرىبىن ارقاۋ ەتىپ، ىلە وبلىسى 2025 - جىلعى ”15·3“ حالىقارالىق تۇتىنۋشىلاردىڭ ۇقىق - مۇددەسىن قورعاۋ كۇنى جينالىسىن جانە ۇگىتتەۋ، كەڭەس بەرۋ قيمىلى، تۇتىنۋ ورتاسىن ساپالىلاندىرۋدىڭ 3 جىلدىق ارەكەتىن باستاۋ، تۇتىنۋ ۇقىعىن قورعاۋعا قاتىستى 10 ٴىرى اكىمشىلىك جازالاۋ دەلوسىن جاريالاۋ سياقتى 10 ٴتۇرلى قيمىلدى وتكىزەدى.

2025 - جىلى تۇتىنۋشىلاردىڭ ۇقىق - مۇددەسىن قورعاۋ قىزمەتىنىڭ ٴتۇيىندى قىزمەتتەرى: تۇتىنۋ ورتاسىن ساپالىلاندىرۋدىڭ 3 جىلدىق ارەكەتىن ۇزدىكسىز ورىستەتۋ؛ تۇتىنۋشىلاردىڭ ۇقىق ـ مۇددەسىن قورعاۋدى، سەلبەسىپ بىرگە باسقارۋدى ۇزدىكسىز ىلگەرىلەتۋ؛ ”شينجياڭدا الاڭسىز تۇتىنۋ“ قيمىلىن ىشكەرىلەي ورىستەتۋ؛ جەلىدەن تىس زات ساتىپ العاندا زاتتى سەبەپسىز قايتارۋ ۋادەسى قيمىلىن بارىنشا دارىپتەۋ؛ تۇتىنۋ ارىز - شاعىم ينفورماتسياسىن جاريا ۇستاۋدى جاپپاي ورىستەتۋ؛ ارىز - شاعىم، اشكەرەلەۋ ٴتۇزىمى جۇيەسىن ۇزدىكسىز كەمەلدەندىرۋ؛ تۇتىنۋعا تاربيەلەۋ، جەتەكشىلىك ەتۋدى كۇشەيتىپ، الەۋمەتتىڭ تۇتىنۋ ٴبىلىم دەڭگەيى مەن ۇقىق قورعاۋ قابىلەتىن جوعارىلاتۋ.

سول كۇنى اقپار جاريالاۋ ماجىلىسىندە تاعى 2024 - جىلعى تۇتىنۋشىلاردىڭ ۇقىق - مۇددەسىن قورعاۋ جاعىنداعى تيپتىك دەلولار حابارلاندىرىلدى.

2024 - جىلى ىلە وبلىستىق بازار باقىلاۋ - باسقارۋ جۇيەسى جۇرت تىلەگى ەڭ كۇشتى، حالىق تۇرمىسىنا بارىنشا زيان جەتكىزەتىن سالالارعا قاداعالاي نازار اۋدارىپ، بازار باقىلاۋ - باسقارۋ سالاسىنداعى ٴتۇرلى دەلودان 4 مىڭ 41 ىن تەكسەرىپ ٴبىر جاقتى ەتتى، دەلوعا ساياتىن زاتتىڭ قۇنى 18 ميلليون 233 مىڭ يۋان، ايىپ اقشا جانە تاركىلەنگەن زاتتاردىڭ جالپى سوماسى 11 ميلليون 336 مىڭ يۋان بولدى. 2024 ـ جىلى جالپى 10 مىڭ 760 ارىز قابىلداپ، تۇتىنۋشىلار ٴۇشىن 4 ميلليون 485 مىڭ 300 يۋان ەكونوميكالىق زيان قايتارىپ الىندى. تۇتىنۋشىلاردىڭ ارىز - شاعىم جاعىنداعى قولامتالى تۇيىندەرى ٴونىم ساپاسى، جالعان بەلگى سياقتى ماسەلەلەرگە شوعىرلاندى.

تۇتىنۋشىلار كوڭىل ٴبولىپ وتىرعان ارىز - شاعىم ارناسى ماسەلەسىنە قاراتا، اقپار جاريالاۋ ماجىلىسىندە بىلاي دەپ باسا دارىپتەلدى: 12315 ىستىق لەنياسىنان سىرت، 12315 توراپ بەكەتى، قول تەلەفون APP، ۋيشين شاعىن باعدارلاماسى سياقتى ارنالار ارقىلى ارىز - شاعىم بەرۋگە نەمەسە بازار باقىلاۋ - باسقارۋ تاراۋلارىنىڭ قىزمەت وتەۋ تەرەزەسىنە بارىپ ماسەلەنى اڭىس ەتۋگە بولادى.

اقپار جاريالاۋ ماجىلىسىندە مىنالار باسا دارىپتەلدى: ىلە وبلىستىق بازاردى باقىلاۋ ـ باسقارۋ تاراۋلارى جالعان، جارامسىز ونىمدەردى جونگە سالۋ، سوققى بەرۋدىڭ تەگەۋرىندى كۇيىن باستان ـ اياق ساقتاپ، زاڭ اتقارۋ تەبىنىن ۇزدىكسىز ارتتىرىپ، باقىلاۋ ـ باسقارۋ تاسىلىندە جاڭالىق اشىپ، زاڭ اتقارۋ ونىمدىلىگىن جوعارىلاتىپ، بازار ورتاسىن اناعۇرلىم كىرشىكسىزدەندىرەدى. اقپارات قۇرالدارى مەن قوعامداعى ٴار سالانى تۇتىنۋ ورتاسى قۇرىلىسىنا بىرگە ات سالىسۋعا ۇندەپ، تيجاراتشىلاردى سەنىمدى تيجارات جۇرگىزۋگە، تۇتىنۋشىلاردى ۇقىقتى اقىلمەن قورعاۋعا جەتەكتەپ، حاۋىپسىز، الاڭسىز تۇتىنۋ ورتاسىن قول ۇستاسا قالىپتاستىرىپ، ىلە وبلىسى ەكونوميكاسىنىڭ جوعارى ساپالى دامۋىن ىلگەرىلەتۋگە، كورىكتى ىلە قۇرۋعا تىڭ دا اناعۇرلىم زور ۇلەس قوسادى.