ىلەلىك بويجەتكەن دينا نۇرلان قىزى مەملەكەتتىك جابىق الاڭ جەڭىل اتلەتيكا جۇلدەلى جارىسىنىڭ تۇڭعىش التىن مەدالىن الدى

2025 - جىلعى دۇنيە جۇزىلىك جابىق الاڭ جەڭىل اتلەتيكا جۇلدەلى جارىسىنا قاتىناسادى

ٴتىلشىمىز ليۋ چۇنشيڭ حابارلايدى. 3 - ايدىڭ 7 - كۇنى تۇستەن بۇرىن 2025 - جىلى مەملەكەتتىك جابىق الاڭ جەڭىل اتلەتيكا جۇلدەلى جارىسى جيناندا وتكىزىلدى، شينجياڭ قۇراماسى اتىنان جارىسقا تۇسكەن ىلەلىك بويجەتكەن دينا نۇرلان قىزى 1.84 مەترلىك ناتيجەمەن ايەلدەردىڭ بيىككە سەكىرۋ جارىسىنىڭ اعا جۇلدەگەرى بولدى، بۇل وسى كەزەكتى جارىستىڭ تۇڭعىش التىن مەدالى ەدى.

بۇل دينا نۇرلان قىزىنىڭ 2 - ايدىڭ 15 - كۇنى 2025 - جىلى مەملەكەتتىك جابىق الاڭ جەڭىل اتلەتيكا سيلىقتى جارىسىنان (2 - بەكەت جارىسى)، 2 - ايدىڭ 22 - كۇنى 2025 - جىلى مەملەكەتتىك جابىق الاڭ جەڭىل اتلەتيكا سيلىقتى جارىسىنان (4 - بەكەت جارىسى) كەيىنگى 3 - رەت اعا جۇلدەگەر بولۋى ەدى. ٴبىر اي ىشىندە ارت - ارتىنان 3 رەت اعا جۇلدەگەر بولىپ، ىلەدەگى ەرەسەك سپورتشىلاردىڭ مەملەكەتتىك جەڭىل اتلەتيكا جارىسىنا قاتىناسۋىنىڭ ەڭ جاقسى ناتيجەسىن جاراتتى.

سول كۇنى تۇستەن بۇرىن ايەلدەردىڭ بيىككە سەكىرۋ شەشۋشى جارىسىندا دينا نۇرلان قىزى 1.84 مەترلىك ناتيجەسىمەن ەل ىشىندەگى ەگەي سپورتشىلاردان وزا شاۋىپ، ەڭ سوڭىندا اعا جۇلدەگەر بولدى. جارىستان كەيىن ول قوعامدىق قارىم - قاتىناس مەديالارىندا بەينە جازبا جاريالاپ: ”بۇل مەنىڭ ومىرىمدەگى تۇڭعىش رەتكى ٴۇرتىس 3 رەت اعا جۇلدەگەر بولۋىم، وتە قۋانىشتىمىن“ دەدى. شاندۇڭ اقپارات قۇرالدارىنىڭ تىلشىلىگىن قابىلداعاندا، دينا نۇرلان قىزى قۋانىشىن ٴبولىسىپ بىلاي دەدى: ”2022 - جىلى مەن وسى الاڭدا اعا جۇلدەگەر بولعانمىن. جينان − مەنىڭ ەكى رەت اعا جۇلدەگەرلىككە قول جەتكىزگەن ىرىستى مەكەنىم“.

1.88 مەترلىك ناتيجەگە سايىس جاريالاعان كەزدە دينا نۇرلان قىزىنىڭ كومبەدەن كورىنە الماۋى وكىنىشتى جاعداي بولدى. دينا تىلشىگە بىلاي دەدى: ”بۇگىنگى بابىمنىڭ كەلمەگەنىنە ونشا رازى ەمەسپىن. سەبەبى جۋىقتان بەرى تۇماۋ ٴتيىپ قالعاندىقتان رولىمدى ايتارلىقتاي ساۋلەلەندىرە الماي قالدىم. وكىنىشتىڭ ورنىن تولىقتاپ، نانجيڭ دۇنيە جۇزىلىك جۇلدەلى جارىسىندا كەزدەسەلىك“.

ۇعىسۋعا قاراعاندا، 3 - ايدىڭ 21 - كۇنىنەن 23 - كۇنىنە دەيىن دۇنيە جۇزىلىك جابىق الاڭ جەڭىل اتلەتيكا جۇلدەلى جارىسى نانجيڭدە وتكىزىلەدى ەكەن. تاياۋدان بەرگى تاماشا بەينەسىنىڭ ارقاسىندا دينا نۇرلان قىزى مەن ونىڭ ساپتاسى الشەر ٴومار 2025 - جىلى دۇنيە جۇزىلىك جابىق الاڭ جەڭىل اتلەتيكا جۇلدەلى جارىسىنا قاتىناسۋ تولىمدىلىعىنا يە بولدى. بۇل شينجياڭ جەڭىل اتلەتيكا سپورتشىلارىنىڭ جۇڭگو كومانداسى اتىنان تۇڭعىش رەت وسى جارىسقا قاتىناسۋى ەدى.

1998 - جىلى 6 - ايدىڭ 26 - كۇنى دينا نۇرلان قىزى قۇلجا اۋدانى قاراعاش اۋىلى ويمانبۇلاق قىستاعىندا دۇنيەگە كەلگەن، اكە - شەشەسى بويشاڭ بولعاندىقتان، ونىڭ بويى دا باسقا قىز بالالاردان بيىك ەدى. بالالىق شاعىنان بيىككە سەكىرۋ تالانتى بار دينا نۇرلان قىزى باستاۋىش مەكتەپ كەزىنەن باستاپ بيىككە سەكىرۋدى ۇناتىپ، ٴار جىلعى مەكتەپ دەنە تاربيە جارىسىندا اعا جۇلدەگەر بولاتىن - دى. 15 جاسىندا بويىنىڭ بيىكتىگى 1.75 مەترگە جەتىپ، ٴبىر جولى اۆتونوميالى رايوندىق دەنە تاربيە جارىسىنا قاتىناسقاندا ونىڭ بيىككە سەكىرۋ تۋما قابىلەتىن بايقاعان اۆتونوميالى رايوندىق دەنە تاربيە مەكەمەسىنىڭ دەنە تاربيە جاتتىعۋ 1 - ۇلكەن اترەتىندەگىلەر قۇلجا اۋداندىق 3 - ورتا مەكتەپتەن شينجياڭ كومانداسىنا تاڭداپ قابىلدايدى. ون التى، ون جەتى جاسىنان باستاپ ول شينجياڭ كومانداسى اتىنان مەملەكەتتىك جەڭىل اتلەتيكا جارىستارىنا قاتىناسادى. كاسىپتىك ومىرىندە ول تالاي رەت مەملەكەتتىك اعا جۇلدەگەر بولدى.