تىلشىلەرىمىز جاڭ جيايۋان، چىن يىڭ، ەرىكتى ٴتىلشى سۇن ۋجيان حابارلايدى. تۇتىنۋدى اناعۇرلىم سەرپىلتۋ ٴۇشىن ىلە وبلىسىنىڭ قاتىستى تاراۋلارى ٴتۇرلى ٴتيىمدى قوسىمشا قاراجات ساياساتتارىنىڭ تياناقتانۋىن ۇزدىكسىز ىلگەرىلەتىپ، دەڭگەيىن جوعارىلاتۋ، جاڭالاۋ، قيمىل وتكىزۋ سياقتى تاسىلدەر ارقىلى تۇتىنۋدىڭ تىڭ ومىرشەڭ كۇشىن تاسقىنداتىپ، تۇتىنۋدىڭ ساپاسىن جوعارىلاتىپ، دارەجەسىن جوعارىلاتۋدى جەبەدى.

تاياۋدا قۇلجا قالاسىنىڭ حوۋتان جولىنداعى ۇلكەن بازاردىڭ ٴدامدى تاعامدار بازارى شىت جاڭا بەينەمەن سىناق رەتىندە تيجارات جۇرگىزىپ، كوپتەگەن قالا تۇرعىندارى مەن ساياحاتشىلاردى باۋرادى. ۇلكەن بازاردىڭ دەڭگەيىن جوعارىلاتۋ، جاڭالاۋ نىسانىنىڭ ماڭىزدى قۇرامداس بولەگى رەتىندە، وسى ٴدامدى تاعامدار بازارى جەرگىلىكتى تۇرعىنداردى ٴتىپتى دە كوپ تالعاممەن قامداپ قانا قويماي، قۇلجا قالاسىنىڭ ساياحات كاسىبىنە دە جاڭا جارقىن تۇيىندەر قوستى.

وسىندا تاماقتانۋعا كەلگەن قۇلجا قالاسىنىڭ تۇرعىنى ۋاڭ چىڭلياڭ: ”ۇلكەن بازاردىڭ ٴدامدى تاعامدار بازارى جاڭالانعاننان كەيىن ورتاسى جاقساردى، ازىق ـ تۇلىكتەردىڭ ٴتۇرى دە وتە مول ەكەن، ٴبىز ٴدان ريزا بولدىق“، - دەدى.

ۇلكەن بازاردىڭ دارەجەسىن جوعارىلاتۋ، جاڭالاۋ ــ قۇلجا قالالىق اۋىل شارۋاشىلىق ساۋدا توبىنىڭ ساياحات اسەرىن مولايتىپ، كاسىپ كۇيىنىڭ فۋنكتسياسىن بايىتۋداعى ماڭىزدى شاراسى. 2024 ـ جىلى 10 ـ ايدان باستاپ قۇلجا قالالىق اۋىل شارۋاشىلىق ـ ساۋدا توبى ۇلكەن بازاردىڭ دارەجەسىن جاپپاي جوعارىلاتتى، بۇل 1 ـ قاباتتاعى ٴدامدى تاعامدار بازارىن، 2 ـ قاباتتاعى ساياحات تاۋارلارىن ساتىپ الۋ كوشەسىن جانە سىرتتاعى ”ينتەرنەتتە تانىمال“ جاياۋلار كوشەسىن قامتيدى.

ۇعىسۋعا قاراعاندا، قازىر 1 - قاباتتاعى ٴدامدى تاعامدار بازارىن جاڭالاۋ نىسانى اياقتالىپ، سىناق رەتىندە تيجارات جۇرگىزۋ كەزەڭىنە وتكەن؛ 2 - قاباتتاعى ساياحات تاۋارلارىن ساتۋ كوشەسى دە اياقتاۋ ساتىسىندا تۇر ەكەن؛ سىرتتاعى ”ينتەرنەتتە تانىمال“ جاياۋلار كوشەسىن سالۋ جوسپارى وسى ايدىڭ سوڭىندا باستالىپ، سالىنىپ بولعاننان كەيىن وسى اۋماقتاعى ”ينتەرنەتتە تانىمالدىعى“ جوعارى، ٴسوزسىز، باراتىن جاڭا تۇيىنگە اينالادى ەكەن. تۇتاس نىسان ىسكە قوسىلعاننان كەيىن شينجياڭنىڭ ٴىشى ـ سىرتىنداعى ساياحاتشىلارعا جانە جەرگىلىكتى قالا تۇرعىندارىنا شىت جاڭا تۇتىنۋ كەشىرمەسىن ازىرلەيدى ەكەن.

جاڭا كەزەكتى مەملەكەتتىڭ قوسىمشا قاراجات بەرۋ ساياساتى باستالعاننان بەرى ٴۇي ەلەكتر جابدىقتارىن ساتۋ سالاسى دا قىزا تۇسكەن. 3 - ايدىڭ 26 - كۇنى ٴتىلشى قۇلجا قالاسىنداعى ٴبىر ٴۇي ەلەكتر جابدىقتارىن ساتۋ ورنىنا بارعاندا، ”2025 - جىلعى مەملەكەتتىڭ جاڭا قوسىمشا قاراجات بەرۋدە ۇكىمەت جاعىنان بەلگىلەنگەن قوسىمشا قاراجات بەرەتىن كاسىپورىن“ دەگەن قابىرعاعا ىلىنگەن كەرمە تۋ ەرەكشە كوز تارتادى، ٴارقايسى ايگىلى ماركاداعى ونىمدەردى ساتۋ ورنىندا تۇتىنۋشىلار وسى تيىمدىلىكتىڭ جاعدايىن سۇراپ ۇعىسۋدا. قۇلجا قالاسىنىڭ تۇرعىنى ما جۋان كوڭىلدى تۇردە تىلشىگە بىلاي دەدى: ”بۇگىن گاز وشاق ساتىپ الدىم، اۋەلگى باعاسى 1980 يۋان ەكەن، مەملەكەتتىڭ قوسىمشا قاراجاتىن قوسىپ ەسەپتەگەندە 400 يۋانعا جۋىق اقشا ۇنەمدەدىم، بۇل شىنىندا ەرەكشە ٴتيىمدى بولدى، تۇتىنۋشىلار يگىلىككە كەنەلۋمەن بىرگە، ساۋداگەرلەر دە مول پايداعا كەنەلۋدە“.

ىلە ليفىڭ وتباسى ەلەكتر جابدىقتارى شەكتى سەرىكتەستىگىنىڭ دۇكەن جاۋاپتىسى شى تيانيىڭنىڭ تانىستىرۋىنا قاراعاندا، تۇتىنۋشىلار 1 ـ دارەجەلى ەنەرگيا ونىمدىلىگى نەمەسە سۋ ۇنەمدەۋ ونىمدىلىگى ولشەمى بار ونىمدەردى ساتىپ العاندا ەڭ جوعارى بولعاندا %20 قوسىمشا قاراجات بەرىلىپ، ٴار داناسىنا ەڭ جوعارى بولعاندا 2000 يۋان قوسىمشا قاراجاتتان يگىلىكتەنەدى ەكەن. بۇدان سىرت، كاسىپورىندار مەن ايگىلى ماركالى ونىمدەردى ساتاتىن جاقتار دا قوسىمشا قاراجات بەرىپ، جەڭىلدىك بەرۋ تەبىنىن ونان ارى ارتتىرعان. مەملەكەتتىڭ قوسىمشا قاراجات بەرۋ ساياساتى اتقارىلعاننان كەيىن دۇكەندەردىڭ الارماندار مولشەرى كورنەكتى ارتىپ، 2025 - جىلى 1 - توقسانداعى دۇكەندەردىڭ ساتىلىم مولشەرى وتكەن جىلدىڭ سايكەس مەزگىلىندەگىدەن %28 ارتىپ، قالا تۇرعىندارىنىڭ تۇتىنۋ ىنتاسىن بارىنشا  ارتتىرعان.