شاڭحاي شينجياڭعا كومەكتەسۋدە:

　　شاڭحايدىڭ باسىمدىعىن كورنەكتىلەندىرىپ، قاشقاردىڭ دامۋىنا كۇش ۇستەدى

　　□ انار بۇلت \ شينجياڭ گازەتىنىڭ ءتىلشىسى سۇڭ ۋيگو

شاڭحاي − جۇڭگوداعى ەكونوميكالىق دامۋى ەڭ تەبىندى، ەسىك اشۋ دەڭگەيى ەڭ جوعارى، جاڭالىق اشۋ قۋاتى ەڭ كۇشتى وڭىرلەردىڭ ءبىرى. 2020 - جىلدان بەرى شاڭحايدان 10 - توپتا شينجياڭعا كومەككە كەلگەن كادر - دارىندىلار تەز قارقىنمەن دامۋ تاجىريبەلەرىن جانە سىرتقا ەسىك اشۋداعى تەتىك تۇيىندەردى قاشقارعا الا كەلىپ، 3 جىلدىق شينجياڭعا كومەك كورسەتۋ جولىن باستادى.

شاڭحاي 10 - توپتا شينجياڭعا كومەكتەسۋ قىزمەتىن ورىستەتكەننەن بەرى شاڭحاي قالاسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابى(تومەندە قىسقاشا ”شاڭحايدىڭ شينجياڭعا كومەك كورسەتۋ قولباسشىلىق شتابى“ دەلىنەدى) ادام سىندى ماڭداي الدى فاكتوردى باستان - اياق كورنەكتىلەندىرىپ، شاڭحاي تاجىريبەسىنەن پايدالانىپ قاشقار ايماعىنىڭ دامۋىنا كۇش ۇستەدى، شينجياڭعا كومەك كورسەتۋشى كادر - دارىندىلار اسقاق رۋحاني بەينەمەن جانە تاسقىنداعان قىزمەت ىنتاسىمەن ناقتى قىزمەت مىندەتىن اتقارىپ، ناقتى جاۋاپكەرشىلىك ارقالاپ، شينجياڭعا كومەك كورسەتۋ نىساندارىنىڭ جالپىلىق ونىمدىلىگىن ۇزدىكسىز جوعارىلاتىپ، باس الماي بەرىلە ىستەپ، قىزمەتتە ناقتى ونىمدىلىككە تالپىنىپ، شاڭحايدىڭ شينجياڭعا كومەك كورسەتۋىندەگى تارتىمدى جاۋاپناماسىن جازدى.

　　ونەگە كورسەتىپ، رۋحتى سومداپ، بايلىقتان بىرگە يگىلىكتەندى

قاشقار ايماعىنا جوعارى ساپالى، قابىلەتى مىعىم دارىندىلار قوسىنىن باۋلىپ بەرۋ − شاڭحايدىڭ شينجياڭعا كومەكتەسۋ قولباسشىلىق شتابى ۇمتىلىس جاساعان نىسانالارىنىڭ ءبىرى.

دارىندىلاردى باۋلۋدا ونەگە كورسەتىپ، رۋحتى سومداۋ كەرەك، بارىنەن دە ماڭىزدىسى، وقۋ - اعارتۋ ساپاسىن جوعارىلاتۋدان باستاپ ىسكە كىرىسۋ كەرەك. 3 جىلدان بەرى شاڭحايدىڭ شينجياڭعا كومەك كورسەتۋشى كادر - دارىندىلارى قاشقار ايماقتىق 6 - ورتا مەكتەپ قۇرىلىسىن ارقاۋ ەتە وتىرىپ ىلگەرىلەتۋدى يگەردى، تەرەڭدەتۋدى يگەردى، قارىشتاۋدى يگەردى. شاڭحايدىڭ شينجياڭعا كومەكتەسۋشى كادر - دارىندىلارىنىڭ ءۇرتىس باعىتتامالى كومەك كورسەتۋى نەگىزىندە، شاڭحايدىڭ شينجياڭعا كومەك كورسەتۋ قولباسشىلىق شتابى تاعى شاڭحايداعى ايگىلى وقىتۋشىلار وقۋ - اعارتۋعا دەم بەرۋ − ”يۇيلان ينجەنەرياسىن“ اتقاردى، شاڭحاي شىفان داشۋەسى قاشقار ايماقتىق 6 - ورتا مەكتەپتى قاراستى ورتا مەكتەبى ەتىپ، ءار جىلى ينتەرنەت جەلىسىندە، ينتەرنەت جەلىسىنەن تىس ۇشتاستىرۋ ءتاسىلى ارقىلى قاشقار ايماقتىق 6 - ورتا مەكتەپپەن جانە شاڭحايدىڭ قاشقار ايماعىنداعى كومەكتەسكەن 4 اۋدانىمەن 2 رەت اۋىس - كۇيىس جاساپ، كومەك قابىلداعان جەرلەردىڭ وقۋ - اعارتۋ ساپاسىن جوعارىلاتۋدى ءۇرتىس ىلگەرىلەتتى.

2020 - جىلى قاشقار ايماقتىق 6 - ورتا مەكتەپ وقىتۋ زەرتتەۋ كەڭسەسىنىڭ ورىنباسار مەڭگەرۋشىسى يۇي لانلان تۇڭعىش توپتا يگىلىككە كەنەلگەندەردىڭ ءبىرى رەتىندە ”يۇيلان ينجەنەرياسىنا“ قاتىناستى. ارادا 3 جىل وتكەنىمەن شاڭحايداعى شينجياڭعا كومەك كورسەتكەن وقىتۋشىلاردىڭ وزگەشە ساباق ءوتۋ ءادىسى، ايقىن وي جەلىسى، ادامدى قىزىقتىراتىن سۇراۋ قويۋلارى يۇي لانلاننىڭ كوكەيىندە كۇنى كەشەگىدەي سايراپ تۇر، مىنە وسىلاردىڭ بارلىعى ونىڭ وقۋ - وقىتۋ جۇرگىزۋىنە سونى ءورىس اشتى.

2022 - جىلى قاشقار ايماقتىق 6 - ورتا مەكتەپ جوعارى مەكتەپكە وقۋشى قابىلدانۋ مولشەرىن 5 جىلدا 5 رەت ءۇرتىس جوعارىلاتۋدى جۇزەگە اسىرىپ، ءۇرتىس 3 جىل بويى تولىق كۋرس شەگىنەن ％80 اسىرىپ، قاشقار ايماعىندا اعالاپ العا شىقتى.

2020 - جىلى 6 - ايدان باستاپ شاڭحايدىڭ شينجياڭعا كومەك كورسەتۋشى كادر - دارىندىلارى ياركەن اۋدانىندا دەن قويا جوسپارلاپ قۇرعان قاشقار جاراتىلىستىق عىلىمدار كاسىپتىك تەحنيكالىق شۋەيۋانى سالىنىپ ءبىتتى، بيىل 9 - ايدا تۇڭعىش رەت وقۋشى قابىلداۋدى باستايدى، مەجەمەن 1 - توپتا قابىلدايتىن وقۋشى سانى 600 ادامعا جەتىپ، الداعى جەردە مەكتەپتەگى وقۋشىلار 16 مىڭ ادام بولعان كولەم قالىپتاستىرادى. جوقتان بار بولعان جاراتىلىستىق عىلىم تۇرىندەگى وسى مەكتەپكە شاڭحايدىڭ 10 - توپتا شينجياڭعا كومەك كورسەتكەن كادر - دارىندىلارىنىڭ قاجىرلى ەڭبەگى مەن ماڭداي تەرى سىڭگەن.

اجالعا اراشاشى، جارالىعا مەدەت بولعان اق حالاتتى پەرىشتەلەردەن تارتىپ ونەگە كورسەتىپ، رۋحتى سومدايتىن وقۋ - اعارتۋ قىزمەتكەرلەرىنە دەيىن، شەكارا اتتاعان ەلەكتروندى ساۋدامەن شۇعىلدانۋشىلاردان تارتىپ بۇقاراعا قىزمەت وتەيتىن نەگىزگى ساتى كادرلارعا دەيىن، 3 جىلدان بەرى شاڭحايدىڭ شينجياڭعا كومەك كورسەتۋ قولباسشىلىق شتابىنىڭ كومەگىندە، قاشقار ايماعىندا ءار كاسىپتە، ءار سالادا ءبىر توپ دارىندىلار باۋلىنىپ شىعىپ، قاشقار ايماعىنىڭ ەكونوميكالىق، قوعامدىق دامۋىن پارمەندى ىلگەرىلەتتى.

　ءۇرتىس كۇش سالىپ، كوپ شارانى قاتار قولداندى

2020 - جىل − كەدەيلىكتەن ارىلتۋدان قامال الۋ شەشۋشى شايقاسىنىڭ شەشۋشى جەڭىسىنە قول جەتكىزۋ جىلى. ياركەن، قاعىلىق سىندى ەكى اۋداننىڭ كەدەيلىك قالپاعىن الىپ تاستاۋدى دەر كەزىندە جۇزەگە اسىرۋىنا قالاي كۇش ۇستەۋ − شاڭحايدىڭ شينجياڭعا كومەك كورسەتۋ قولباسشىلىق شتابىنىڭ الدىنا قويىلعان، ءسوزسىز، جاۋاپ بەرەتىن سۇراۋ بولدى.

الابۇتا ەگىمشىلىگىن جالپىلاستىرۋ، اۋىل شارۋاشىلىق قوسىمشا ونىمدەرىن ساتۋ جولىن كەڭەيتۋ، جۇمىستاندىرۋ ورنىن ارتتىرۋ، وسىزاماندانعان كاسىپورىنداردى ىرگە تەبۋگە باۋراۋ، ەگىنشى - مالشىلاردىڭ كىرىسىن ورنىقتى جوعارىلاتۋ... كەدەيلىكتەن ارىلتۋدان قامال الۋ مىندەتى الدىندا، شاڭحايدىڭ شينجياڭعا كومەكتەسۋ قولباسشىلىق شتابى جاڭالىق اشۋ جولىن بىرتە - بىرتە تاۋىپ شىقتى. 2020 - جىلى 11 - ايدىڭ 14 - كۇنى شينجياڭ ۇيعۇر اۆتونوميالى رايوندىق ۇكىمەت حابارلاندىرۋ جاريالاپ، ياركەن اۋدانىنىڭ، قاعىلىق اۋدانىنىڭ كەدەي اۋدان قاتارىنان شىققاندىعىن تۇراقتاندىردى. الدىڭعى مەرزىمدە كەدەيلىكتەن ارىلتۋدان قامال الۋ مىندەتىن ورىنداپ بولعان پوسكام اۋدانىن، مارالباسى اۋدانىن قوسقاندا، وسىمەن شاڭحايدىڭ شينجياڭعا كومەك كورسەتۋشى كادر - دارىندىلارى قاشقار ايماعىنداعى 4 اۋدانعا باعىتتالعان كەدەيلىكتەن ارىلتۋدان قامال الۋ مىندەتىن تابىسپەن ورىندادى.

كەدەيلىكتەن ارىلتۋدان قامال الۋ مىندەتىنىڭ ورىندالۋى ءسال دامىلداي تۇرۋعا، ءسال تىنىستاۋعا بولادى دەگەندىك ەمەس، شاڭحايدىڭ شينجياڭعا كومەكتەسۋ قولباسشىلىق شتابى كەدەيلىكتەن ارىلتۋدان قامال الۋ جەتىستىگىن بەكەمدەۋدى، كەڭەيتۋدى اۋىل - قىستاقتى گۇلدەندىرۋمەن ءونىمدى ۇشتاستىرۋدىڭ ۇتىلامالى تاياقشاسىن ۇزدىكسىز جالعاپ، نىسانداردىڭ كومەسكى كۇشىن ۇزدىكسىز تەرەڭدەي اشىپ، تۇتىنۋ ارقىلى كومەكتەسۋ - سۇيەمەلدەۋ قابىلەتىن جوعارىلاتىپ، قاشقار ايماعىنداعى ەگىنشى - مالشىلاردىڭ كىرىسىن ورنىقتى ارتتىردى. 3 جىلدان بەرى شاڭحايدىڭ شينجياڭعا كومەك كورسەتۋ قولباسشىلىق شتابىنىڭ شينجياڭعا كومەك كورسەتۋ بويىنشا قوسقان جالپى قارجىسى 8 ميلليارد 533 ميلليون يۋان بولىپ، شينجياڭعا كومەكتەسۋ بويىنشا 333 نىساننىڭ تياناقتانۋىن ىلگەرىلەتىپ، ىقپالى تەرەڭ، جەتەكتەۋى كورنەكتى بولعان، بۇقاراعا جاپپاي تيىمدىلىك جاسايتىن نىساندار مەن قىزمەتتەردى تىندىرىمدى ىستەدى.

مىنە وسىنداي تالايلاعان ناتيجەلەردى شاڭحايدىڭ شينجياڭعا كومەك كورسەتۋشى كادر - دارىندىلارىنىڭ قۇلشىنىسى مەن ەڭبەگىنەن بولە قاراۋعا كەلمەيدى. 2020 - جىلى شاڭحايدىڭ شينجياڭعا كومەك كورسەتۋشى كادر - دارىندىلارى قاشقار ايماعىنا كومەكتەسىپ، شاڭحايعا 658 ميلليون يۋاندىق اۋىل شارۋاشىلىق قوسىمشا ونىمدەرىن ساتتى، 2021 - جىلى بۇل ءبىر ميلليارد 30 ميلليون يۋانعا جەتىپ ％5. 56 ارتتى؛ 2022 - جىلى شاڭحاي كوكونىس(توبى) شەكتى سەرىكتەستىگىنىڭ ”100 اۋدان، 100 ءونىم“ باعىتتامالى كومەكتەسۋ - سۇيەمەلدەۋ تۇعىرىمەن بەلسەنە ءتۇيىلىسىپ، اۋىل شارۋاشىلىق ونىمدەرىن ساتۋ مولشەرىنىڭ ارتۋىن جەبەپ، قاشقار ايماعىنداعى ساپالى اۋىل شارۋاشىلىق قوسىمشا ونىمدەرى ماركاسىنىڭ ىقپال قۋاتىن جوعارىلاتتى.

　　شينجياڭدى مادەنيەتپەن نارلەندىرىپ، ءۇنسىز ىقپال كورسەتتى

مادەنيەت قۇددى سۋ سياقتى بار الەمدى ءۇنسىز نارلەندىرەدى. 3 جىلدان بەرى شاڭحايدىڭ شينجياڭعا كومەك كورسەتۋ قولباسشىلىق شتابى مادەنيەت گەنىمەن كوڭىل سارايىن نارلەندىرىپ، جاڭا ءداۋىر قۇرۋدىڭ اسقاق ءۇنىن اۋەلەتتى.

2022 - جىلى 8 - اي، مارالباسى اۋداندىق مۇراجايدىڭ جاڭا سارايى سىرتقا ەسىك اشىپ، ەكسكۋرسيالاۋشىلاردى قابىلدادى. جاڭالاپ سالىنعان مارالباسى اۋداندىق مۇراجاي توققۇزساراي ەسكى جۇرتى بايىرعى قالاسىنىڭ اۋەلگى بەينەسىن ۇلگى ەتىپ، ۇلى قورعان، بەلگى وت، حان، تاڭ پاتشالىقتارى داۋىرىندەگى اعاش قۇرىلىمدى قۇرىلىستارى سياقتى ماڭىزدى فاكتورلاردى توعىستىرىپ، ءار ۇلت كادر - بۇقاراسىنىڭ ەكسكۋرسيالايتىن، ۇيرەنەتىن جانە جەر - جەردەگى ساياحاتشىلاردىڭ ”ات بايلايتىن“ جاڭا جەر بەلگىسىنە اينالدى.

3 جىلدان بەرى شاڭحايدىڭ شينجياڭعا كومەك كورسەتۋ قولباسشىلىق شتابى مادەنيەت قۇنارلى توپىراعىنا تەرەڭ تامىر تارتىپ، قاشقار ايماعىنىڭ 4 اۋدانىنداعى مەكتەپتەرگە كۇنجۇي، جيڭجۇي سياقتى تەاتر تۇرلەرىنىڭ كلاسسيكالىق ءان - كۇيلەرىن ەنگىزىپ، كوركەمونەر فاكتورلارىن مەكتەپكە كىرگىزىپ، وقۋشىلاردىڭ اناعۇرلىم كوپ تاڭداۋلى ءداستۇرلى مادەنيەتتى كورۋىنە مۇمكىندىك جاسادى؛ باي مازمۇندى، الۋان ءتۇرلى شاڭحاي - قاشقار مادەنيەت، دەنە تاربيە قيمىلدارىن ۇيىمداستىردى، فۋتبول، ۇستەل دوپ، قورشاما دويبى سياقتى سپورت جارىستارى قاشقار دالاسىنا تارالدى؛ مور بۇتحاناسى ەسكى جۇرتى باقشاسىن جوسپارلاپ، جوبالادى ءارى سالدى، قاشقار تاريحىن بۇرىنعى قالپىنا كەلتىرىپ جانە قايتا ايگىلەپ، قاشقار ايماعىنىڭ مادەنيەت - ساياحات كاسىبىنىڭ دامۋىن ىلگەرىلەتتى جانە جەبەدى؛ جاراتىلىستىق، گۋمانيتارلىق حۇجاتتى فيلم «ياركەن وزەنىن» كەسكىنگە ءتۇسىرۋدى سايكەستىرىپ، ۇيىمداستىرىپ، جاراتىلىستىق كورىنىس، تاريحي اڭگىمە، مادەني ەسكەرتكىش تاريحي ماتەريالدارىن جانە ماماندارمەن سۇحباتتاسۋدى ۇشتاستىرۋ ءتاسىلى ارقىلى ياركەن وزەنى ايدىنىنداعى ءار ۇلت حالقىنىڭ ورتاق تاريحىن جالپى بەتتىك شەشىپ ءتۇسىندىردى جانە ايگىلەدى...

مادەنيەت كۇشى ايبىندى دا باياندى بولادى. شاڭحايدىڭ شينجياڭعا كومەكتەسۋ قولباسشىلىق شتابىنىڭ تىنباي قۇلشىنۋىندا، قاشقاردىڭ تاماشا حيكايالارى اسەم نوتاعا اينالىپ، شينجياڭعا كومەك كورسەتۋ قىزمەتىنىڭ تىڭ مەلودياسىن ورىنداپ، شاڭحاي، قاشقار سىندى ەكى جەردىڭ تەرەڭ دوستىق سۇيىسپەنشىلىگىنىڭ كۋاسى بولدى.