ەرىكتى تىلشىلەر گاۋ حۇڭيە، ساي جىنيۇي حابارلايدى. شينجياڭعا باعىتتامالى كومەكتەسۋدە حالىق تۇرمىسى الدىمەن ەسكەرىلدى. بيىل جىل باسىنان بەرى نانجيڭ قالاسى شينجياڭعا كومەكتەسۋ نىسان قارجىسىن حالىق تۇرمىسىنا، نەگىزگى ساتىعا بەيىمدەۋگە تاباندى بولدى، جەرگىلىكتى ورىننىڭ دامۋىن جەبەيتىن، حالىق تۇرمىسىنا تيىمدىلىك جاسايتىن ٴبىر توپ جاقسى نىسان قۇلجا قالاسىندا ىركەس - تىركەس تياناقتانىپ اتقارىلدى، كەيبىر نىسان ٴار ۇلت بۇقاراسىن يگىلىككە كەنەلتتى.

11 - ايدىڭ 22 - كۇنى قۇلجا قالاسى سايبويى ٴمالى باسقارماسى حۋاچىڭلي پارتيا مۇشەلەرىنە، بۇقاراعا قىزمەت وتەۋ ورتالىعىنىڭ مۋزيكا ساباقحاناسىندا تۇرعىن جاڭ فىڭيىڭ فىڭيە شاعىن حور ۇيىرمەسىن باستاپ داۋىس جاتتىعۋىن جاساپ جاتتى. جاڭ فىڭيىڭ بىزگە بىلاي دەدى: بۇرىن شاعىن اۋماقتا لايىقتى ورىن جوق ەدى، ۇيىرمە مۇشەلەرىمىز باسقا جەرگە بارىپ جاتتىعۋ ٴۇشىن اۆتوبۋزبەن 40 مينۋت جول جۇرەتىن، قازىر قيمىل ٴۇيى ىرگەدەن اشىلدى، 5 مينۋتتا جەتەمىز، الاڭ ورنى ۇلكەن، ۇيىرمە مۇشەلەرىمىز دە بۇرىنعى ون نەشە ادامنان 30 نەشە ادامعا كوبەيدى.

قۇلجا قالاسى سايبويى ٴمالى باسقارماسى حۋاچىڭلي پارتيا مۇشەلەرىنە، بۇقاراعا قىزمەت وتەۋ ورتالىعىن نانجيڭ شينجياڭعا باعىتتامالى كومەكتەسۋ قارجىسىنان 2 ميلليون 600 مىڭ يۋان قارجى قوسىپ، بيىل 8 - ايدا وزگەرتىپ، دارەجەسىن جوعارىلاتىپ سالعان. ”كەڭسە اۋماعىن بارىنشا كىشىرەيتۋ، قىزمەت وتەۋ اۋماعىن بارىنشا كەڭەيتۋ“ تالابى بويىنشا، قازىرگى جالپى اۋماعى 2300 شارشى مەتر كەلەتىن قۇرىلىس ورنى تۇگەلىمەن بۇقاراعا قىزمەت وتەۋگە پايدالانىلدى، ٴۇش قاباتتا 19 ٴتۇرلى فۋنكتسيالىق بولمە بار، حالىققا قولايلى قىزمەت وتەۋ تۇعىرى، لەي فىڭ قىزمەت وتەۋ پۋنكتى، الەۋمەتتىك اۋماق دەنساۋلىق ساقتاۋ قىزمەت وتەۋ پۋنكتى ٴبىرىنشى قاباتتاعى زالدا، ال ەكىنشى قاباتتا ٴبي بولمەسى، بالالار كوڭىل اشۋ بولمەسى سياقتىلار اشىلعان، بۇرىنعىمەن سالىستىرعاندا كينو كورۋ رايونى، قىزىل مادەنيەت ۇيرەنۋ ٴۇيى، 24 ساعاتتىق پىسىقتاۋ بولمەسى، مۋزيكا ساباقحاناسى سياقتى 7 فۋنكتسيالىق رايون تىڭنان قوسىلعان. قازىر تاڭەرتەڭگى ساعات 9 دان كەشكى ساعات 9 جارىمعا دەيىن، ٴار كۇنى كوپتەگەن تۇرعىن حۋاچىڭلي پارتيا مۇشەلەرىنە، بۇقاراعا قىزمەت وتەۋ ورتالىعىندا ٴتۇرلى قيمىلدارعا قاتىناسادى.

”ٴبىز 1 - قاباتتى اشىق ۇلگىدە جوبالادىق، ’ي - گاڭتۇڭ‘، ’چۋانگاڭتۇڭ‘ وسى ارادا كۇندەلىكتى جۇمىستاردى بىتىرەدى. سونىمەن بىرگە، ٴبىز ٴپانجىم قالاشىعىنداعى قوعامدىق قىزمەت ۇيىمدارىمەن سەلبەسىپ، لەي فىڭ قىزمەت وتەۋ پۋنكتىن قۇردىق، كەيبىر الەۋمەتتىك يگىلىك قيمىلدارىن ورىستەتۋىمىزگە بولادى“. سايبويى الەۋمەتتىك اۋماعى پارتيا ياچەيكاسىنىڭ شۋجيى جاڭ شىڭحۋا بىلاي دەدى: ”پارتيا مۇشەلەرى بۇقاراعا قىزمەت وتەۋ ورتالىعى جاڭالانعاننان كەيىن قاراستى اۋماقتاعى تۇرعىندار مەن ۇيىرمەلەردى الەۋمەتتىك اۋماققا بارىپ ٴتۇرلى قيمىلدارعا قاتىناسۋعا باۋرادى، قازىر قاراستى اۋماقتا ٴار تۇردەگى 16 قيمىل قوسىنى بار“.

بيىل 7 - ايدا شينجياڭعا باعىتتامالى كومەكتەسۋ قارجىسىنان جالپى 125 ميلليون يۋان قارجى قوسىلاتىن، 2023 - جىلى 43 ميلليون يۋان قارجى قوسۋ جوسپارلانعان قۇلجا قالالىق 29 - ورتا مەكتەپ قۇرىلىسى نىسانى رەسمي جۇمىس باستادى. نىساننىڭ جاڭادان سالىنعان اۋماعى شامامەن 26850.14 شارشى مەتر، بۇل ورتا مەكتەپ ٴبولىمىنىڭ وقىتۋ عيماراتىن، باستاۋىش مەكتەپ ٴبولىمىنىڭ وقىتۋ عيماراتىن، جالپىلىق عيماراتىن، اسحاناسىن قامتيدى. مەكتەپ سالىنىپ بولعاننان كەيىن 2 مىڭ 500 وقۋشى وسى ارادا وقي الادى. نىسان 2024 - جىلى 9 - ايدا پايدالانۋعا بەرىلەدى.

قۇلجا قالالىق 29 - ورتا مەكتەپ نىسان قۇرىلىسىنىڭ جۇمىس باسىنداعى جاۋاپتىسى بۋ ديڭ بىلاي دەپ تانىستىردى: قازىر ورتا مەكتەپ ٴبولىمىنىڭ 1 ـ، 2 - وقىتۋ عيماراتتارى سالىنىپ بولدى، جالپىلىق عيماراتتىڭ نەگىزگى تۇلعالىق بولەگى دە جابىلىپ بولدى. حالىقتىق اۋە قورعانىس اۆتوموبيل سكلاتىنىڭ نەگىزگى تۇلعاسىندا، باستاۋىش مەكتەپ ٴبولىمىنىڭ وقىتۋ عيماراتىندا جانە اسحانانىڭ نەگىزدىك بولەگىندە كەلەر جىلى كوكتەمنەن كەيىن قۇرىلىس باستاۋ جوسپارلاندى.

بيىل نانجيڭ قالاسى بايلىق باسىمدىعىن تولىق ساۋلەلەندىرىپ، وقۋ - اعارتۋ، عىلىم - تەحنيكا، ەمدەۋ، مادەنيەت سياقتى جاقتاردا كومەكتەسۋ - سۇيەمەلدەۋدى ورىستەتىپ، قۇلجا قالاسىنىڭ جوعارى ساپالى دامۋىنا دەم بەردى.

”2023 - جىلى نانجيڭ قۇلجا قالاسىنا كومەكتەسىپ جالپى 31 نىسان سالدى، بۇلار حالىق تۇرمىسى، وقۋ - اعارتۋ، ەمدەۋ، كاسىپ سالاسى، مادەنيەت، ساياحات سياقتى بولەكتەرگە سايادى، بيىل جالپى 174 ميلليون يۋان شاماسىندا قارجى قوسۋ جوسپارلاندى“. جياڭسۋدىڭ ىلەگە كومەك بەرۋ قولباسشىلىق شتابى نانجيڭ قىزمەت گرۋپپاسى نىسان جوبالاۋ ٴبولىمىنىڭ ورىنباسار باستىعى لي اڭ بىلاي دەدى: ”قازىر بارلىق نىسان جۇمىس باستادى، ۇشتەن ٴبىر نىسان سالىنىپ بولدى، قوسىلعان قارجىنىڭ %85 تەن استامى ورىندالدى. بيىل 12 - ايعا بارعاندا نىسانعا قوسىلعان بارلىق قارجى ٴساتتى تياناقتانادى“ دەدى.