تىلشىلەرىمىز ليۋ چۇنشيڭ، لي جيان حابارلايدى. ”توعىزتاراۋ اۋدانىنا اۋەجاي سالىناتىن بولدى!“ نەشە كۇننەن بەرى ىلە توعىسپالى مەديا ورتالىعى جاريالاعان بەينەجازبا حابار توعىزتاراۋلىق سايتتاستاردىڭ ۋيشين دوستار شەڭبەرىندە كەڭىنەن تارالىپ، ولار ”اسىعا كۇتەمىز، ساياحاتتىڭ دامۋىنا دەم بەرىپ، حالىق تۇرمىسىنداعى ٴجۇرىس - تۇرىستى جاقسارتاتىن بولدى، كەرەمەت!“ دەستى.

1 - ايدىڭ 12 - كۇنى ىلە قازاق اۆتونوميالى وبلىستىق 15 - كەزەكتى حالىق قۇرىلتايىنىڭ 4 - ٴماجىلىسى اشىلدى، وبلىس باستىعى ەلشات تۇرسىنباي ۇلى ىلە وبلىستىق حالىق ۇكىمەتى اتىنان ماجىلىسكە ۇكىمەت قىزمەتىنەن بايانداما جاسادى. وبلىستىق ۇكىمەتتىڭ قىزمەت بايانداماسىنىڭ 2025 - جىلعى قىزمەت ورنالاستىرۋىندا بىلاي دەلىندى: قۇلجا اۋەجايىن كوشىرۋ قۇرىلىسىن، نارات اۋەجايىن كەڭەيتىپ سالۋ قۇرىلىسىنىڭ جۇمىس باستاۋ ينجەنەرياسىن بار كۇشپەن ىلگەرىلەتىپ، توعىزتاراۋ اۋدانى، شاعانتوعاي اۋدانى امبەباپ اۋەجايىن، شيحۋ قالاسى، قوبىقسارى اۋدانى، جەمەنەي اۋدانى جانە شىڭگىل اۋدانى اۋەجايى نىساندارىنىڭ الدىڭعى مەرزىمدىك قىزمەتىن ويداعىداي ىستەۋ كەرەك.

توعىزتاراۋ اۋدانىنا اۋەجاي سالۋ جونىندە كوپ ايتىلماعانىمەن، ەكى ٴماجىلىستى حابارلاۋعا قاتىناسقان تىلشىلەر ٴۇشىن توتەنشە قۋانىشتى جاڭالىق بولدى، سونىمەن بىرگە، توعىزتاراۋ اۋدانىنان كەلگەن ىلە وبلىستىق حالىق قۇرىلتايى ۋاكىلدەرىن، ساياسي كەڭەس مۇشەلەرىن ايرىقشا جەلپىندىردى.

”توعىزتاراۋ اۋدانىندا سالىناتىن امبەباپ اۋەجاي قۇرىلىسى ٴبىزدىڭ توعىزتاراۋ اۋدانىنداعى ٴار ۇلت بۇقاراسى ۇزاقتان بەرى ارمانداپ كەلە جاتقان ٴىرى ٴىس“. ىلە وبلىستىق حالىق قۇرىلتايىنىڭ ۋاكىلى، توعىزتاراۋ اۋداندىق پارتكومنىڭ ورىنباسار شۋجيى، ۋاقىتتىق اۋدان اكىمى سانات ساتىكەن ۇلى تىلشىگە بىلاي دەدى: ”قازىر توعىزتاراۋ اۋدانىنىڭ امبەباپ اۋەجايىن سالاتىن ورىن بەلگىلەنىپ بولدى، قاتىستى راسمياتتار ٴبىتىرىلۋ ۇستىندە، مەجەمەن 2026 ـ جىلدىڭ باسىندا جۇمىس باستايدى. اۋەجاي سالىنىپ بولعاننان كەيىن توعىزتاراۋ اۋدانىنىڭ ساياحات كاسىبىنىڭ دامۋىن ىلگەرىلەتۋدە ماڭىزدى رول اتقارادى“.