شي جينپيڭ ساياسي كەڭەس ماجىلىسىنە قاتىناسىپ جاتقان جۇڭگو دەموكراتيالىق وداعىنداعى، جۇڭگو دەموكراتيانى ىلگەرىلەتۋ قوعامىنداعى، وقۋ ـ اعارتۋ سالاسىنداعى مۇشەلەرگە امانداسا بارعاندا بىلاي دەپ باسا دارىپتەدى

وقۋ ـ اعارتۋدىڭ عىلىم ـ تەحنولوگيا جانە دارىندىلار جونىندەگى تىرەكتىك رولىن كۇشەيتىپ، دارىندىلار مولىنان شىعاتىن، اركىم قابىلەتىن تولىق ساۋلەلەندىرەتىن، قابىلەتتى تولىق پايدالاناتىن جالىندى جاعداي قالىپتاستىرۋ كەرەك

ۋاڭ حۋنيڭ، ساي چي امانداسۋعا جانە تالقىعا قاتىناستى

3 ـ ايدىڭ 6 ـ كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ مەملەكەتتىك ساياسي كەڭەس 14 ـ كەزەكتى كوميتەتىنىڭ 3 ـ ماجىلىسىنە قاتىناسىپ جاتقان جۇڭگو دەموكراتيالىق وداعىنداعى، جۇڭگو دەموكراتيانى ىلگەرىلەتۋ قوعامىنداعى، وقۋ ـ اعارتۋ سالاسىنداعى مۇشەلەرگە امانداسا باردى ٴارى بىرىككەن گرۋپپا جيىنىنا قاتىناسىپ، پىكىرلەر مەن ۇسىنىستاردى تىڭدادى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ٴتوراعاسى ۋاڭ حۋنيڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي امانداسۋعا جانە تالقىعا قاتىناستى.

□ سۋرەتتى شينحۋا اگەنتتىگىنىڭ ٴتىلشىسى ديڭ لين تۇسىرگەن

شينحۋا اگەنتتىگىنىڭ 3 ـ ايدىڭ 6 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ 3 ـ ايدىڭ 6 ـ كۇنى تۇستەن كەيىن مەملەكەتتىك ساياسي كەڭەس 14 ـ كەزەكتى كوميتەتىنىڭ 3 ـ ماجىلىسىنە قاتىناسىپ جاتقان جۇڭگو دەموكراتيالىق وداعىنداعى، جۇڭگو دەموكراتيانى ىلگەرىلەتۋ قوعامىنداعى، وقۋ ـ اعارتۋ سالاسىنداعى مۇشەلەرگە امانداسا باردى ٴارى بىرىككەن گرۋپپا جيىنىنا قاتىناسىپ، پىكىرلەر مەن ۇسىنىستاردى تىڭدادى. ول بىلاي دەپ باسا دارىپتەدى: جاڭا ٴداۋىردىڭ جاڭا جورىعىندا جۇڭگو ۇلگىسىندەگى وسىزامانداندىرۋدىڭ وقۋ ـ اعارتۋ، عىلىم ـ تەحنولوگيا، دارىندىلار جونىندەگى سۇرانىسىن، ٴسوز جوق، تەرەڭ يگەرىپ، وقۋ ـ اعارتۋدىڭ عىلىم ـ تەحنولوگيا جانە دارىندىلار جونىندەگى تىرەكتىك رولىن كۇشەيتىپ، دارىندىلار مولىنان شىعاتىن، اركىم قابىلەتىن تولىق ساۋلەلەندىرەتىن، قابىلەتتى تولىق پايدالاناتىن جالىندى جاعدايدى ونان ارى قالىپتاستىرۋ كەرەك.

”8 ـ ناۋرىز“ حالىقارالىق ەڭبەكشى ايەلدەر مەرەكەسى جەتىپ كەلۋ قارساڭىندا، شي جينپيڭ جۇڭگو كوممۋنيستىك پارتياسى ورتالىق كوميتەتى اتىنان مەملەكەتتىك ەكى ماجىلىسكە قاتىناسىپ جاتقان ايەل ۋاكىلدەرگە، ايەل مۇشەلەرگە، ايەل قىزمەتكەرلەرگە، بۇكىل ەلدەگى ٴار ۇلت، ٴار سالا ايەلدەرىنە، شياڭگاڭ ەرەكشە اكىمشىلىك رايونىنداعى، اۋمىن ەرەكشە اكىمشىلىك رايونىنداعى، تايۋان رايونىنداعى ايەل باۋىرلاستارعا جانە شەتەلدەگى ايەل چياۋباۋلارعا مەرەكە بايلانىسىمەن قۇتتى بولسىن ايتتى جانە تاماشا تىلەك تىلەدى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ٴتوراعاسى ۋاڭ حۋنيڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي امانداسۋعا جانە تالقىعا قاتىناستى.

بىرىككەن گرۋپپا جيىنىندا جاڭ يۇنكاي، ساي گۋاڭجيە، جىڭ جياجيان، شۇي كۇن، سۇي يالي، ما جيڭلين قاتارلى 6 مۇشە كاسىپتىك وقۋ ـ اعارتۋ مەن وڭىرلىك كاسىپ سالالارىنىڭ سايكەستى دامۋىن ىلگەرىلەتۋ، نەگىزدىك وقۋ ـ اعارتۋ بايلىعىن ۇلەستىرۋدى ساپالىلاندىرۋ، بالالار، جاستار مەن ورەندەردىڭ كىتاپ وقۋ ەكولوگياسىن تۇلعالاۋ، مەملەكەتتىك وقۋ ـ اعارتۋ زەردەلى ينتەرنەت قۇرىلىسىن ىلگەرىلەتۋ، وقۋ ـ اعارتۋدىڭ، عىلىم ـ تەحنولوگيانىڭ، دارىندىلاردىڭ ٴبىر تۇلعالى دامۋىن ىلگەرىلەتۋ، مەكتەپ ساباعىنا سۇيەنىپ ٴداستۇرلى مادەنيەتتى اسقاقتاتۋ سياقتىلاردى ارقاۋ ەتىپ ٴسوز سويلەدى.

كوپشىلىكتىڭ ٴسوزىن تىڭداعاننان كەيىن، شي جينپيڭ ماڭىزدى ٴسوز سويلەدى. ول كوپشىلىكپەن بىرگە تالقى جۇرگىزىپ، پىكىر ـ ۇسىنىستاردى تىڭداعاندىعىنا توتەنشە قۋاناتىندىعىن ٴبىلدىردى. ول جۇڭگو كوممۋنيستىك پارتياسى ورتالىق كوميتەتى اتىنان وسىندا وتىرعان مۇشەلەرگە، سونداي ـ اق قالىڭ جۇڭگو دەموكراتيالىق وداعىنىڭ، جۇڭگو دەموكراتيانى ىلگەرىلەتۋ قوعامىنىڭ مۇشەلەرىنە جانە وقۋ ـ اعارتۋ سالاسىنداعى قايراتكەرلەرگە، قالىڭ ساياسي كەڭەس مۇشەلەرىنە شىنايى سالەم جولدادى.

شي جينپيڭ بىلاي دەپ اتاپ كورسەتتى: وتكەن ٴبىر جىلدا حالىق ساياسي كەڭەسى وزەكتى مىندەتپەن تىعىز بىرلەستىرە وتىرىپ مىندەت اتقارىپ، جاۋاپكەرشىلىكتى ادا ەتىپ، پارتيا جانە مەملەكەت ىستەرىنىڭ دامۋىنا جاڭا ۇلەس قوستى. جۇڭگو دەموكراتيالىق وداعىنىڭ، جۇڭگو دەموكراتيانى ىلگەرىلەتۋ قوعامىنىڭ ٴار دارەجەلى ۇيىمدارى جانە قالىڭ مۇشەلەرى نازاردى وزەكتى قىزمەتكە شوعىرلاندىرىپ، بەلسەنە سىندارلى اقىل ـ كەڭەس بەرىپ، قوعامدىق قىزمەت وتەۋگە ات سالىسىپ، ٴتۇرلى قىزمەتتەردە تىڭ ناتيجەلەرگە قول جەتكىزدى. قالىڭ وقۋ ـ اعارتۋ سالاسىنداعى قايراتكەرلەر وقۋ ـ اعارتۋدا قۋاتتى ەل قۇرىلىسىنا بەلسەنە ات سالىسىپ، ”بەس تاربيەنى“ قاتار جۇرگىزۋدى، ٴمورال ارقىلى تاربيەلەۋدى ىلگەرىلەتۋدە تىڭ قادام تاستادى.

شي جينپيڭ بىلاي دەپ باسا دارىپتەدى: وقۋ ـ اعارتۋدا قۋاتتى ەل، عىلىم ـ تەحنولوگيادا قۋاتتى ەل، دارىندىلار جاعىندا قۋاتتى ەل قۇرۋدا، ٴسوز جوق، دۇرىس وقىتۋ جۇرگىزۋ بەتالىسىنا تاباندى بولىپ، ٴمورال، اقىل ـ وي، دەنە، ەستەتيكا، ەڭبەك جاقتارىنان جاپپاي دامىعان سوتسياليزمنىڭ قۇرۋشىلارى مەن ٴىزباسارلارىن باۋلۋ كەرەك. نازاردى جاڭا ٴداۋىر جۇڭگوشا سوتسياليزم يدەياسىمەن رۋح سومداپ، ادام تاربيەلەۋگە شوعىرلاندىرىپ، ٴمورال تاربيەسىن اقىل ـ وي تاربيەسىنىڭ، دەنە تاربيەسىنىڭ، ەستەتيكا تاربيەسىنىڭ، ەڭبەك تاربيەسىنىڭ جالپى بارىسىنا ٴسىڭىرۋ كەرەك. يدەيا ـ ساياسي ساباعى قۇرىلىسى مەن پارتيانىڭ جاسامپاز نازارياسىمەن قارۋلاندىرۋدى قادامداس ىلگەرىلەتۋگە، يدەيا ـ ساياسي ساباعى مەن ساباقتىڭ يدەيا ـ ساياسيىن ٴبىر باعىتتا، بىرگە الىپ جۇرۋگە تاباندى بولىپ، يدەيا ـ ساياسي تاربيەسى ”شاعىن ساباقحاناسى“ مەن قوعام ”ۇلكەن ساباقحاناسىن“ ٴونىمدى توعىستىرىپ، ٴمورال تاربيەسى قىزمەتىن اناعۇرلىم تىڭعىلىقتى، اناعۇرلىم ٴونىمدى ىستەۋ كەرەك.

شي جينپيڭ بىلاي دەپ اتاپ كورسەتتى: جوعارى ساپالى وقۋ ـ اعارتۋ جۇيەسىن قۇرىپ، حالىق رازى بولاتىن وقۋ ـ اعارتۋدى ويداعىداي جۇرگىزۋدىڭ ٴتۇبىرلى نەگىزى وقۋ ـ اعارتۋ جالپىلىق رەفورماسىن تەرەڭدەتۋدە. وقۋ ـ اعارتۋدى باعالاۋدىڭ عىلمي جۇيەسىن قۇرىپ، ونىڭ سىلتەمە تاياق رولىن ٴونىمدى ساۋلەلەندىرۋ كەرەك. مەكتەپ باسقارۋ جۇيەسىن كەمەلدەندىرىپ، مەكتەپتىڭ وقىتۋ جۇرگىزۋدەگى وزىندىك ۇقىعىن تياناقتاندىرىپ، وقۋ ـ اعارتۋدى زاڭمەن جونگە سالۋ جانە باسقارۋ دەڭگەيىن ۇزدىكىسز جوعارىلاتۋ كەرەك. وسىزاماندانۋ سۇرانىسىن كوزدەپ، جان سانى قۇرىلىمىنىڭ وزگەرىسىنە ۇيلەسىپ، نەگىزدىك وقۋ ـ اعارتۋدى، جوعارى وقۋ ـ اعارتۋدى، كاسىپتىك وقۋ ـ اعارتۋدى ٴبىر تۇتاس جوسپارلاپ، ۇكىمەت ۇسىنىلىمى مەن قوعام ۇسىنىلىمىن ٴبىر تۇتاس جوسپارلاپ، اناعۇرلىم ۇيلەسىمدى، جوعارى ٴونىمدى وقۋ ـ اعارتۋ بايلىعىن ۇلەستىرۋ مەحانيزمىن ورناتۋ، اقاۋسىزداندىرۋ كەرەك.

شي جينپيڭ بىلاي دەپ باسا دارىپتەدى: عىلىم ـ تەحنولوگيادا ٴوز كۇشىنە سۇيەنىپ جاڭالىق اشۋ مەن دارىندىلاردى ٴوز كۇشىنە سۇيەنىپ باۋلۋدىڭ ۇتىمدى ىقپالداستىعىن جۇزەگە اسىرۋدا وقۋ ـ اعارتۋ جەتەكشىلىك، نەگىزدىك تىرەك بولۋ رولىن ونان ارى ساۋلەلەندىرۋى كەرەك. نەگىزدىك ٴپان مەن ارالاسپا پاندە سەرپىلىس جاساۋ جوسپارىن ويداعىداي اتقارىپ، مەكتەپ، كاسىپورىن، جەرگىلىكتى ورىن بىرلەسىپ جاڭالىق اشۋ تۇعىرىن تۇلعالاپ، عىلىم ـ تەحنولوگيا جەتىستىكتەرىن كادەگە جاراتۋ ونىمدىلىگىن جوعارىلاتۋ كەرەك. دارىندى باۋلۋ مەن ەكونوميكالىق، قوعامدىق دامۋدىڭ قاجەتىن سايكەستىرۋ مەحانيزمىن كەمەلدەندىرىپ، دارىندىلاردى ٴوز كۇشىنە سۇيەنىپ باۋلۋدىڭ ساپاسى مەن ونىمدىلىگىن جوعارىلاتۋ كەرەك. مەملەكەتتىڭ وقۋ ـ اعارتۋدى سيفرلاندىرۋ ستراتەگياسىن اتقارىپ، ۇيرەنۋ ۇلگىسىندەگى قوعام قۇرىپ، ٴار ۇلگىدەگى، ٴار جىكتەگى دارىندىلاردىڭ باسەكەلەسە مولىنان جارىققا شىعۋىن ىلگەرىلەتۋ كەرەك.

شي جينپيڭ بىلاي دەپ اتاپ كورسەتتى: وقۋ ـ اعارتۋدا قۋاتتى ەل، عىلىم ـ تەحنولوگيادا قۋاتتى ەل، دارىندىلار جاعىندا قۋاتتى ەل قۇرۋ _ بۇكىل پارتيانىڭ، بۇكىل قوعامنىڭ ورتاق جاۋاپكەرشىلىگى. حالىق ساياسي كەڭەسى ارناۋلى كەڭەس قۇرىلىمى رولىن تولىق ساۋلەلەندىرىپ، كەڭ كولەمدە جۇرت تىلەگىن ۇيىستىرىپ، ورتاق تانىم ۇيىستىرىپ، اقىل ـ پاراسات ۇيىستىرىپ، كۇش ـ قۋات ۇيىستىرىپ، وقۋ ـ اعارتۋ، عىلىم ـ تەحنولوگيا، دارىندىلار ىستەرىنىڭ جوعارى ساپالى دامۋىن جەبەۋ كەرەك. قالىڭ جۇڭگو دەموكراتيالىق وداعىنىڭ، جۇڭگو دەموكراتيانى ىلگەرىلەتۋ قوعامىنىڭ مۇشەلەرى جانە وقۋ ـ اعارتۋ سالاسىنداعى قايراتكەرلەر ٴوز ارتىقشىلىقتارىن ساۋلەلەندىرىپ، وقۋ ـ اعارتۋ، عىلىم ـ تەحنولوگيا، دارىندىلار ٴتۇزىلىس ـ مەحانيزمىن ٴبىر تۇلعالاندىرۋ رەفورماسىن جانە دامۋ امالياتىن اناعۇرلىم ويداعىداي قولداپ جانە وعان ات سالىسىپ، مەملەكەتتىڭ جاڭالىق اشۋ جۇيەسىنىڭ جالپى تۇلعالىق ونىمدىلىگىن جوعارىلاتۋعا اقىل ـ پاراسات جانە كۇش ـ قۋات قوسۋى كەرەك.

شى تايفىڭ، ديڭ جۇڭلي، ساي دافىڭ، حۋ چۇنحۋا، ۋاڭ دۇڭفىڭ، جياڭ شينجى، ۋاڭ گۋاڭچيان، جۋ يۇڭشين قاتارلىلار بىرىككەن گرۋپپا جيىنىنا قاتىناستى.