انار بۇلت \ شينجياڭ گازەتىنىڭ ٴتىلشىسى لي ياڭ 3 ـ ايدىڭ 6 ـ كۇنى بەيجيڭنەن حابارلايدى. شينجياڭدا تۇراتىن مەملەكەتتىك ساياسي كەڭەستىڭ مۇشەلەرى تاسقىنداعان ساياسي ىنتامەن مىندەت جاۋاپكەرشىلىگىن بەلسەنە اتقارىپ، ”مەملەكەتتىڭ زور ٴىسى“، ”بۇقارانىڭ كوكسەگەنى“ توڭىرەگىندە سىندارلى ۇسىنىس بەرىپ، تاماشا ٴادىس قاراستىرىپ، ناقتى شارا ۇسىندى. مەملەكەتتىك ساياسي كەڭەس 14 ـ كەزەكتى كوميتەتىنىڭ 3 ـ ماجىلىسىنە ۇسىنىس جوبا تاپسىرۋدىڭ ۋاقىت شەگى اياقتاعانعا دەيىن شينجياڭدا تۇراتىن مەملەكەتتىك ساياسي كەڭەستىڭ مۇشەلەرى ماجىلىسكە جيىنى 90 ۇسىنىس جوبا، 14 قوعامدىق جاعداي، حالىق رايى ينفورماتسياسىن تاپسىردى.

بيىل — ”14 ـ بەسجىلدىق“ جوبا اياقتالاتىن جىل، اۆتونوميالى رايون قۇرىلعاندىعىنىڭ 70 جىلدىعى، بيىلعى قىزمەتتى جاقسى ىستەۋدىڭ ماڭىزى زور، جاۋاپكەرشىلىگى اۋىر. شينجياڭدا تۇراتىن مەملەكەتتىك ساياسي كەڭەستىڭ مۇشەلەرى جاڭا داۋىردەگى پارتيانىڭ شينجياڭدى باسقارۋ جالپى جوباسىن دايەكتىلەندىرىپ، تياناقتاندىرىپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن ىلگەرىلەتۋ توڭىرەگىندە، ساياسي كەڭەستىڭ سيپاتى، ورنى، ٴوزىنىڭ قىزمەت سالاسى جانە كاسىپتىك ارتىقشىلىعى تۇرعىسىنان ۇسىنىستار قويۋعا باسا ٴمان بەرىپ، ٴبىر توپ جوعارى ساپالى ۇسىنىس جوبانى قالىپتاستىردى. ۇسىنىس جوبانىڭ مازمۇنى نازاردى مەملەكەتتىڭ دامۋ كەلەلى جاعدايىنا، شينجياڭ قىزمەتىن جاقسى ىستەۋگە شوعىرلاندىرىپ، ەكونوميكا، ساياسي، مادەنيەت، قوعام، ەكولوگيالىق وركەنيەت قۇرىلىسى سىندى 5 ۇلكەن سالانى قامتىدى، نازار اۋدارىلعان ماڭىزدى ٴتۇيىن شينجياڭنىڭ جاڭاشا ەنەرگيا جۇيەسى سىناق رايونىن قۇرۋىن قولداۋ، شينجياڭنىڭ جۇڭگو - ەۆروپا (ورتا ازيا) كەزەكشى پويەزىنىڭ جوعارى ساپالى دامۋىن ىلگەرىلەتۋ، شينجياڭ كومىرىنەن تازا، جوعارى ٴونىمدى پايدالانۋدى قولداۋ، شەكارا تۇرعىندارىنا قوسىمشا قاراجات بەرۋ ساياساتىن كەمەلدەندىرۋ، ساپالىلاندىرۋ، ورتا ازيانى بەتكە العان شينجياڭ ٴوڭىرى عىلىم ـ تەحنولوگيادا جاڭالىق اشۋ ورتالىعىن قۇرۋ، جەدەل جولداما، تاپسىرىسپەن تاماق جەتكىزۋ كاسىبنىڭ سۋلياۋمەن قوراپتاۋىن باسقارۋدى كۇشەيتۋ، ورتا، باتىس بولىكتەگى از ۇلتتار ٴوڭىرىنىڭ كاسىپتىك وقۋ ـ اعارتۋ قۇرىلىسىن كۇشەيتۋ، تاۋ، سۋ، ورمان، ەگىنجاي، كول، جايلىم، قۇمدى ٴبىر تۇلعالاندىرىپ قورعاۋدى جانە قالپىنا كەلتىرۋدى جوعارى ونىممەن ٴبىر تۇتاس جوسپارلاۋ، جايلىمداعى زياندى ورگانيزمدەردى قاداعالاۋ ـ تەكسەرۋ جانە ساقتانۋ ـ تىزگىندەۋدى كۇشەيتۋ سياقتى جاقتاردى قامتىپ، مۇشەلەردىڭ مەملەكەت ٴۇشىن مىندەت وتەۋ، حالىق ٴۇشىن جاۋاپكەرشىلىگىن ادا ەتۋ سۇيىسپەنشىلىگى مەن جاۋاپكەرشىلىك ارقالاۋىن تولىق بەينەلەدى.

ٴماجىلىستىڭ الدىندا شينجياڭدا تۇراتىن مەملەكەتتىك ساياسي كەڭەستىڭ مۇشەلەرى دامۋدى كوكەيىندە ساقتاپ، حالىق تۇرمىسىن كوڭىل تورىنە قويىپ، نەگىزگى تۇلعالىق رولدارىن بەلسەنە ساۋلەلەندىرىپ، ىشكەرىلەي تەكسەرۋ ـ زەرتتەۋ جۇرگىزىپ، كەڭ كولەمدە پىكىر ـ ۇسىنىس تىڭداپ، مىندەتتەرىن اناعۇرلىم ويداعىداي وتەپ، ۇسىنىس بەرۋگە تولىق دايىندىق كوردى.