تىلشىلەرىمىز حان شاشا، جاڭ چيڭحۋا، مىڭ شيا حابارلايدى. 1 - ايدىڭ 20 - كۇنى تۇستەن كەيىن وبلىستىق پارتكومنىڭ ورىنباسار شۋجيى، وبلىس باستىعى ەلشات تۇرسىنباي ۇلى ساياسي كەڭەس وبلىستىق 14 - كەزەكتى كوميتەتى 3 - ٴماجىلىسىنىڭ گرۋپپالار تالقىسىنا قاتىناسىپ، وقۋ - اعارتۋ، عىلىم - تەحنيكا سالاسى بىرلەسكەن گرۋپپاسىنداعى مۇشەلەردىڭ ۇسىنىس - پىكىرلەرىن تىڭداپ، ىلە وبلىسىنىڭ ەكونوميكاسى مەن قوعامىنىڭ جوعارى ساپالى دامۋ ۇلى جوسپارىن بىرگە اقىلداستى.

ٴماجىلىس زالىنداعى تالقى قىزۋ مەرەيگە شومدى، وبلىستىق ساياسي كەڭەستىڭ مۇشەلەرى ۇكىمەت قىزمەتىنەن باياندامانى ارقاۋ ەتىپ، بەلسەنە ٴسوز سويلەپ، ىشكەرىلەي كەڭەسىپ، پىكىر اۋىستىردى. گۋان فاڭفاڭ، مەھىراي ٴابدىقادىر، يىن شىڭ، نيە فاڭ، پىڭ جيان قاتارلى مۇشەلەر وزدەرىنىڭ قىزمەت امالياتىمەن ۇشتاستىرىپ، شارۋاشىلىق - ساۋدا ورتاسىن ساپالىلاندىرۋ، وقۋ - اعارتۋ رەفورماسى، عىلىم - تەحنيكادا جاڭالىق اشۋ سياقتى جاقتاردى ارقاۋ ەتىپ، اقىل - كەڭەس بەردى.

ەلشات تۇرسىنباي ۇلى مىنانى ٴبىلدىردى: وتكەن ٴبىر جىلدا بۇكىل وبلىس جوعارىدان تومەنگە دەيىن ورنىقتىلىق بارىسىندا ىلگەرىلەۋ سىندى قىزمەت نەگىزگى ارناسىنان جازباي، جاڭا دامۋ ارناسىمەن جەدەل توعىسىپ، جوعارى ساپالى دامۋدى تىڭعىلىقتى ىلگەرىلەتىپ، كاسىپ سالاسى قۇرىلىسىنىڭ دارەجەسىن جوعارىلاتىپ، ٴتۇيىندى رەفورمالاردا سۇبەلى تابىستارعا، حالىق تۇرمىسىن جاقسارتۋدا كورنەكتى ونىمدىلىككە قول جەتكىزىپ، قوعامدىق جالپى جاعداي ۇزدىكسىز ورنىقتى بولىپ، تۇتاس جىلداعى ەكونوميكالىق، قوعامدىق دامۋ نىساناسىن ٴبىرشاما جاقسى جۇزەگە اسىردىق.

وسى ٴبىر جىلدا ىلە وبلىسىنىڭ وقۋ - اعارتۋ ساپاسى ۇزدىكسىز جوعارىلاپ، قۇلجا قالالىق 3 - ورتا مەكتەبىن ماڭىزدى ٴتۇيىن ەتكەن نەگىزدىك وقۋ - اعارتۋ رەفورماسى بەلسەنە ىلگەرىلەتىلىپ، ىلە پەداگوگيكا داشۋەسىنىڭ ”جاڭا تەحنيكالىق پاندەر“ شۋەيۋان، فاكۋلتەتتەرى جەدەل قۇرىلىپ، كاسىپتىك وقۋ - اعارتۋدىڭ وقىتۋ ساپاسى ورنىقتى جوعارىلادى. عىلىم - تەحنيكادا جاڭالىق اشۋ جەدەل ىلگەرىلەتىلىپ، چۋاننيڭ بيو - تەحنيكاسى، شينتيان كومىر حيميا ونەركاسىبى سياقتى كاسىپورىندار سينتەزدىك بيولوگيا، حيميا ونەركاسىبى كاسىپ سالاسىن زەرتتەۋ ورنىن باستاماشىلدىقپەن قۇردى، كۇيتۇن قالاسى اۆتونوميالى وبلىستاعى تۇڭعىش اكادەميكتەردىڭ سەلبەسىپ جاڭالىق اشۋ ورتالىعىن قۇرىپ، تەحنيكالىق قامال الۋدى بىرلەسىپ ورىستەتىپ، ەل ىشىندەگى ماقتا ۇرىعىن قويىلتۋ ارقىلى بەلوك مانەرلەۋ سالاسىنداعى بوستىقتى تولتىردى، بۋرىلتوعاي اۋدانى تۇيە شارۋاشىلىعى ينجەنەرياسى تەحنيكالىق زەرتتەۋ ورتالىعى تەكسەرىپ وتكىزىپ الۋدان ٴوتتى... وسىنداي ناتيجەلەرگە قول جەتكىزۋىمىز قالىڭ ساياسي كەڭەس مۇشەلەرىنىڭ اقىل - كەڭەس بەرۋىنەن جانە قالتقىسىز ۇلەس قوسۋىنان ايرىلا المايدى.

ەلشات تۇرسىنباي ۇلى بىلاي دەپ باسا دارىپتەدى: ساياسي كەڭەس مۇشەلەرىنىڭ ساياسي دەڭگەيى جوعارى، ساياسي جاۋاپكەرشىلىگى كۇشتى، حالىققا سۇيىسپەنشىلىگى تەرەڭ، العا قويعان ۇسىنىس - پىكىرلەرى سىندارلى بولۋى كەرەك. قالىڭ ساياسي كەڭەس مۇشەلەرىنىڭ ىستەرىمىزدىڭ دامۋىنا، ٴار ۇلت حالقىنىڭ قۇت - ىرىسىنا وسكەلەڭ جاۋاپتى بولۋ پوزيتسياسىن ۇستانىپ، بەلسەنە اقىل - كەڭەس بەرىپ، ىلە وبلىسىنىڭ جوعارى ساپالى دامۋىنا اقىل - پاراساتى مەن كۇش - قۋاتىن ارناۋىن ٴۇمىت ەتەمىن. مۇشەلەر العا قويعان ۇسىنىس - پىكىرلەردى مۇقيات زەرتتەپ، ونى ۇكىمەت قىزمەتىنەن جاسالاتىن بايانداماعا تولىق قابىلداپ، ۇكىمەت قىزمەتىنەن جاسالاتىن باياندامانى اۆتونوميالى وبلىستىڭ دامۋ ٴىس جۇزىندىگىنە جانە ٴار ۇلت حالقىنىڭ تىلەگىنە اناعۇرلىم ۇيلەستىرىپ، بۇدان بىلايعى ىلەنىڭ دامۋ قىزمەتتەرىنە جەتەكشىلىك ەتۋگە اناعۇرلىم ٴتيىمدى ەتۋ كەرەك.

وبلىستىق ساياسي كەڭەس پارتيا باسشىلىق گرۋپپاسىنىڭ ورىنباسار شۋجيى، ٴتوراعاسى سەرجان ۇعىباي ۇلى مىنانى تالاپ ەتتى: بۇكىل وبلىستاعى ٴار دارەجەلى ساياسي كەڭەس ۇيىمدارى مەن قالىڭ ساياسي كەڭەس مۇشەلەرى باستان - اياق ”ەكى كەلەلى جاعدايدى“ كوكەيدە ساقتاپ، ”مەملەكەتتىڭ زور ٴىسىن“ ەستە بەرىك ساقتاپ، ساياسي كەڭەستىڭ ارناۋلى كەڭەس رولىن كورنەكتى ساۋلەلەندىرىپ، بەلسەنە ”تاقىرىپ تاڭداپ“، ”ماسەلەنى“ دالمە - ٴدال بورشالاپ، ”ماسەلەنى“ ٴونىمدى شەشىپ، كەڭەسۋ تەبىنىن ارتتىرىپ، كەڭەسۋ تۇعىرىن نەگىزگى ساتىعا دەيىن كەڭەيتىپ، ٴتىپتى دە كوپ نەگىزگى ساتى بۇقاراسى مەن قوعامداعى ٴار سالا قايراتكەرلەرىن دەموكراتيالىق كەڭەسكە قاتىناستىرىپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە - ٴدال، جاپپاي دايەكتىلەندىرۋگە، تياناقتاندىرۋعا بىرىككەن كۇش قوسىپ، كۇش - قۋات ۇستەۋى كەرەك. جۇڭگو ۇلگىسىندەگى وسىزامانداندىرۋدى ىلگەرىلەتۋ بارىسىندا جاڭا ورايدى يگەرىپ، جاڭا بورىش ارقالاپ، تىڭ ىسكەرلىك كورسەتىپ، ٴتۇرلى ىستەردە ۇزدىكسىز جاڭا جاعداي اشۋ كەرەك.

وبلىستىق ساياسي كەڭەس پارتيا باسشىلىق گرۋپپاسىنىڭ مۇشەسى، ورىنباسار ٴتوراعاسى جوۋ ليشين گرۋپپالار تالقى  جيىنىنا قاتىناستى.