ىلە وبلىستىق 15 - كەزەكتى حالىق قۇرىلتايىنىڭ 3 - ٴماجىلىسى جەڭىسپەن جابىلدى
ياڭ شيۋلي ٴماجىلىستى باسقاردى
تىلشىلەرىمىز ما چىڭلۋ، لي يافىڭ، ليۋ چىڭگاڭ، سۇن ي - نان حابارلايدى. 1 - ايدىڭ 23 - كۇنى تۇستەن بۇرىن، ىلە قازاق اۆتونوميالى وبلىستىق 15 - كەزەكتى حالىق قۇرىلتايىنىڭ 3 - ٴماجىلىسى الدىن الا بەلگىلەنگەن ٴتۇرلى مىندەتتەرىن تابىسپەن ورىنداعاننان كەيىن ىلە وبلىستىق مادەنيەت - كوركەمونەر قيمىل ورتالىعىندا جەڭىسپەن جابىلدى.
سول كۇنگى 3 - ماجىلىسكە قاتىناسۋعا ٴتيىستى ۋاكىل 448 ادام، قاتىناسقان ۋاكىل 394 ادام، زاڭدا بەلگىلەنگەن ادام سانىنا ۇيلەسەدى.
ٴماجىلىستىڭ اتقارۋشى ٴتوراعالارى ياڭ شيۋلي، جياۋ ي - مين، نياز اشىم، رازيا ابليز، اقجول انەش ۇلى، ابليكىم نۇرانبەك، سۇن پىڭ، سۇن حۇي، جاڭارسىن نۇراش ۇلى ٴتوراعالار مىنبەسىنىڭ الدىڭعى قاتارىنان ورىن الدى. ياڭ شيۋلي ٴماجىلىستى باسقاردى.
ەلشات تۇرسىنباي ۇلى، حۋ كايجياڭ، سەرجان ۇعىباي ۇلى، ٴسابيت قازەز ۇلى، لو چيۇڭ - ي، جياڭ حايجۇن، مامەتجان داۋىت، لي رۇڭنيان، ياڭ شينپيڭ، قايرات اشىك ۇلى، لي ۋي قاتارلى باسشىلار، وبلىستىق سوت مەكەمەسىنىڭ، وبلىستىق پروكۋراتۋرانىڭ نەگىزگى جاۋاپتى جولداستارى جانە ٴماجىلىس ٴتوراعالار القاسىنىڭ باسقا دا مۇشەلەرى ٴتوراعالار مىنبەسىنەن ورىن الدى.
ٴماجىلىس باس بەلەت باقىلاۋشىنىڭ، بەلەت باقىلاۋشىلاردىڭ ەسىمدىگىن داۋىسقا سالىپ ماقۇلدادى. بەلەت تاستاۋ اياقتاعاننان كەيىن، باس بەلەت باقىلاۋشى بەلەت ەسەپتەۋ ناتيجەسىن مالىمدەدى. جياۋ ي - مين اۆتونوميالى وبلىستىق 15 - كەزەكتى حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىلىگىنە، لي ليشين، گو فىڭ، جياڭميڭ نامسۋرۇڭ اۆتونوميالى وبلىستىق 15 - كەزەكتى حالىق قۇرىلتايى تۇراقتى كوميتەتىنىڭ مۇشەلىگىنە، ۋاڭ شينجۇن اۆتونوميالى وبلىستىق باقىلاۋ - تەكسەرۋ كوميتەتىنىڭ مەڭگەرۋشىلىگىنە سايلاندى.
ٴماجىلىس ۇكىمەت قىزمەتىنەن بايانداما جونىندەگى قاۋلىنى داۋىسقا سالىپ ماقۇلدادى؛ 2023 - جىلعى اۆتونوميالى وبلىستىڭ حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ احۋالى جانە 2024 - جىلعى اۆتونوميالى وبلىستىڭ حالىق شارۋاشىلىعى مەن قوعامدىق دامۋ جوسپارى جونىندەگى قاۋلىنى داۋىسقا سالىپ ماقۇلدادى؛ 2023 - جىلعى اۆتونوميالى وبلىستىڭ مەجە ەسەبىنىڭ اتقارىلۋ احۋالى جانە 2024 - جىلعى اۆتونوميالى وبلىستىڭ مەجە ەسەبى جونىندەگى قاۋلىنى داۋىسقا سالىپ ماقۇلدادى؛ اۆتونوميالى وبلىستىق حالىق قۇرىلتايى تۇراقتى كوميتەتىنىڭ، اۆتونوميالى رايوندىق جوعارى حالىق سوتى مەكەمەسى ىلە قازاق اۆتونوميالى وبلىستىق بولىمشەسىنىڭ، اۆتونوميالى وبلىستىق حالىق پروكۋراتۋراسىنىڭ قىزمەت بايانداماسى جونىندەگى قاۋلىنى داۋىسقا سالىپ ماقۇلدادى؛ «ىلە قازاق اۆتونوميالى وبلىستىق حالىق قۇرىلتايىنىڭ ٴىس قاراۋ ەرەجەسىن» داۋىسقا سالىپ ماقۇلدادى؛ «شاۋەشەك قالاسىنىڭ شەكارالىق ەكونوميكالىق سەلبەستىك رايونىن باسقارۋ ەرەجەسىن» كۇشىنەن قالدىرۋ جونىندەگى ۇيعارىمدى داۋىسقا سالدى. ماجىلىستە جاڭادان سايلانعان اۆتونوميالى وبلىستىق 15 - كەزەكتى حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى، مۇشەلەرى نەگىزگى زاڭعا سەرت بەردى.
ٴماجىلىس ٴتۇرلى كۇن تارتىپتەرىن ورىنداعاننان كەيىن ياڭ شيۋلي ٴسوز سويلەدى. ول بىلاي دەدى: ىلە قازاق اۆتونوميالى وبلىستىق 15 ـ كەزەكتى حالىق قۇرىلتايىنىڭ 3 ـ ٴماجىلىسى ٴتۇرلى كۇن تارتىپتەرىن تابىسپەن ورىندادى. ٴماجىلىس كەزىندە ۋاكىلدەر وسكەلەڭ ساياسي سانالىلىقپەن جانە تاماشا رۋحاني بەينەمەن نەگىزگى زاڭ مەن زاڭدا جۇكتەگەن مىندەتىن ادالدىقپەن اتقارىپ، ٴتۇرلى قىزمەت باياندامالارى مەن قاۋلىلاردى، ۇيعارىمداردى مۇقيات تىڭداپ جانە قاراپ ماقۇلداپ، اۆتونوميالى وبلىستىڭ رەفورما، دامۋ، ورنىقتىلىق ىستەرىنە جانە حالىق بۇقاراسىنىڭ ٴتول مۇددەسىنە ساياتىن كەلەلى ماسەلەلەر جونىندە كوپتەگەن قۇندى پىكىرلەر مەن ۇسىنىستاردى العا قويدى؛ اۆتونوميالى وبلىستىق 15 - كەزەكتى حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسىن، مۇشەلەرىن جانە وبلىستىق باقىلاۋ - تەكسەرۋ كوميتەتىنىڭ مەڭگەرۋشىسىن تولىقتاپ سايلادى. ٴماجىلىستىڭ اشىلۋى وتە تابىستى بولدى، تۋدى بيىك ۇستاعان، ىنتىماقتى، دەموكراتيالى ٴماجىلىس، شىندىققا ۇمتىلىپ، ناقتى ىستەگەن، ٴورىس اشا ەكپىندەي ىلگەرىلەگەن ٴماجىلىس بولدى، بۇل بۇكىل وبلىستاعى ٴار ۇلت كادرلارى مەن بۇقاراسىن اناعۇرلىم اسقاق جىگەرمەن، اناعۇرلىم پارمەندى شارالارمەن، اناعۇرلىم ناقتى ستيلمەن ىلەنىڭ رەفورما، دامۋ، ورنىقتىلىق ىستەرىنىڭ تاعى دا تىڭ ساتىعا كوتەرىلۋىن كۇش سالا ىلگەرىلەتۋگە شابىتتاندىراتىندىعى جانە جىگەرلەندىرەتىندىگى داۋسىز.
ياڭ شيۋلي مىنالاردى اتاپ كورسەتتى: بيىل جاڭا جۇڭگو قۇرىلعاندىعىنىڭ 75 جىلدىعى، ”14 ـ بەسجىلدىق“ جوبانىڭ نىسانا - مىندەتتەرىن جۇزەگە اسىرۋداعى شەشۋشى جىل، سونداي ـ اق اۆتونوميالى وبلىس قۇرىلعاندىعىنىڭ 70 جىلدىعى، بيىلعى قىزمەتتەردى ويداعىداي ىستەۋدىڭ ماڭىزى زور. بۇكىل وبلىستاعى ٴار دارەجەلى حالىق قۇرىلتايى ۇيىمدارى مەن حالىق قۇرىلتايى ۋاكىلدەرى دۇرىس ساياسي بەتالىسقا تاباندى بولىپ، پارتيانىڭ باسشىلىعىن سانالى تۇردە حالىق قۇرىلتايىنىڭ زاڭ بويىنشا مىندەت اتقارۋىنىڭ جالپى بارىسىنا ٴسىڭىرىپ، حالىق قۇرىلتايى قىزمەتىنىڭ ٴار جاعىندا تياناقتاندىرىپ، حالىق قۇرىلتايى قىزمەتىنىڭ باستان ـ اياق پارتكومنىڭ قۋاتتاماسىمەن، ماقساتىمەن ىقپالداستىعىنا، ىشكەرىلەي توعىسۋىنا كەپىلدىك ەتىپ، پارتيا ورتالىق كوميتەتىنىڭ شەشىمدەرى مەن ورنالاستىرۋلارىن جانە اۆتونوميالى رايوندىق پارتكومنىڭ قىزمەت تالاپتارىن شىن مانىندە بۇكىل وبلىستاعى ٴار ۇلت حالقىنىڭ ورتاق قالاۋىنا جانە ٴىس جۇزىندىك ارەكەتىنە اينالدىرىپ، ىلەنىڭ جوعارى ساپالى دامۋىن ىلگەرىلەتۋگە تىڭ دا اناعۇرلىم زور ۇلەس قوسۋ كەرەك. تۋى ايقىن تۇردە ساياسيدى دارىپتەپ، شي جينپيڭ جاڭا ٴداۋىر جۇڭگوشا سوتسياليزم يدەياسىمەن زەيىن ـ زەردەنى ۇيىستىرىپ، رۋح سومداۋدا بۇلجىماستان تاباندى بولىپ، پارتكومنىڭ ورنالاستىرۋلارى مەن تالاپتارى قاي جەردە بولسا حالىق قۇرىلتايى قىزمەتى دە سول جەردە بولۋدى، فۋنكتسيالىق رولىن سول جەردە ساۋلەلەندىرۋدى ورىنداۋ كەرەك. ىرىقتىلىقپەن جاۋاپكەرشىلىك ارقالاپ، جاۋاپكەرشىلىكتى ادا ەتىپ، وزەكتى ارقاۋ ەتۋدە، جالپى جاعدايعا قىزمەت ەتۋدە باستان ـ اياق تاباندى بولىپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن حالىق قۇرىلتايى قىزمەتىنىڭ ٴار جاقتارىندا، ٴارقايسى بۋىندارىندا شىنايى تياناقتاندىرۋ كەرەك. قابىلەتتى جوعارىلاتىپ، وبراز ورناتىپ، جاڭا داۋىردەگى حالىق قۇرىلتايى قىزمەتى مەن ۋاكىلدەر قىزمەتىنىڭ جاڭا ەرەكشەلىكتەرىن، جاڭا زاڭدىلىقتارىن دالمە - ٴدال يگەرىپ، پارتكوم مەن ۇكىمەتتىڭ حالىق بۇقاراسىمەن بايلانىس جاساۋداعى ناعىز ”جۇرەكتەستەر كوپىرى“ بولۋ كەرەك.
ياڭ شيۋلي مىنالاردى باسا دارىپتەدى: بۇكىل وبلىستاعى ٴار دارەجەلى پارتكومدار حالىق قۇرىلتايىنىڭ زاڭ شىعارۋ ۇقىعىن، باقىلاۋ ۇقىعىن، شەشىم جاساۋ ۇقىعىن، مىندەتكە تاعايىنداۋ، مىندەتىنەن قالدىرۋ ۇقىعىن زاڭ بويىنشا جۇرگىزۋىن بار كۇشپەن قولداپ جانە وعان كەپىلدىك ەتىپ، حالىق قۇرىلتايى ۋاكىلدەرىنىڭ رولىن اناعۇرلىم ويداعىداي ساۋلەلەندىرۋ كەرەك. ۇكىمەت، ٴتارتىپ تەكسەرۋ، باقىلاۋ - تەكسەرۋ كوميتەتى، سوت، پروكۋراتۋرا مەكەمەلەرى حالىق قۇرىلتايىنىڭ باقىلاۋىنا دۇرىس مامىلەدە بولىپ، ونى سانالىلىقپەن قابىلداپ، وعان بەلسەنە سايكەسىپ، حالىق قۇرىلتايىنىڭ قاۋلىلارى مەن ۇيعارىمدارىن مۇقيات اتقارىپ، حالىق قۇرىلتايىنا زاڭ بويىنشا جاۋاپتى بولىپ جانە قىزمەتىنەن مالىمەت بەرىپ، زاڭ بويىنشا اكىمشىلىك جۇرگىزۋ جانە ٴادىليادا ٴادىل بولۋ دەڭگەيىن ۇزدىكسىز جوعارىلاتۋ كەرەك. ٴار دارەجەلى، ٴارقايسى تاراۋلار، ورىندار حالىق قۇرىلتايىنىڭ قىزمەت ۇقىعىن زاڭ بويىنشا جۇرگىزۋىن بەلسەنە قولداپ، ۋاكىلدەردىڭ مىندەت وتەۋىنە ىرىقتىلىقپەن ٴتيىمدى شارت ـ جاعداي ازىرلەپ، حالىق قۇرىلتايى قىزمەتىنە بەرىك قامتاماسىزدىق ازىرلەۋ كەرەك. جاڭا داۋىردەگى حالىق قۇرىلتايى قىزمەتىن ويداعىداي ىستەۋدىڭ جاۋاپكەرشىلىگى اۋىر، بورىشى داڭقتى، شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە - ٴدال، جاپپاي دايەكتىلەندىرىپ، زاڭ بويىنشا مىندەت اتقارىپ، ناقتى ىستەپ، جاۋاپكەرشىلىك ارقالاپ، ىنتىماقتاسا كۇرەس جاساپ، حالىققا قىزمەت ەتىپ، ىلەنىڭ جوعارى ساپالى دامۋىن ىلگەرىلەتۋگە، كورىكتى ىلەنى اناعۇرلىم ويداعىداي قۇرۋعا حالىق قۇرىلتايىنىڭ اقىل ـ پاراساتى مەن كۇش ـ قۋاتىن ارناۋ كەرەك!
سۋرەتتە: ٴماجىلىس الاڭى ليۋ چىڭگاڭ فوتوسى