تىلشىلەرىمىز مىڭ شيا، لي جيان، شاۋكەت
كۇنەس وزەنىن بويلاي كوسىلىپ جاتقان مەملەكەتتىك 5A دارەجەلى ايگىلى كورىنىس رايونى − نارات ساحاراسى. بۇل ارانىڭ جەر جاعدايى كۇدىرلى بولىپ، كوكوراي شالعىنى، جوڭكىلە اققان وزەندەرىمەن كوركى كوز سۇرىندىرەدى. نارات ساحاراسى − جايىلىم، ورمان، وزەن اڭعارى، سالالى تاۋلاردان قۇرالعان جاراتىلىستىق كورىنىس رايونى، مۇنداعى كوز جەتكىسىز جاسىل مانات دالا، مۇز قۇرسانعان قارلى شىڭ سياقتىلاردان ٴتورت ماۋسىمنىڭ كەلبەتىن تاماشالاي الاسىز. سوڭعى جىلدارى ىلە وزەنىنىڭ شىعىس وڭتۇستىگىندەگى كۇنەس وزەنى جاعاسىنداعى وسى تاڭعاجايىپ ساحارا جەر - جەردەگى ساياحاتشىلاردى باۋراپ، تۇتاس اۋداننىڭ ساياحات كاسىبىنىڭ ساپاسىن جوعارىلاتىپ، دارەجەسىن ٴوسىرىپ، كەرەمەتتەر جاراتىپ، ىلە قازاق اۆتونوميالى وبلىسىنىڭ ۇدەرە العا تارتقان 70 جىلدىعىنا تاماشا كورىك قوستى.
كوركەم تاۋ - وزەندەرىمەن مەملەكەت دارەجەلى كوپتەگەن ”تانىسقى“ قالىپتاستىردى
”ەرتەدە بۇل ارا كەڭ كوسىلگەن جايىلىم بولىپ، تابيعي قالىپتاسقان كورىنىس ٴوڭىرى بولاتىن - دى. نەشە ون جىلدىق دامۋ ارقىلى وسىناۋ جايىلىمنىڭ وسىنشاما قۇدىرەتتى كۇشكە يە بولىپ، ٴار جىلى ەل ٴىشى - سىرتىنان نەشە ميلليون ادامدى ساياحاتتاۋعا باۋرايتىنىن كىم ويلاعان“. ىلە قازاق اۆتونوميالى وبلىسىنىڭ نارات ساياحات كورىنىس رايونىن باسقارۋ كوميتەتى پارتكومىنىڭ مۇشەسى ۋاڭ سۋۋىن ”شۇعىلالى 70 جىل. ىلە وزەنىن بويلاپ ٴجۇرۋ“ اتىنداعى ىلە توعىسپالى مەديا ورتالىعىنىڭ تىلشىلىك جاساۋ، حابارلاۋ قيمىلى گرۋپپاسىنداعىلارعا وسىلاي تانىستىردى.
نارات جايلاۋى كۇنەس اۋدانىنىڭ نارات قالاشىعىنا قاراستى. 1990 - جىلى تۇڭعىش ساياحات قابىلداۋ ورنى − نارات ساحارا ساياحات ورتالىعى قۇرىلسا، 1999 - جىلى نارات كورىنىس رايونى قۇرىلدى؛ 2002 - جىلى كورىنىس رايونى ەسىك بەلەتىن ساتا باستادى، سول كەزدە ٴبىر ەسىك بەلەتى 30 يۋان بولىپ، تۇتاس جىلدىق ەسىك بەلەت كىرىسى 300 مىڭ يۋاننان اساتىن.
2011 - جىلى نارات ساياحات كورىنىس رايونى مەملەكەتتىك 5A دارەجەلى كورىنىس رايونى بولۋعا ٴوتىنىش بەردى. وسىدان كەيىن «شينجياڭ نارات ساياحات رايونىنىڭ جالپى تۇلعالىق جوباسى (2015 - 2030) » جاريالاندى. ساياحات جوباسىنىڭ كورىنىس ٴوڭىرىنىڭ ماڭىزدى تىرەكتىك نەگىزىنە اينالۋىنا ىلەسە، نارات كورىنىس ٴوڭىرى تەز دامۋ ارناسىنا ٴتۇستى.
ۋاڭ سۋۋىن بىلاي دەپ تانىستىردى: ساياحاتشىلار بۇرىنعىداي تەك عانا كورىنىس كورىپ، سۋرەتكە تۇسۋدەن بۇگىنگى كۇندە اتقا ٴمىنىپ، سالت - سانا ويىندارىن تاماشالايتىن، ميكرو كينو - تەلەۆيزيا قالاشىعىن، ٴۇيسىن بايىرعى كوشەسىن ساياحاتتاۋ سياقتى ۇلتتىق سالت - سانا قيمىلدارىن سەزىنە الاتىن بولدى؛ بۇرىنعى تەك سەيىل - سەرۋەن كولىگىنە وتىرۋدان قازىرگى جوعارى دەڭگەيلى تىك ۇشاققا وتىرۋ، سۋدا قالىقتاۋ، موتوسيكىلمەن قارلى دالانى سەيىلدەۋگە دەيىن؛ تەك جاز بەن كۇزدىڭ كورىنىسىن عانا كورۋدەن شاڭعى تەبۋگە، قارلى تاۋدى تاماشالاۋعا، اراسانعا تۇسۋگە دەيىن ۇلاسىپ، نارات كورىنىس ٴوڭىرىنىڭ ساياحات كاسىبىن بارعان سايىن بايىتتى.
2016 - جىلى نارات كورىنىس رايونى اۆتونوميالى رايون دارەجەلى ساياحات دەمالىس رايونى بولىپ قۇرىلدى، بۇل ونىڭ جالاڭ تاماشالاۋ كورىنىس رايونىنان سەيىل - سەرۋەن، دەمالىس، كوڭىل اشۋ ٴبىر تۇلعالانعان جالپىلىق ساياحات دەمالىس رايونىنا اينالعاندىعىن كورسەتەدى. 2023 - جىلى نارات قار شاڭعى الاڭى رەسمي ىسكە قوسىلدى، سونىمەن نارات جالاڭ كورىنىس تاماشالاۋ رايونىنان دەمالىس رايونىنا اينالۋداي تاماشا بۇرىلىستى جۇزەگە اسىردى.
سوڭعى جىلدارى نارات كورىنىس ٴوڭىرى جالپى نەشە ميلليارد يۋان قارجى قوسىپ، تيانجيەتاي اسپالى جولى، جينليڭ ساياجايى، قايىڭدى ساي قار شاڭعى الاڭى سياقتى ٴبىر توپ جوعارى ساپالى مادەنيەت - ساياحات نىساندارىن، ٴۇيسىن بايىرعى كوشەسى، ٴۇيسىن بايىرعى جۇرتى كينو - تەلەۆيزيا قالاسى سياقتى مادەنيەت - ساياحاتتى توعىستىرۋ نىساندارىن سالىپ، اسقار تاۋدا شاڭعى تەبۋ، اراساندا كۇتىنۋ، قايىقپەن قالقۋ سياقتى ورتا، جوعارى دەڭگەيلى كوڭىل اشۋ نىساندارىنان 60 نەشە ٴتۇرىن اشتى. نارات كورىنىس ٴوڭىرى ىلگەرىندى - كەيىندى مەملەكەت دارەجەلى ساياحاتقا قىزمەت وتەۋدى ولشەمدەندىرۋدەن ۇلگى كورسەتەتىن كورىنىس ٴوڭىرى، مەملەكەت دارەجەلى وركەنيەتتى ساياحاتتان ۇلگى كورسەتەتىن ورىن، شينجياڭداعى مەملەكەت دارەجەلى تۇڭعىش ساياحات دەمالىس ٴوڭىرى سياقتى كوپتەگەن مەملەكەت دارەجەلى داڭقتارعا يە بولدى.
ىلە وبلىسىنىڭ ”دۇنيە جۇزىلىك دەڭگەيدەگى ساياحات نىسانالى جەر قۇرۋ، 100 ميلليارد يۋاندىق ساياحات كاسىبىن تۇلعالاۋ“ نىساناسىن ارقاۋ ەتىپ، نارات كورىنىس رايونى نەگىزدىك قۇرىلعى قۇرىلىسىن كۇشەيتۋ، قىزمەت وتەۋ قۇرىلعىلارىن كەمەلدەندىرۋ، قىزمەت وتەۋ ساپاسىن جوعارىلاتۋ سياقتى جاقتاردا ۇزدىكسىز كۇش سالىپ، ساياحاتتىڭ كوتەرىمدىلىك قۋاتىن كورنەكتى ارتتىرىپ، ساياحاتقا قىزمەت وتەۋ قۋاتىن بارىنشا جوعارىلاتىپ، ساياحاتشىلاردى قابىلداۋ مولشەرىن ەسەلەپ ارتتىردى. 2023 - جىلى نارات كورىنىس ٴوڭىرى 2 ميلليون 450 مىڭ ادام - رەتتەن استام ساياحاتشى قابىلداپ، ساياحات كىرىسىن 2 ميلليارد 592 ميلليون يۋانعا جەتكىزدى. بيىل 8 - ايدىڭ 27 - كۇنىنە دەيىن، نارات كورىنىس ٴوڭىرى جالپى 3 ميلليون 230 مىڭ ادام - رەت ساياحاتشى قابىلداعان.
باستاماشى كورىنىس ٴوڭىرى تۇتاس اۋداننىڭ ساياحات كاسىبىنىڭ قاۋىرت دامۋىن جەبەدى
نارات كورىنىس وڭىرىندە ”ٴتورت ماۋسىمدا بىردەي ساياحاتتاۋ“ سىندى ساياحات جاڭا جاعدايى بىرتىندەپ قالىپتاسىپ، ساياحات كاسىبىنىڭ ”ٴبىر كاسىپتى كوركەيتۋ سان كاسىپتى گۇلدەندىرەدى“ دەگەن جەتەكشىلىك رولى كۇن سايىن كورنەكتىلەنە ٴتۇستى. 2023 - جىلى نارات كورىنىس رايونىنىڭ جەبەۋىندە، كۇنەس اۋدانىنىڭ ساياحات كاسىبى 10 ميلليارد يۋاندىق وتكەلدەن ٴوتىپ، ىلە وبلىسىنىڭ 100 ميلليارد يۋاندىق ساياحات كاسىبى نىساناسىن قالىپتاستىرۋىنا ماڭىزدى تىرەك ازىرلەدى.
2011 - جىلى كۇنەس اۋداندىق پارتكوم مەن ۇكىمەتتىڭ، شينجياڭعا باعىتتامالى كومەكتەسۋ كەڭسەسىنىڭ جانە نارات كورىنىس رايونىن باسقارۋ كوميتەتىنىڭ بىرگە قۇلشىنۋىندا، اراسان قىستاعى سالت - سانا مادەنيەت ساياحات كورىنىس ٴتۇيىنى − قازاق 1 - قىستاعى بولىپ قۇرىلدى، ونداعى قازاقتىڭ قويۋ ۇلتتىق سالت - ساناسى سىرت جەرلەردەن كەلگەن ساياحاتشىلاردىڭ قىزۋ قارسى الۋىنا يە بولدى.
اراسان قىستاعى قىستاق تۇرعىندار كوميتەتىنىڭ مەڭگەرۋشىسى سالتانات سايدىكەرىم ۇلى بىلاي دەپ تانىستىردى: بۇرىن قىستاعىمىزداعى تۇرعىندار تەك جالاڭ مال باعۋمەن شۇعىلداناتىندىقتان، كىرىسى شەكتى بولىپ كەلگەن. قازىر بۇكىل قىستاقتاعى %70 تۇرعىن نارات كورىنىس رايونىن توڭىرەكتەي وتىرىپ ساياحاتتىق قىزمەت وتەۋ كاسىبىمەن شۇعىلدانعاندىقتان، بىلتىر جان باسىندىق كىرىسى 26 مىڭ يۋانعا جەتىپ، 2011 - جىلداعىدان ەكى ەسە ارتتى.
نارات قالاشىعى ورايدى مىقتى يگەرىپ، كورىنىس رايونى قۇرىلىسى مەن قالا قۇرىلىسى ٴبىر تۇلعالانعان تۇتاس وڭىرلىك ساياحاتتى بەلسەنە قالىپتاستىردى. بيىل نارات قالاشىعى ٴارقايسى قىستاقتىڭ (الەۋمەتتىك اۋماق) بوس تۇرعان جەرىنەن، قورا - جاي بايلىعىنان تولىق پايدالانىپ، ٴيىنجار قىستاعىنىڭ اۋىل - قىستاق ساياحاتى حالىقتىق تۇسەلحانا نىسانىن، كوربۇلاق قىستاعىنىڭ ساياحات حالىقتىق تۇسەلحانا نىسانىن، بۇقارالىق دالادا تۇنەۋ لاگەرى قۇرىلىسىن قولداپ، پايدالانىلماعان بايلىقتارىن كادەگە جاراتىپ، قىستاقتىڭ كوللەكتيۆ كىرىسىن ارتتىردى.
كۇنەس اۋدانى نارات كورىنىس رايونىنىڭ ماركاسىن وزەك ەتىپ، جاپپاي ورنالاستىرىلعان، ايگىلى ماركا توعىسقان ساياحاتتى دامىتۋ كەڭىستىگىن قالىپتاستىرىپ، نارات قالاشىعىنىڭ ساۋىقتىرۋ - كۇتىمدەۋ ساياحاتى نىسانى، كەڭسۋ قالاشىعى سۋىق سۋ بالىعى، تاڭقۋراي سياقتى سەيىل ـ سەرۋەن اۋىل شارۋاشىلىعى، المالى قالاشىعىنىڭ اۋىل - قىستاق سەيىل - سەرۋەن ساياحاتى، سوربۇلاق قالاشىعىنىڭ اراق مادەنيەتى ونەركاسىپ ساياحاتى سياقتىلاردى سالىپ، كوپ جاقتى تىرەكتى ساياحات جاعدايىن قالىپتاستىرىپ، تۇتاس اۋداننىڭ ساياحات كاسىبىنىڭ قاۋىرت دامۋىنا جەتەكشىلىك ەتتى.
2023 - جىلى كۇنەس اۋدانى ەل ٴىشى ساياحاتشىلارىنان جيىنى 17 ميلليون 106 مىڭ 900 ادام - رەت قابىلداعان، بۇل سايكەس مەزگىلدەگىدەن %148.51 ارتقان؛ ساياحات كىرىسى 10 ميلليارد 51 ميلليون يۋانعا جەتىپ، سايكەس مەزگىلدەگىدەن %173.47 ارتقان، ساياحات ەكونوميكاسى تۇڭعىش رەت 10 ميلليارد يۋاندىق وتكەلدەن ٴوتىپ، دامۋ تەبىنى ٴتىپتى دە ارتا تۇسكەن. بيىل قاڭتاردان ماۋسىمعا دەيىن كۇنەس اۋدانى جيىنى 7 ميلليون 691 مىڭ 400 ساياحاتشى قابىلداپ، ساياحات كىرىسىن 5 ميلليارد 78 ميلليون يۋانعا جەتكىزگەن، اۋدان بويىنشا تۇسەلحاناعا 803 مىڭ 300 ادام قونىپ، ساياحات ارقىلى 14 مىڭ ادام جۇمىسقا ورنالاسقان.
جايىلىم بايلىعىنا سۇيەنىپ، ماۋسىمدىق شەكتەمەنى بۇزىپ، نەگىزدىك ساياحات دەمالىس رايونىن قۇرىپ، ساياحاتشىلاردىڭ تەرەڭ سەزىنۋىنە ٴتيىمدى دەمالىس ساياحاتىن دامىتىپ، نارات ساحاراسىنىڭ سەيىل - سەرۋەن تيپىندەگى كورىنىس رايونى تىڭ دامۋ جولىنا ٴتۇستى. وسىلايشا توعىسپالى ىقپالداستىق ارقىلى تۇتاس اۋداننىڭ كاسىپ سالاسىنىڭ دامۋىن شارپىعان تۇتاس وڭىرلىك ساياحاتتىڭ جاڭا كارتيناسىن سىزىپ، كوركەم كۇنەستىڭ اسەم كەلبەتىن ايگىلەي ٴتۇستى.
نارات جايلاۋىنان اعىپ وتكەن كۇنەس وزەنى. لي جيان فوتوسى
قازاقتىڭ سالت - سانا مادەنيەت ساياحات كورىنىس ٴتۇيىنى − قازاق 1 - قىستاعى. لي جيان فوتوسى
نارات كورىنىس رايونىنىڭ كەز كەلگەن جەرىنەن كوزايىم بولاتىن كونسەرت ويىندارى. لي جيان فوتوسى
نارات جايلاۋىندا ات ٴمىنىپ سەيىلدەگەن ساياحاتشىلار. لي جيان فوتوسى