جۇڭگو (شينجياڭ) ەركىن ساۋدا سىناق رايونى قورعاس اۋماعى كەشە ماڭدايشالىق استى 

12 - ايدىڭ 5 - كۇنى جۇڭگو (شينجياڭ) ەركىن ساۋدا سىناق رايونى قورعاس اۋماعىنىڭ ماڭدايشالىق اسۋ سالتى قورعاس قالاسىندا سالتاناتپەن وتكىزىلدى.

  جاڭ چيڭحۋا فوتوسى

تىلشىلەرىمىز حۋاڭ جيڭ، ما چىڭلۋ، سۇن ي - نان، جاڭ چيڭحۋا، لۋ جۇڭ حابارلايدى. 12 ـ ايدىڭ 5 ـ كۇنى جۇڭگو (شينجياڭ) ەركىن ساۋدا سىناق رايونى قورعاس اۋماعى ماڭدايشالىق اسۋ سالتىن وتكىزدى. ىلە وبلىستىق پارتكومنىڭ شۋجيى ياڭ شيۋلي، اۆتونوميالى رايوندىق ساۋدا ىستەرى مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى ليۋ بو جۇڭگو (شينجياڭ) ەركىن ساۋدا سىناق رايونى قورعاس اۋماعىنا ماڭدايشالىق استى.

ليۋ بو اۆتونوميالى رايوندىق ساۋدا ىستەرى مەڭگەرمەسى اتىنان قورعاس اۋماعىنىڭ ماڭدايشالىق اسۋ سالتىنىڭ ٴساتتى وتكىزىلگەندىگىن قۇتتىقتادى. ليۋ بو بىلاي دەدى: قورعاس اۋماعى ەلىمىزدىڭ باتىس سولتۇستىك رايونىندا قۇرىلعان شەكارا اتتاعان تۇڭعىش ەركىن ساۋدا سىناق رايونى رەتىندە، وڭىرلىك باسىمدىعى وزگەشە، ساياسات باسىمدىعى ايقىن، ەسىك اشۋ باسىمدىعى كورنەكتى. قورعاستىڭ ەركىن ساۋدا سىناق رايونىن قۇرۋدى وراي ەتىپ، تاريحي ورايدى مىقتى يگەرىپ، تاريحي بورىشتى باتىلدىقپەن ارقالاپ، پارمەندى قۇرىلىم قۇرىپ، قورعاس اۋماعى قۇرىلىسىنىڭ اتقارۋ جوباسىن جوعارى ولشەممەن،  جوعارى ساپامەن جاساپ، يدەيانى ونان ارى ازات ەتىپ، ٴورىس اشا جاڭالىق جاراتىپ، ”باتىلدىقپەن قامال الىپ، باتىلدىقپەن سىناق جۇرگىزىپ، دەربەس رەفورما جاساپ“، بازارلانعان، زاڭمەن باسقارىلاتىن، حالىقارالانعان شارۋاشىلىق - ساۋدا ورتاسىن قۇلشىنا قالىپتاستىرۋىن؛ ەل ٴىشى جانە حالىقارا سىندى قوس اينالىممەن ىرىقتى تۇردە توعىسىپ، قورعاس اۋماعىنىڭ جوعارى دەڭگەيدە ەسىك اشۋى ارقىلى شينجياڭ ەركىن ساۋدا سىناق رايونىنىڭ جوعارى ساپالى دامۋىنا جەتەكشىلىك ەتۋىن ٴۇمىت ەتەمىن. اۆتونوميالى رايوندىق ساۋدا ىستەرى مەڭگەرمەسى ىلە وبلىسى مەن قورعاس اۋماعىنىڭ كوركەيۋىن، دامۋىن باياعىسىنداي قولداپ، جاڭا داۋىردەگى جۇڭگو (شينجياڭ) ەركىن ساۋدا سىناق رايونىنىڭ جوعارى دەڭگەيدە ەسىك اشۋىنىڭ، جوعارى ساپالى دامۋىنىڭ جاڭا تاراۋىن بىرگە جازادى.

ىلە وبلىستىق پارتكومنىڭ ورىنباسار شۋجيى، وبلىس باستىعى ەلشات تۇرسىنباي ۇلى ارناۋ سوزىندە ىلە وبلىستىق پارتكوم، ۇكىمەت اتىنان سالتقا قاتىناسقان باسشىلاردى، سيلى قوناقتاردى جانە كاسىپورىنشى دوستاردى قىزۋ قارسى الاتىندىعىن ٴبىلدىردى. ول بىلاي دەدى: جۇڭگو (شينجياڭ) ەركىن ساۋدا سىناق رايونى قورعاس اۋماعىنىڭ ماڭدايشالىق اسۋى شينجياڭ ەركىن ساۋدا سىناق رايونى قورعاس اۋماعى قۇرىلىسىنىڭ جاپپاي باستالعاندىعىنان دەرەك بەرەدى، بۇل ىلەنىڭ زور ٴىسى، قۋانارلىق ٴىسى، ماڭىزدى ٴىسى بولىپ، ىلەنىڭ رەفورما، دامۋ اياق الىسىن ىلگەرىلەتۋدە كەلەلى سيمۆولدىق، بەلەستىك مانگە يە. شينجياڭ ەركىن ساۋدا سىناق رايونىنىڭ قورعاس اۋماعىن قۇرۋ − پارتيا ورتالىق كوميتەتى مەن اۆتونوميالى رايوندىق پارتكومنىڭ، ۇكىمەتتىڭ ىلەگە بەرگەن كەلەلى ستراتەگيالىق ورايى، ٴتىپتى، اۆتونوميالى رايوندىق پارتكوم مەن ۇكىمەت ىلەگە تاپسىرعان كەلەلى بورىش، ىلەنىڭ ىشكە، سىرتقا ەسىك اشۋدى كەڭەيتۋى، جوعارى ساپالى دامۋدى ىلگەرىلەتۋى، جاڭا دامۋ جاعدايىنا بەلسەنە قىزمەت وتەۋى جانە توعىسۋى، قوعام ورنىقتىلىعى مەن باياندى تىنىشتىق باس نىساناسىن جۇزەگە اسىرۋىنىڭ بارىندە دە ماڭىزدى ٴارى تەرەڭ ىقپال تۋدىرادى. ٴبىز پارتيا ورتالىق كوميتەتىنىڭ، مەملەكەتتىك كەڭەستىڭ شەشىمدەرى مەن ورنالاستىرۋلارىن باتىل دايەكتىلەندىرىپ، اۆتونوميالى رايوندىق پارتكومنىڭ، ۇكىمەتتىڭ قىزمەت تالابىنا ساي، شينجياڭ ەركىن ساۋدا سىناق رايونى قورعاس اۋماعىنىڭ فۋنكتسيالىق ورىن تۇراقتاندىرۋىن ىشكەرىلەي يگەرىپ، يدەيانى ونان ارى ازات ەتىپ، مەحانيزمدە جاڭالىق اشىپ، بايلىق، كاسىپ سالاسى، وڭىرلىك ورىن سياقتى باسىمدىقتاردى تياناق ەتىپ، باسىمدىقتاردى زورايتۋعا، ولقىلىقتاردى تولىقتاۋعا قۇلشىنىپ، اشىق ۇلگىدەگى ەرەكشە كاسىپ سالاسى جۇيەسىن قالىپتاستىرىپ، ىلەنىڭ اناعۇرلىم جوعارى ساپالى دامۋىن ىلگەرىلەتەمىز. ۇكىمەت فۋنكتسياسىندا بۇرىلىس جاساۋدى جەدەلدەتىپ، بازارلانعان، زاڭمەن باسقارىلاتىن، حالىقارالانعان شارۋاشىلىق ـ ساۋدا ورتاسىن قۇلشىنا تۇلعالاپ، كوشىرىپ قولدانۋعا، جالپىلاستىرۋعا بولاتىن اناعۇرلىم كوپ تاجىريبەلەر مەن تۇزىمدە جاڭالىق اشۋ جەتىستىكتەرىن قاراستىرامىز. ساۋدانى قولايلىلاستىرۋ دەڭگەيىن ۇزدىكسىز جوعارىلاتىپ، ەركىن ساۋدا سىناق رايونى تۇزىمىندە جاڭالىق اشۋدىڭ ساياساتتىق ابزالدىلىعىن ساۋلەلەندىرىپ، ىلەنىڭ ەرەكشە وسىزاماندانعان كاسىپ سالاسى جۇيەسىن جەدەل قۇرامىز. فينانستىق قىزمەت وتەۋ دەڭگەيىن ۇزدىكسىز جوعارىلاتىپ، شەكارا ٴىشى ـ سىرتىنداعى ٴتۇرلى فينانس قۇرىلىمدارىن ەنگىزىپ، ساۋدا مەن كاسىپ سالاسىنىڭ دامۋىن كەڭەيتۋگە فينانستىق تىرەك ازىرلەيمىز. ەسىك اشۋ دەڭگەيىن ۇزدىكسىز جوعارىلاتىپ، جىبەك جولى ەكونوميكالىق بەلدەۋى وزەكتى رايون قۇرىلىسىمەن ىشكەرىلەي توعىسىپ، شەكارا اتتاعان ساۋدا، شەكارا اتتاعان ساياحات سياقتى سىرتقا باعىتتالعان شارۋاشىلىقتى بەلسەنە ىلگەرىلەتىپ، جاڭا دامۋ ارناسىنا قىزمەت وتەۋ جانە ونىمەن توعىسۋ بارىسىندا اناعۇرلىم زور رول اتقارامىز.

سالتتا جۇڭگو (شينجياڭ) ەركىن ساۋدا سىناق رايونى قورعاس اۋماعىنىڭ جاڭالىق اشۋ شارالارى جاريالاندى، سونداي ـ اق 26 نىسانعا شوعىرلى قول قويىلدى،  قول قويىلعان نىسان قارجىسى 20 ميلليارد 950 ميلليون يۋان بولدى.

وبلىس باسشىلارىنان نياز اشىم، سەرجان ۇعىباي ۇلى، كۇلان سەيپىلقان قىزى، جاۋ چيڭحۇڭ، سۇن حۇي، لي جانچاۋ جانە جۇڭگو (شينجياڭ) ەركىن ساۋدا سىناق رايونى قورعاس اۋماعى قىزمەتىنە باسشىلىق ەتۋ گرۋپپاسىنا مۇشە ورىنداردىڭ نەگىزگى جاۋاپتى جولداستارى، جۇڭگو ـ قازاقستان كاسىپورىندارىنىڭ ۋاكىلدەرى، قاتىستى كاسىپ سالاسىنىڭ ۋاكىلدەرى ماڭدايشالىق اسۋ سالتىنا قاتىناستى.