ٴتىلشىمىز لي يافىڭ، ەرىكتى ٴتىلشى زىڭ شىچاۋ حابارلايدى. 7 - ايدىڭ 26 - كۇنى ساعات 11 دە G577 لەنياسى جىڭ - قۇلجا تاس جول ينجەنەرياسىنىڭ سۇپتاي 2 ـ ٴنومىرلى تۋنەلى ٴساتتى تۇتاستىرىلىپ، ٴتۇيىندى قۇرىلىستىڭ كەزەڭدىك مىندەتى جوسپارداعىدان 20 كۇن بۇرىن ورىندالىپ، تۋنەل قۇرىلىسىن ٴساتتى ورىنداۋدا بەلەستىك قادام تاستالدى، سونىمەن بىرگە G577 لەنياسىنىڭ جىڭ - قۇلجا 1 ـ دارەجەلـى تـاس جـول ينجەنەرياسى قۇرىلىس نىسانىن جەدەل ىلگەرىلەتۋدىڭ تەتىگى باسىلدى.
سۇپتاي 2 - ٴنومىرلى تۋنەلى − G577 لەنياسى جىڭ - قۇلجا تاس جولىنىڭ ماڭىزدى قۇرامداس بولەگى، ونى جۇڭگو تەمىر جول 3 - مەكەمەسى توبى شەكتى سەرىكتەستىگى مىندەتىنە العان. بۇل تۋنەل سولتۇستىك تيانشاننىڭ باتىس بولەگىندەگى بولحىنۇر تاۋىنىڭ وڭتۇستىك باۋرايىنا ورنالاسقان، قوس تۋنەلدىڭ جالپى ۇزىندىعى 1200 مەتر، ەڭ تەرەڭ جەرى 167 مەتر، كىرە بەرىسىندەگى ىلعالدى وپىرىلمالى سارى توپىراق قىسىمدى تۋنەلدىڭ V دارەجەلى قورشامالى تاۋ جىنىسى %92 ۇلەسىن قۇرايدى، بۇل قۇرىلىس جۇمىستارىن ايرىقشا قيىنداتا تۇسكەن - دى.
سۇپتاي 2 - ٴنومىرلى تۋنەلىنىڭ ٴساتتى تۇتاستىرىلۋىنا كەپىلدىك ەتۋ ٴۇشىن، نىسان ٴبولىمى قۇرىلىس جۇرگىزۋ جوباسىن ساپالىلاندىرۋ ارقىلى تۇنەل اۋزىنىڭ توبەسىندەگى توپىراقتى ٴتۇسىرىپ، سىرتقا شىعارىپ، تۋنەل اۋزىنىڭ اۋىتقۋ قىسىمى مەن شوگۋ ماسەلەسىن ٴونىمدى شەشتى. سونىمەن بىرگە، نىسان ٴبولىمى ”حاۋىپسىزدىكتى ٴبىرىنشى ورىنعا قويۋ، الدىن الا ساقتانۋدى نەگىز ەتۋ، جان - جاقتى وڭاۋ“ سىندى قىزمەت بەتالىسىنا باستان - اياق تاباندى بولىپ، ”قۇبىرلاردى الدىن الا ورناتۋ، سەمەنت قۇيۋ، قىسقا قازۋ، تىرەۋ قويىپ بەكەمدەۋ، توبەسىن ەرتەرەك جابۋ، ٴجيى ولشەۋ“ پرينسيبى بويىنشا جۇمىسقا قاتاڭ ۇيىمداستىرىپ، دەن قويا ۇيىمداستىرۋ، عىلمي باسقارۋ ارقىلى تۋنەل قۇرىلىسىنىڭ ونىمدىلىگى مەن ساپاسىن ايتارلىقتاي جوعارىلاتىپ، ٴتۇرلى قىزمەتتىڭ الدىن الا ىلگەرىلەتىلۋىنە كەپىلدىك ەتتى.
جۇڭگو تەمىر جول 3 ـ مەكەمەسى توبى شەكتى سەرىكتەستىگىنىڭ قاتىستى جاۋاپتىسى تانىستىرىپ بىلاي دەدى: G577 لەنياسىنىڭ جىڭ - قۇلجا 1 ـ دارەجەلى تاس جول ينجەنەرياسى قۇرىلىس نىسانى بۇراتالا موڭعۇل اۆتونوميالى وبلىسى مەن ىلە قازاق اۆتونوميالى وبلىسىنىڭ اۋماعىندا بولىپ، جىڭ - موڭعۇلكۇرە تاس جولىنىڭ ماڭىزدى قۇرامداس بولىگى. بۇل نىساننىڭ اتقارىلۋى ىلە اڭعارىن ٴۇرىمجى سياقتى جەرلەرمەن بايلانىستىراتىن ەڭ ۇتىمدى قۇرلىق ارالىق ارناعا اينالىپ، شينجياڭنىڭ تۇتاس تۇلعالىق قاتىناسىنىڭ قارىشتاپ دامۋىن جۇزەگە اسىرۋدا، وڭىرلىك قارجى قوسۋ ىستەرىن جاقسارتۋدا، جەرگىلىكتى ورىننىڭ قاتىناس جاعدايىن ٴونىمدى جاقسارتۋدا، وڭىرلىك ەكونوميكانىڭ دامۋىن جەبەۋدە توتەنشە ماڭىزدى مانگە يە. سۇپتاي 2 - ٴنومىرلى تۋنەلدىڭ تۇتاستىرىلۋى G577 لەنياسى جىڭ - قۇلجا تاس جولى قۇرىلىسىنىڭ كەزەڭدىك ماڭىزدى تابىسقا جەتكەندىگىن ايگىلەيدى.
سۋرەتتە: 7 ـ ايدىڭ 26 ـ كۇنى ساعات 11 دە G577 لەنياسى جىڭ - قۇلجا تاس جول ينجەنەرياسىنىڭ سۇپتاي 2 ـ ٴنومىرلى تۋنەلى ٴساتتى تۇتاستىرىلدى. ۋاڭ حۇڭۋي فوتوسى