9 ـ ايدىڭ 4 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگو _ افريكا سەلبەستىك تالقى مىنبەرى بەيجيڭ باسشىلار ماجىلىسىنە قاتىناسۋ ٴارى مەملەكەتتىك ساپاردا بولۋ ٴۇشىن جۇڭگوعا كەلگەن سەنەگال زۇڭتۇڭى فايەمەن كەڭەس وتكىزدى. كەڭەستەن بۇرىن شي جينپيڭ حالىق سارايىنىڭ سولتۇستىك ۇلكەن زالىندا فايەگە ارناپ قارسى الۋ سالتىن وتكىزدى. سۋرەتتە: شي جينپيڭ مەن حانىمى پىڭ لييۋان فايە جانە حانىمى ماريمەن بىرگە سۋرەتكە تۇسۋدە.

□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن

شينحۋا اگەنتتىگىنىڭ 9 ـ ايدىڭ 4 ـ كۇنى بەيجيڭنەن بەرگەن حابارى (تىلشىلەر ما جويان، ۋاڭ جۇنلۋ). 9 ـ ايدىڭ 4 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگو _ افريكا سەلبەستىك تالقى مىنبەرى بەيجيڭ باسشىلار ماجىلىسىنە قاتىناسۋ ٴارى مەملەكەتتىك ساپاردا بولۋ ٴۇشىن جۇڭگوعا كەلگەن سەنەگال زۇڭتۇڭى فايەمەن كەڭەس وتكىزدى.

شي جينپيڭ بىلاي دەپ باسا دارىپتەدى: جۇڭگو مەن سەنەگال مەملەكەتتى دامىتۋ، گۇلدەندىرۋ جولىنداعى دوستار جانە سەرىكتەر. كوپ جىلداردان بەرى ەكى جاق ٴۇرتىس شىنايى دوستاسۋ، تەڭ تۇرعىدا قۇرمەت ەتۋ، سەلبەسىپ تەڭ يگىلىككە كەنەلۋ رۋحىنان جازباي سەلبەستىك ورىستەتىپ، ناقتى جەتىستىككە قول جەتكىزىپ، ەكى ەل حالقىنا يگىلىك اكەلدى. جۇڭگو جاق سەنەگال جاقپەن وزدەرىنىڭ وسىزاماندانۋىن جۇزەگە اسىرۋ جولىندا قول ۇستاسا العا ىلگەرىلەپ، ەكى ەلدىڭ جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى قالايدى.

شي جينپيڭ بىلاي دەپ اتاپ كورسەتتى: جۇڭگو جاق سەنەگال جاقپەن ەل باسقارۋ تاجىريبەلەرى جونىندە اۋىس ـ كۇيىستى كۇشەيتىپ، ساياسي ٴوزارا سەنىمدىلىكتى تەرەڭدەتىپ، ٴبىر ـ ٴبىرىنىڭ وزەكتى مۇددەسىنە جانە ٴجىتى قاداعالاپ وتىرعان ىستەرىنە ساياتىن كەلەلى ماسەلەلەردە ۇزدىكسىز ٴوزارا قولداۋ كورسەتۋدى قالايدى. دامۋ ستراتەگيالارىن ٴتۇيىلىستىرۋدى كۇشەيتىپ، ورتاق دامۋدى جەبەيدى. جۇڭگو جاق اۋىل شارۋاشىلىق تەحنيكا ماماندارىن ۇزدىكسىز جىبەرىپ، سەنەگال جاقتىڭ ونەركاسىپ باقشا رايونىن قۇرۋىنا قولداۋ كورسەتەدى، جاڭا ەنەرگيا سياقتى جاڭادان گۇلدەنگەن سالالارداعى سەلبەستىكتى كەڭەيتىپ، سەنەگال جاقتىڭ ونەركاسىپتەندىرۋ جانە اۋىل شارۋاشىلىعىن وسىزامانداندىرۋ ۇردىسىنە دەم بەرەدى. جۇڭگو مەن سەنەگالدىڭ كوپتەگەن كەلەلى حالىقارالىق ماسەلەدە تۇرعىسى قارايلاس، جۇڭگو جاق سەنەگال جاقپەن كوپ جاقتى ىستەستىكتى جيىلەتىپ، حالىقارالىق ادىلدىكتى، ادىلەتتىلىكتى جانە وركەندەپ كەلە جاتقان ەلدەردىڭ ورتاق مۇددەسىن بىرگە قورعاۋدى قالايدى.

شي جينپيڭ بىلاي دەپ اتاپ كورسەتتى: جۇڭگو _ افريكا سەلبەستىك تالقى مىنبەرى تۇستىك ەلدەر سەلبەستىگىنىڭ ”التىن ٴارىپتى ماڭدايشالىعى“ بولىپ، حالىقارانى افريكامەن سەلبەستىك جاساۋعا باستاپ، دۇنيە ٴجۇزىنىڭ بەيبىتشىلىگى مەن دامۋىنا ماڭىزدى ۇلەس قوستى. جۇڭگو مەن سەنەگال تالقى مىنبەرىنىڭ ورتاق ٴتوراعا ەلى مىندەتىن ارقالاعان 6 جىلدان بەرى، جۇڭگو مەن افريكا ەكى جاق جاڭا تيپتى ايدارشا ۆيرۋس ىندەتى سياقتى قيىنشىلىقتاردى جەڭىپ، الدىڭعى 2 كەزەك تالقى مىنبەرى ماجىلىسىندە العا قويىلعان ”8 ۇلكەن ارەكەت“ پەن ”9 ٴتۇرلى ينجەنەريانى“ ٴساتتى ورىنداپ، جۇڭگو مەن افريكا قارىم ـ قاتىناسىنىڭ جاڭا كەزەڭگە ٴوتۋىن ىلگەرىلەتتى. سەنەگال تالقى مىنبەرىنىڭ 4 ـ كەزەكتى افريكا جاق ورتاق ٴتوراعا ەلى رەتىندە، جۇڭگو مەن افريكانىڭ ىنتىماقتاسا سەلبەستىك جاساۋىنا ماڭىزدى ۇلەس قوستى. جۇڭگو جاق سەنەگال جاقپەن ىستەستىكتى نىعايتىپ، وسى رەتكى باسشىلار ٴماجىلىسىنىڭ تولىق تابىستى بولۋىنا جەتەكشىلىك ەتىپ، جۇڭگو مەن افريكانىڭ وسىزاماندانۋىن قول ۇستاسا ىلگەرىلەتىپ، جۇڭگو مەن افريكا قارىم ـ قاتىناسىنىڭ جاڭا جورىعىن باستاۋدى قالايدى.

فايە مىنالاردى ٴبىلدىردى: جۇڭگوعا تۇڭعىش رەت مەملەكەتتىك ساپاردا بولعانىمدى ٴارى جۇڭگو _ افريكا سەلبەستىك تالقى مىنبەرى بەيجيڭ باسشىلار ماجىلىسىنە قاتىناسقانىمدى وتە باقىت سانايمىن. جۇڭگو جاقتىڭ ىستىق ىقىلاسپەن سي ـ قۇرمەت كورسەتىپ، بىزگە جۇڭگونىڭ كوركەمدىگى مەن دوستىعىن سەزىندىرگەنىنە العىس ايتامىن. سەنەگال مەن جۇڭگو 2016 ـ جىلى جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناس ورناتقاننان بەرى، ەكى جاقتىڭ سەلبەستىگى ۇزدىكسىز ىلگەرىلەۋشىلىككە قول جەتكىزدى. سەنەگال مەن جۇڭگو سەلبەسىپ كوپتەگەن تابىستى نىسانداردى اتقارىپ، سەنەگال ەكونوميكاسىنىڭ دامۋىن جانە حالىق تۇرمىسىنىڭ جاقسارۋىن جەبەدى. سەنەگال جاق ٴبىر جۇڭگو پرينسيبىنە باتىل بويسۇنىپ، ادامدىق ۇقىق ماسەلەسىن ساياسيلاندىرۋعا قارسى تۇرىپ، جۇڭگو جاقپەن سەنەگال _ جۇڭگو دوستىعىن بەكەمدەۋگە، تەرەڭدەتۋگە كۇش سالادى، جۇڭگو جاقتىڭ پارتيانى باسقارۋداعى، ەل باسقارۋداعى ٴساتتى تاجىريبەلەرىنەن ۇيرەنىپ، ۇلگى الىپ، اۋىل شارۋاشىلىعى، ونەركاسىپ، سيفرلاندىرۋ، كاسىپتىك باۋلۋ، جاستار سياقتى سالالارداعى سەلبەستىكتى ىلگەرىلەتىپ، سەنەگال مەن جۇڭگونىڭ جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىن اناعۇرلىم جوعارى دەڭگەيگە كوتەرۋدى قالايدى. جۇڭگو _ افريكا سەلبەستىك تالقى مىنبەرىنىڭ قۇرىلۋى، دامۋى دوستىق سەنىمدى، ٴوزارا قۇرمەت ەتۋدى، ىنتىماقتاسا سەلبەسۋدى، ناقتى، جوعارى ٴونىمدى بولۋدى نەگىز ەتىپ، افريكا ەكونوميكاسىنىڭ جانە قوعامىنىڭ دامۋىنا ماڭىزدى ۇلەس قوستى. سەنەگال جاق جۇڭگو جاقپەن ىستەستىكتى جيىلەتىپ، وسى رەتكى جۇڭگو _ افريكا سەلبەستىك تالقى مىنبەرى بەيجيڭ باسشىلار ٴماجىلىسىنىڭ تولىق تابىستى بولۋىنا شىنايى كەپىلدىك ەتۋدى قالايدى. سەنەگال جاق ٴتوراعا شي جينپيڭ العا قويعان ”ٴبىر بەلدەۋ، ٴبىر جولدى“ بىرگە قۇرۋ باستاماسىن جانە الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن ايرىقشا باعالايدى، جۇڭگو جاقتىڭ ورتاق دامۋدى جانە ادىلدىكتى، ادىلەتتىلىكتى ىلگەرىلەتۋگە كۇش سالعانىن القايدى، جۇڭگو جاقپەن كوپ جاقتى بايلانىستى، ىستەستىكتى كۇشەيتۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى الەمدىك دامۋ باستاماسىن تياناقتاندىرۋ، قارجى قوسۋ، ەكونوميكا سەلبەستىگى، ينفورماتسيا ـ حابارلاسۋ تەحنيكاسى، ادام كۇشى بايلىعى، جاسىل دامۋ سياقتى سالالارداعى كوپتەگەن ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.

ەكى جاق «جۇڭحۋا حالىق رەسپۋبليكاسى مەن سەنەگال رەسپۋبليكاسىنىڭ جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىن تەرەڭدەتۋ، جوعارى دەڭگەيدەگى جۇڭگو _ سەنەگال تاعدىرلاس ورتاق تۇلعاسىن قۇرۋ جونىندەگى بىرلەسكەن مالىمدەمەسىن» جاريالادى.

كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ سولتۇستىك زالىندا فايەنى جانە ونىڭ حانىمى ماريدى قارسى الۋ سالتىن وتكىزدى.

ۋاڭ ي جوعارىداعى قيمىلدارعا قاتىناستى.