سۋرەتتە: تەگىس وتكەلەك ۇڭگىردىڭ جۇمىس باسى                     ليۋ چۇنشيڭ فوتوسى.

ٴتىلشىمىز ليۋ چۇنشيڭ، ەرىكتى ٴتىلشى رىن جيڭ حابارلايدى. 11 ـ اي كىرىسىمەن G219 لەنياسىنىڭ موڭعۇلكۇرە - ونسۋ تاس جولىنىڭ موڭعۇلكۇرە شىعىس دۇندۇعۇل سايىنداعى ٴارقايسى نىساندارىنىڭ قۇرىلىس ورنى قاربالاس كۇيگە ٴوتتى. موڭعۇلكۇرە - ونسۋ تاس جولى ٴبىرىنشى مەردىگەرلىك بولىگى نىسانىنداعىلار ٴتيىمسىز اۋا رايىنىڭ ىقپالىن جەڭىپ، قۇرىلىس مەرزىمىن كۇش سالا مىقتى يگەرىپ، نىسان قۇرىلىسىنىڭ ”قىسقى شايقاسىن“ باستادى. سونىمەن بىرگە حاۋىپسىزدىكتى يگەرىپ، ساپانى مەڭگەرىپ، قارقىنعا كەپىلدىك ەتىپ، قۇنىتتى باسقارىپ، جوعارى ٴونىمدى قۇرىلىس جۇرگىزىپ، جىلدىق نىسانا ـ مىندەتتەردى ورىنداۋعا كۇش سالدى.

11 ـ ايدىڭ 1 ـ ، 2 ـ كۇندەرى ٴتىلشى موڭعۇلكۇرە - ونسۋ تاس جولى ٴبىرىنشى مەردىگەرلىك قۇرىلىسىنىڭ كىرە بەرىسىنەن باتىس تيانشان ەرەكشە ۇزىن تۋنەلىنە بارا جاتقاندا جول بويى توقتاۋسىز قۇرىلىس جۇرگىزىلىپ، تاسىمال اۆتوموبيلدەرىنىڭ كىرىپ ـ شىعىپ، تارتىپپەن قاتىناپ جاتقانىن؛ جول تاعانى، كوپىر سياقتى ٴتۇرلى ينجەنەريالاردىڭ قاۋىرت جۇرگىزىلىپ، ٴتۇرلى قۇرىلىس ماشينالارى گۇرىلدەپ، تارتىپپەن جۇمىس جۇرگىزىپ جاتقانىن؛ جالپىلىق الاڭ ـ بەكەتتەردە بەتوندى شوعىرلى ارالاستىرۋ، بولات شىبىقتى شوعىرلى مانەرلەۋ سياقتى جۇمىستار ۇزدىكسىز جۇرگىزىلىپ، ٴتارتىپتى ورىستەتىلىپ جاتقانىن كوردى.

باتىس تيانشان ەرەكشە ۇزىن تۋنەلىنىڭ كىرە بەرىسىندەگى جۇمىس ورنىندا قۇرىلىسشىلار قۇرىلىس ۋاقىتىن ۇتىپ، قازۋ جانە بەكەمدەۋ جۇمىسىن جۇيەلى ورىستەتىپ جاتتى. كەيبىرەۋلەرى زەردەلى ماشينا جابدىقتارىن ىسكە قوسىپ، تۋنەلدى العا قاراي ورنىقتى قازسا؛ كەيبىرەۋى قولىنا دانەكەرلەگىشتەرىن الىپ، وت ۇشقىنىن جان - جاققا شاشىراتا  بولات قۇرىلىمدى دالمە - ٴدال دانەكەرلەپ جاتتى؛ كەيبىرەۋلەرى ٴار جەردەگى نازىك بۋىندارعا، ٴاربىر ۇلگىگە دەن قويا تەكسەرىپ، قۇرىلىس ساپاسىنان تيتەي دە اعاتتىق جىبەرمەۋگە كەپىلدىك ەتۋدە. 

 ”قازىر جۇڭگو تاس جول - كوپىر قۇرىلىسى G219  لەنياسى موڭعۇلكۇرە - ونسۋ تاس جولى نىسانىنىڭ EPC  ٴبىرىنشى مەردىگەرلىك بولىگى قىسقى قۇرىلىس جۇرگىزۋ كەزەڭىنە ٴوتىپ، تۇتاس لەنيا بويىنشا جول تاعانى، كوپىر قۇرىلىسى جۇمىستارى توقتاتۋ كەزەڭىنە قادام تاستاعانىمەن، الايدا، باتىس تيانشان ەرەكشە ۇزىن تۋنەلىندە قىسقى جۇمىس توقتامادى“. 11 - ايدىڭ 1 - كۇنى موڭعۇلكۇرە - ونسۋ تاس جولى ٴبىرىنشى مەردىگەرلىك بولىگى نىسانى ٴبولىمىنىڭ ورىنباسار ديرەكتورى ليۋ يۇيشىڭ بىلاي دەدى: ”باتىس تيانشان ەرەكشە ۇزىن تۋنەلىنىڭ نەگىزگى ۇڭگىرىندە ولشەمدى 9 زەردەلىلەنگەن جابدىق جۇمىس جۇرگىزسە، تەگىس وتكىزگىش ۇڭگىردە TBM اپپاراتى قۇرىلىس جۇرگىزۋدە، نىسان قۇرىلىسىندا تەگىس وتكىزگىش ۇڭگىر نەگىزىندە، وڭ ـ سول نەگىزگى ۇڭگىر بويىنشا قازۋ جۇمىسى جۇرگىزىلىپ، ۇزىن تۋنەلدى بولىكتەرگە ٴبولىپ قازۋ، قىسقا تۋنەلدى تەز قازۋ“ جۇزەگە اسىرىلىپ، قۇرىلىس جۇرگىزۋ ونىمدىلىگى ايتارلىقتاي جوعارىلاتىلدى. ٴدال وسى كۇنگە دەيىن سول جاق ۇڭگىر 499 مەتر، وڭ جاق ۇڭگىر 525 مەتر، تەگىس وتكەلەك ۇڭگىر 396 مەتر قازىلعان. مەجەمەن جىل سوڭىنا دەيىن نىسان تۋنەل قۇرىلىسىندا جالاڭ ۇڭگىردەن 800 مەتردەن استام قازۋدان قامال الىناتىن كورىنەدى“. 

بيىل موڭعۇلكۇرە - ونسۋ تاس جولى ٴبىرىنشى مەردىگەرلىك بولىگى نىسان ۇجىمى باسقارۋ ۇلگىسى وزىق، جابدىق تەحنولوگياسى پىسىپ ـ جەتىلگەن ”زەردەلى جۇمىس جۇرگىزۋ“ جۇيەسىن ەنگىزىپ، ناقتى ۋاقىت بويىنشا باقىلاۋ ـ مەڭگەرۋ ارقىلى ٴارقايسى قۇرىلىس ورىندارىنىڭ حاۋىپسىز قۇرىلىس جۇرگىزۋ جاعدايىن ٴدال كەزىندە يگەردى. موڭعۇلكۇرە - ونسۋ تاس جولى ٴبىرىنشى مەردىگەرلىك بولىگى نىسان ٴبولىمىنىڭ حاۋىپسىزدىك باس باقىلاۋشىسى ليۋ سىيۋان بىلاي دەپ تانىستىردى: ”زەردەلى جۇمىس جۇرگىزۋ“ جۇيەسى زەردەلى باقىلاۋ ـ مەڭگەرۋ كامەراسى، بەيدوۋ جاساندى سەرىك جول نۇسقاۋ، ورىن بەلگىلەۋ جۇيەسى سياقتىلار ارقىلى قۇرىلىس الاڭىنىڭ كەسكىنىن زەردەلى حاۋىپسىزدىكتى باقىلاۋ ورتالىعىنىڭ باقىلاۋ ـ مەڭگەرۋ ۇلكەن ەكرانىنا دەر كەزىندە جەتكىزۋگە دە، زەردەلى قولفون ارقىلى دا دەر كەزىندە باقىلاپ ـ مەڭگەرۋگە بولادى. سونىمەن بىرگە، قۇرىلىس جۇرگىزۋشىلەردىڭ حاۋىپتى ارەكەتتەرى جونىندە ەكراندا بەلگى قويىپ، قۇرىلىس جۇرگىزۋشىلەردىڭ حاۋىپتى ارەكەتتەرىن دەر كەزىندە جويۋىنا كەپىلدىك ەتىپ، نىساندا حاۋىپسىز ٴوندىرىس شىرعالاڭىنىڭ تۋىلۋ ىقتيمالدىعىن تومەندەتىپ، نىساننىڭ حاۋىپسىز ٴوندىرىس جاعدايىنىڭ ورنىقتىلىعىن، مەڭگەرىمدىلىگىن قامتاماسىز ەتەدى.

 11 ـ ايدىڭ 13 ـ كۇنى ٴتىلشىنىڭ ۇعىسۋىنشا، كەزەكتە تۋنەل قۇرىلىسى قاۋىرت جۇرگىزىلۋدەن سىرت، سىرتىنداعى قۇرىلىستار تۇگەل توقتاعان. سول كۇنگە دەيىن سول جاق ۇڭگىر 524 مەتر، وڭ جاق ۇڭگىر 541.5 مەتر، تەگىس وتكەلەك ۇڭگىر 418 مەتر قازىلىپ بولعان.