20 ەل توبى باسشىلارىنىڭ 19 ـ رەتكى باسشىلار ماجىلىسىنە قاتىناسادى ٴارى برازيليادا مەملەكەتتىك ساپاردا بولادى

　　جەرگىلىكتى ۋاقىت 11 - ايدىڭ 17 - كۇنى تۇستەن كەيىن مەملەكەت ءتوراعاسى شي جينپيڭ برازيليا فەدەراتسيالىق رەسپۋبليكاسىنىڭ زۇڭتۇڭى لۋلانىڭ ۇسىنىسىمەن 20 ەل توبى باسشىلارىنىڭ 19 - رەتكى باسشىلار ماجىلىسىنە قاتىناسۋ ءارى برازيليادا مەملەكەتتىك ساپاردا بولۋ ءۇشىن ارناۋلى ۇشاقپەن ريو - دە جانەيروعا جەتتى.

□ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

شينحۋا اگەنتتىگىنىڭ 11 ـ ايدىڭ 17 ـ كۇنى ريو ـ دە جانەيرودان بەرگەن حابارى (تىلشىلەر چىن ۋيحۋا، ما جىڭ). جەرگىلىكتى ۋاقىت 11 ـ ايدىڭ 17 ـ كۇنى تۇستەن كەيىن مەملەكەت ٴتوراعاسى شي جينپيڭ برازيليا فەدەراتسيالىق رەسپۋبليكاسىنىڭ زۇڭتۇڭى لۋلانىڭ ۇسىنىسىمەن 20 ەل توبى باسشىلارىنىڭ 19 ـ رەتكى باسشىلار ماجىلىسىنە قاتىناسۋ ٴارى برازيليادا مەملەكەتتىك ساپاردا بولۋ ٴۇشىن ارناۋلى ۇشاقپەن ريو ـ دە جانەيروعا جەتتى.

ارناۋلى ۇشاق ريو ـ دە جانەيرو گالليون اۋە ارمياسى بازاسىنا جەتكەندە، برازيليا ۇكىمەتىنىڭ جوعارى دارەجەلى ٴمانساپتىلارى ىستىق ىقىلاسپەن قارسى الدى. برازيليا اۋە ارمياسى كەرنايشىلارى كەرناي تارتىپ قۇرمەت ٴبىلدىردى، قۇرمەت قاراۋىلى قىزىل كىلەمنىڭ ەكى جاعىندا قاتار تۇزەدى.

شي جينپيڭ اۋەجايدا جازباشا ٴسوز سويلەپ، برازيليا ۇكىمەتى مەن برازيليا حالقىنا شىنايى سالەم جولدادى جانە ىزگى تىلەك ٴبىلدىردى.

شي جينپيڭ بىلاي دەپ اتاپ كورسەتتى: مەن كەزىندە 4 رەت برازيلياعا ساپارلاي كەلىپ، برازيليانىڭ تاياۋداعى 30 جىلدان بەرگى دامۋ وزگەرىسىنە ٴوز كوزىممەن كۋا بولدىم، ىستىق ىقىلاسقا تولى وسى توپىراققا تاعى دا قادام تاستاعانىمدا، ەرەكشە ىستىق سەزىندىم. جۇڭگو مەن برازيليا _ مۇراتتاس جاقسى دوستار، قول ۇستاسا العا ىلگەرىلەيتىن جاقسى سەرىكتەر. شىعىس، باتىس جارتى شارداعى ەكى ٴىرى وركەندەپ كەلە جاتقان ەل رەتىندە، جۇڭگو مەن برازيليانىڭ اراسىن تەڭىز ـ مۇحيت ٴبولىپ تۇرعانىمەن، ٴبىر ـ ٴبىرىن ٴوزارا باۋراپ، الىستان ۇندەسەدى. جۋىق جىلداردان بەرى، ەكى ەلدىڭ ساياسي ٴوزارا سەنىمدىلىگى ۇزدىكسىز تەرەڭدەپ، ناقتى ىستەر سەلبەستىگىندە ناتيجە قوماقتى بولىپ، گۋمانيتارلىق ىستەر سەلبەستىگى كوپ تۇيىندە دامىدى، ٴداستۇرلى دوستىعى ٴداۋىردىڭ تىڭ تىرشىلىك تىنىسىن قاۋلاتىپ، حالىقارادا جەر شارىنىڭ وڭتۇستىگىنىڭ ادىلەت ٴۇنىن بىرگە تاراتىپ، دۇنيە ٴجۇزىنىڭ بەيبىتشىلىگى مەن دامۋىن جەبەۋگە ماڭىزدى ۇلەس قوستى.

شي جينپيڭ بىلاي دەپ اتاپ كورسەتتى: بيىل ەكى ەل ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن سالتاناتپەن قۇتتىقتادى. بۇرىنعىعا مۇراگەر بولىپ كەيىنگىگە جول اشاتىن، الدىڭعىلاردىڭ ٴىزىن باسىپ بولاشاققا بەتتەيتىن ماڭىزدى تاريحي تۇيىندە تۇرىپ، مەن لۋلا زۇڭتۇڭمەن بىرگە جۇڭگو _ برازيليا قارىم ـ قاتىناسىنىڭ دەڭگەيىن ونان ارى جوعارىلاتۋ، ەكى ەلدىڭ دامۋ ستراتەگياسىن ٴتۇيىلىستىرۋدى كۇشەيتۋ جانە ورتاق كوڭىل ٴبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرۋدى ٴۇمىت ەتەمىن. وسى رەتكى ساپاردىڭ ەكى ەلدىڭ ستراتەگيالىق ٴوزارا سەنىمدىلىگىن ونان ارى نىعايتىپ، ەكى جاقتىڭ ٴارقايسى سالاداعى اۋىس ـ كۇيىسىن، سەلبەستىگىن تەرەڭدەتىپ، جۇڭگو _ برازيليا قارىم ـ قاتىناسىنىڭ كەلەسى ”التىن 50 جىلىن“ اشۋعا جەتەكشىلىك ەتەتىندىگىنە سەنەمىن. 20 ەل توبى باسشىلارىنىڭ 19 ـ رەتكى باسشىلار ماجىلىسىنە قاتىناسىپ، ٴارقايسى جاقپەن ٴىرى جوسپارلاردى بىرگە اقىلداسىپ، دامۋدى بىرگە جوسپارلاپ، تەرەزەسى تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن بىرگە دارىپتەپ، 20 ەل توبىنىڭ حالىقارالىق ەكونوميكالىق سەلبەستىكتەگى ماڭىزدى تۇعىر رەتىندە ۇزدىكسىز اناعۇرلىم زور رول ساۋلەلەندىرۋىن ىلگەرىلەتۋدى ٴۇمىت ەتەمىن.

ساي چي، ۋاڭ ي قاتارلى ساپارلاستارى وسى ۇشاقپەن بىرگە باردى.

جۇڭگونىڭ برازيليادا تۇراتىن باس ەلشىسى جۋ چيڭچياۋ دا اۋەجايعا بارىپ قارسى الدى.

شي جينپيڭ ازيا _ تىنىق مۇحيت ەكونوميكالىق سەلبەستىك ۇيىمىنىڭ 31 ـ رەتكى باسشىلار بەيرەسمي ماجىلىسىنە قاتىناسۋىن ٴارى پەرۋدەگى مەملەكەتتىك ساپارىن اياقتاتىپ ليمادان اتتانار كەزدە، پەرۋ مينيسترلەر كەڭەسىنىڭ ٴتوراعاسى ادريانسون، مەملەكەت قورعانىس مينيسترلىگىنىڭ مينيسترى استۋديلۋە قاتارلىلار اۋەجايعا بارىپ اتتاندىرىپ سالدى.

شي جينپيڭ اۆتوكولىككە وتىرىپ ٴوزى تۇسكەن قوناقجايدان اۋەجايعا بارا جاتقان جولدا كوپتەگەن جەرگىلىكتى بۇقارا وزدىكتەرىنەن جولدىڭ ەكى جاعىندا توپتاسىپ، اۆتوكولىك اترەتىنە قول بۇلعاپ قۇرمەت ٴبىلدىردى، حۋاچياۋلاردىڭ، حۋارىنداردىڭ، جۇڭگو قارجىلاندىرعان قۇرىلىمداردىڭ، شەتەلدە وقىپ جاتقان وقۋشىلاردىڭ ۋاكىلدەرى جۇڭگو مەن پەرۋ ەكى ەلدىڭ مەملەكەت تۋىن بۇلعاپ، ٴتوراعا شي جينپيڭنىڭ ساپارىنىڭ تولىق تابىستى بولعاندىعىن قۇتتىقتادى.