− شي جينپيڭ قاتارلى جۇڭگو كوممۋنيستىك پارتياسى 20 - كەزەكتى ورتالىق كوميتەتى ساياسي بيۋروسى تۇراقتى كوميتەت مۇشەلەرىنىڭ جۇڭگولىق، شەتەلدىك تىلشىلەرمەن كەزدەسۋىنەن ەستەلىك

□ شينحۋا اگەنتتىگىنىڭ تىلشىلەرى جۋ جيچاي، ۋاڭ چي، ۋاڭ زىميڭ

”بۇكىل پارتيانىڭ، بۇكىل ەلدەگى ءار ۇلت حالقىنىڭ بىرگە قۇلشىنۋىنىڭ ارقاسىندا، ءبىز جاپپاي دوڭگەلەك داۋلەتتى قوعامدى ءدال ۋاعىندا ورناتتىق، ءبىرىنشى 100 جىلدىق كۇرەس نىساناسىن جۇزەگە اسىردىق. قازىر ءبىز جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىنا تاسقىنداعان جىگەرمەن قادام تاستاپ، ەكىنشى 100 جىلدىق كۇرەس نىساناسىنا قاراي جورىق جاساپ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدەمىز“.

10 - ايدىڭ 23 - كۇنى تۇستە، باس شۋجي شي جينپيڭ جاڭا كەزەكتى جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتىنىڭ مۇشەلەرىمەن بىرگە جۇڭگولىق، شەتەلدىك تىلشىلەرمەن كەزدەسكەندە وسىنى ايبىنمەن جاريالادى.

ۋاقىتتىڭ جاڭا پاراعى باستالدى؛ جۇڭگونىڭ تىڭ تاراۋى اشىلدى.

جۇڭحۋا ۇلتىنىڭ ماڭگىلىك ۇلى ءىسىن مۇرات ەتىپ، ادامزاتتىڭ بەيبىتشىلىگى مەن دامۋى سىندى وسكەلەڭ ىسىنە كۇش سالعان 100 جىلدىق ءىرى پارتيا الدىڭعىلاردىڭ ءىزىن باسىپ، بولاشاققا جول اشۋ بارىسىندا دۇنيە ءجۇزىنىڭ ۇمىتكە تولى جانارىن قارسى الدى.

ايبىندى دا اسقاق حالىق سارايى تاريحي ساتكە تاعى ءبىر رەت كۋا بولدى.

جاڭا عانا 20 - كەزەكتى ورتالىق كوميتەتتىڭ ءبىرىنشى جالپى ماجىلىسىندە سايلانعان جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ جانە جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتىنىڭ مۇشەلەرى تۇڭعىش رەت توپتىق الدىعا شىعىپ، 20 - قۇرىلتايعا تىلشىلىك جاساعان جۇڭگولىق، شەتەلدىك تىلشىلەرمەن ىقىلاسپەن كەزدەستى.

حالىق سارايىنىڭ 3 قاباتتى جينسى زالىندا شىراقتار سامالاداي جارقىراپ، قىزۋ مەرەيگە شومىپ تۇر، جۇڭگو كوممۋنيستىك پارتياسىنىڭ نارت قىزىل پارتيا تۋى ايرىقشا كوز تارتىپ، وراق پەن بالعادان قۇرالعان پارتيا گەربى نۇر - شۇعىلا شاشىپ تۇر. زالدىڭ ەكى جاق قابىرعاسىنداعى ۇلكەن ۇزىنشاق سۋرەتتەر «ون مىڭ شاقىرىمدىق چاڭجياڭ سۋرەتى»، «حۋاڭحى، انا وزەن» بىرىنە - ءبىرى كورىك قوسىپ، حۋاشيانىڭ بايتاق دالاسىنىڭ ايبىندى دا كورىكتى تاۋ - سۋلارىنىڭ ەرشىمدى كورىنىسىن بەينەلەپ، جۇڭحۋا ۇلتىنىڭ ماڭگىلىك جالعاسقان تىنىستى كەلبەتىن ايگىلەپ تۇر.

جۇڭگولىق، شەتەلدىك 600دەن استام ءتىلشى وسى جەرگە كەلدى، بيىك - الاساسى ارالاس اپپارات كوزدەرى زالدىڭ كىرە بەرىسىنە شوعىرلاندى.

ءۇنسىز زىمىراپ وتكەن ۋاقىتقا تاۋ مەن سۋلار كۋا بولدى. كەرەمەت 10 جىلدىق وزگەرىس جۇڭحۋانىڭ بايتاق دالاسىندا، شەتسىز - شەكسىز كورىنىس شىت جاڭا تۇرگە ەنگەن گۇلدەنۋ داستانىن جازدى.

العا ىلگەرىلەۋدىڭ قوزعاۋشى كۇشى اناعۇرلىم نىعايدى، كۇرەس رۋحى اناعۇرلىم اسقاقتادى، ءسوزسىز، جەڭىسكە جەتۋ سەنىمى اناعۇرلىم بەكەمدەلدى. بۇگىن جۇڭگو كوممۋنيستىك پارتياسىنىڭ باسشىلىعىندا، گۇلدەنىپ - كوركەيگەن جۇڭگو، وزىنە سەنىمدى، ءوزىن الۋەتتەندىرگەن ۇلت دۇنيە ءجۇزىنىڭ شىعىسىندا ايبىنمەن قاسقايىپ تۇر.

ۋاقىت كورسەتكىش ءتىلى ساعات 12دەن 5 مينۋت وتكەنىن كورسەتتى، جالپى جۇرت كوز تىككەن ءسات كەلىپ جەتتى!

باس شۋجي شي جينپيڭ لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي جولداستارمەن بىرگە جينسى زالىنا كەلدى، ءبىر مەزەت فوتو اپپاراتتار جىتىرمەلەتە سىتىرلاپ، شىراقتار جارقىلداپ، بۇكىل الاڭدى دۋ قول شاپالاق ءۇنى كەرنەدى.

باس شۋجي شي جينپيڭ قاراكوك كاستيۋم كيىپ، قىزىل گالستۋك تاعىپ، نىق قاداممەن ءتوراعا مىنبەرىنىڭ ورتاسىنا كەلدى، تۇراقتى كوميتەتتەگى باسقا جولداستار ەكى جاعىنا ءبولىنىپ تۇردى. باس شۋجي كۇلىمسىرەي كوپشىلىككە ىقىلاسپەن قول بۇلعاپ قۇرمەت ءبىلدىردى.

جارىق شوعىرلاندىرعىش شىراق نۇرىنىڭ استىندا، جۇڭگولىق، شەتەلدىك تىلشىلەردىڭ اپپارات كوزدەرى الدىندا، باس شۋجي شي جينپيڭ ماڭىزدى ءسوز سويلەدى.

بۇل جاڭا جورىقتا ەكپىندەي ىلگەرىلەۋدىڭ اسقاق سەرتى −

”وسىندا، مەن جاڭا كەزەكتى جۇڭگو كوممۋنيستىك پارتياسى ورتالىق كوميتەتىنىڭ باسشىلىق قۇرامىنداعىلار اتىنان، بۇكىل پارتياداعى جولداستاردىڭ سەنىم ارتقاندىعىنا شىن جۇرەكتەن العىس ايتامىن. ءبىز، ءسوز جوق، پارتيانىڭ سيپاتى مەن باس ماقساتىن ەستە بەرىك ساقتاپ، ءوزىمىزدىڭ بورىشىمىز بەن جاۋاپكەرشىلىگىمىزدى ەستە بەرىك ساقتاپ، قىزمەتتىڭ تالابىنان شىعىپ، قىزمەتتى قۇلشىنا ىستەپ، پارتيا مەن حالىقتىڭ ماڭىزدى تاپسىرماسىن، ءسوزسىز، ورىندايمىز“.

ۇلى ءداۋىردىڭ، ءسوز جوق، ءوزىنىڭ تاڭداۋلى تۇلعالارى بولادى؛ ۇلى ءىستىڭ، ءسوز جوق، ەل قۇرمەتىنە بولەنگەن كوسەمى بولادى. بۇل تاريحتىڭ تاڭداۋى، حالىقتىڭ تاڭداۋى، ءداۋىردىڭ تاڭداۋى.

”باس شۋجي شي جينپيڭ ءبىزدىڭ گۋاڭشيدە تولىق داۋىسپەن 20 - قۇرىلتايدىڭ ۋاكىلى بولىپ سايلاندى، بىرنەشە كۇننىڭ الدىندا تاعى ءبىزدىڭ گۋاڭشي ۋاكىلدەر ۇيىرمەسىنىڭ تالقىسىنا كەلىپ قاتىناسىپ، بىزگە وراسان زور شابىت بەردى، بۇگىن باس شۋجي شي جينپيڭ جالعاستى سايلاندى، بۇل ءبىز بارلىق ۋاكىلدەر مەن قالىڭ پارتيا مۇشەلەرىنىڭ ورتاق جۇرەك ءۇنى“، - دەدى 20 - قۇرىلتاي ۋاكىلى، گۋاڭشي ساڭۋ اۋدانى شانپيڭ قىستاعى پارتيا ياچەيكاسىنىڭ شۋجيى جۋ شۋەلان، ”ءبىر نيەتپەن پارتياعا ىلەسسە، حالىقتىڭ بولاشاعى بولادى. نەگىزگى ساتى پارتيا ياچەيكاسىنىڭ شۋجيى بولعان بىزدەر باس شۋجيدىڭ تاپسىرماسىن ەستە بەرىك ساقتاپ، بىلەك سىبانا ۇزدىكسىز قۇلشىنا ىستەپ، اۋىلداستاردىڭ تۇرمىسىن بارعان سايىن جاقسارتۋىمىز كەرەك“.

”ەكىنى تۇراقتاندىرۋدىڭ“ شەشۋشى ءمانى قالىڭ حالىقتىڭ ورتاق تانىمىنا اينالدى، ءسوز جوق، جاڭا جورىقتىڭ ايبىندى جاڭا تاراۋلارىندا شۇعىلا شاشادى.

ۇلى دا جاپالى ءىس قاشاندا توقتاۋسىز كۇرەس جۇرگىزۋ بارىسىندا العا ىلگەرىلەيدى. بۇگىنگى جۇڭگو جاپپاي سوتسياليستىك وسىزاماندانعان مەملەكەت قۇرۋدىڭ، جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدىڭ تاريحي تىڭ باستاماسىندا تۇر.

”جاپالى بولعاندىعى سەبەپتى ۇلى؛ جاپالى بولعاندىعى سەبەپتى اناعۇرلىم داڭقتى“.

وسى ساتتە، باس شۋجي شي جينپيڭنىڭ سوزدەرى ادامداردى ەكپىندەي ىلگەرىلەۋگە ىنتالاندىردى: ”ءبىز قاجىرلىلىقپەن ىستەپ، جاۋاپكەرشىلىك ارقالاپ، ىسكەرلىك كورسەتىپ، اناعۇرلىم كۇشتى تاريحي ىرىقتىلىق رۋحىمەن ماركسيزمنىڭ جۇڭگوشالانۋىن، زامانالانۋىن ىلگەرىلەتىپ، جاڭا داۋىردەگى جۇڭگوشا سوتسياليزمنىڭ تىڭ تاراۋلارىن ۇزدىكسىز جازىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن قۇلشىنا جۇزەگە اسىرامىز“.

بۇل ميللياردتاعان حالىققا بەرگەن ايبىندى ۋادە −

”باسىپ وتكەن جولىمىزدا، ءبىز حالىققا تىعىز سۇيەنىپ، تاريح بەتىندە قالارلىق تالاي - تالاي جاۋاپنامالاردى تاپسىردىق. بولاشاقتى بەتكە العاندا، ءبىز ءالى دە حالىققا سۇيەنىپ جاڭا تاريحي ۇلى ىستەر جاراتۋىمىز كەرەك“.

ەكپىندى سوزدەر ەلەكتر تولقىنى ارقىلى جۇڭگونىڭ بايتاق دالاسىنا تارالىپ، ميللياردتاعان حالىقتىڭ جۇرەگىنە ۇيالادى.

مىنا ءبىر كورىنىستەن ادامدار ەرەكشە جاقىندىق سەزىمگە بولەندى: 10 جىلدىڭ الدىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ سايلانعاندا، شي جينپيڭ تەرەڭ سەزىممەن ”حالىقتىڭ تاماشا تۇرمىسقا دەگەن تالپىنىسى ءبىزدىڭ كۇرەس نىسانامىز“ دەگەن بولاتىن؛ 5 جىلدىڭ الدىندا تاعى دا سايلانعاندا، شي جينپيڭ باتىل تۇردە ”جاپپاي دوڭگەلەك داۋلەتتى قوعام ورناتۋدا بىردە - بىرەۋىن قالدىرۋعا بولمايدى؛ بىرگە بايۋ جولىندا بىردە - بىرەۋىن دە قاتاردان قالدىرۋعا بولمايدى“ دەپ جاريالاعان ەدى.

10 جىل ۋاقىتتا، حالىق تۇرمىسىن جاقسارتۋدىڭ قانشاما شارالارى، بوران - شاشىنعا قاراماي قانشاما رەتكى جول تارتۋ، جاعداي ۇعىسقان قانشاما رەتكى كوڭىل ءبولۋ سانسىز ادامنىڭ ارمانىن نۇرلاندىرىپ، سانسىز ادامنىڭ تاعدىرىن وزگەرتىپ، جاڭا داۋىردەگى ميللياردتاعان حالىقتىڭ تاماشا تۇرمىسىنىڭ تىڭ كارتينالارىن كەسكىندەدى.

نەشە مىڭ شاقىرىم شالعايداعى دالياڭشان تاۋىنىڭ قويناۋى. سىچۋان جاۋجۋە اۋدانى سانحى قىستاعى، سارى داۋالدى، سۇرى كەرپىشتى يزۋ ۇلتى ۇلگىسىندەگى ۇيلەر رەتىمەن قاتارلاسا ورنالاسقان.

2018 - جىلى 2 - ايدا باس شۋجي شي جينپيڭ اۆتوكولىككە وتىرىپ شۇعىل بۇرىلمالى، تەرەڭ شاتقالدى تاۋ اينالما تاس جولىمەن سانحى قىستاعىنا بارىپ، جيحاۋ يوۋگونىڭ الاسا، قاراڭعى، كونەتوز تام ۇيىنە كىردى. باس شۋجيدىڭ شابىتتاندىرۋىمەن كىشكەنتاي يوۋگو باتىلدىقپەن «وتان تۋى قانداي اسەم» ءانىن شىرقادى.

”شي اتايىم ەكەن“! تىكە تاراتۋدى كورىپ، ۇلكەن بويجەتكەن بولىپ ەسەيگەن جيحاۋ يوۋگو اسەرلەنە الاقايلادى. ”ءۇيىمىز كەدەيلىكتەن ارىلىپ، 100 شارشى مەترلىك جاڭا ۇيگە كوشىپ كىردىك. مەن دە تاۋدان قالاعا بارىپ ورتالاۋ مەكتەپكە وقۋعا ءتۇستىم. قازىر تاعى دا كوپتەگەن جاڭا اندەر ۇيرەندىم، اتا مەكەنىمنىڭ وزگەرىستەرىن شي اتايىما ايتىپ بەرسەم دەيمىن“.

”ءبىز باستان - اياق حالىقپەن قيىن - قىستاۋ شاقتاردى بىرگە وتكەرىپ، حالىقپەن تىلەكتەس بولىپ، حالىقتىڭ ويلاعانىن ويلاپ، حالىقتىڭ تاپسىرماسىن ورىنداپ، حالىقتىڭ تاماشا تۇرمىسقا دەگەن تالپىنىسىن ۇزدىكسىز رەالدىققا اينالدىرۋىمىز كەرەك“.

بۇل باس شۋجي شي جينپيڭنىڭ تەرەڭ سەزىمدى داتتەمەسى، ونان دا ماڭىزدىسى، جۇڭگو كوممۋنيستەرىنىڭ قاي - قاشان دا اۋەلگى ماقساتىن ۇمىتپاعان ايبىندى ۋادەسى.

بارلىعىن حالىق ءۇشىن ىستەدى، بارلىعىندا حالىققا سۇيەندى. مەيلى بوران - شاشىن بولسىن، الدە اساۋ تولقىندا بولسىن، حالىق ماڭگى ەڭ بەرىك سۇيەنىشىمىز، ەڭ قۋاتتى كۇشىمىز.

بۇل ءىرى پارتياعا عانا ءتان قيىن ماسەلەلەردى شەشۋدىڭ سەرگەكتىگى مەن تاباندىلىعىنان قاشاندا جازباۋ −

”سان - ساناقسىز وزگەرىستى باستان كەشسە دە، اۋەلگى ماقساتىنان اينىماعان پارتيا عانا، نەگىزى مىعىم بولىپ، مىزعىماي تۇرا الادى؛ شۇعىلالى ناتيجە جاراتسا دا، جۇرەكتىلىكپەن وزىنە - ءوزى توڭكەرىس جاساعان پارتيا عانا، المايتىن قامالى بولمايتىن جەڭىمپاز بولا الادى“.

100 جىلدىق بوران - شاشىندى باستان كەشىرىپ، كىشكەنە قىزىل كەمەدەن ايباتتى الىپ پاراحودقا اينالعان جۇڭگو كوممۋنيستىك پارتياسى وزىنە - ءوزى توڭكەرىس جاساۋ ارقىلى قوعامدىق توڭكەرىسكە جەتەكشىلىك ەتىپ، سان ماشاقاتتى باستان كەشىرسە دە العان بەتتەن قايتپاي، سانسىز حاۋىپ - قاتەرگە كەزدەسسە دە مۇراتىنان اينىماي، جەڭىلمەيتىن، قۇلامايتىن ماركسيزمدىك ساياسي پارتياعا اينالدى.

وسى ساتتە، باس شۋجي شي جينپيڭنىڭ ءسوزى سالماقتى دا سابىرلى بولدى: ”جاڭا جورىقتاعى جاڭا سىن - سايىستار، جاڭا سىناقتار الدىندا، ءبىز، ءسوز جوق، اسا قىراعى بولىپ، ەمتيحان تاپسىراتىن سەرگەكتىك پەن بايسالدىقتى ماڭگى ساقتاپ، پارتيانى جاپپاي قاتاڭ باسقارۋدى قاجىماي - تالماي ىلگەرىلەتىپ، 100 جىلدىق ءىرى پارتيانى وزىنە - ءوزى توڭكەرىس جاساۋ بارىسىندا جالىندى ومىرشەڭدىگىن ۇزدىكسىز تاسقىنداتىپ، باستان - اياق جۇڭگو حالقىنىڭ ەڭ سەنىمدى، ەڭ بەرىك تىرەگىنە اينالدىرۋىمىز كەرەك“.

ءسوز جوق، اۋەلگى ماقساتتى ۇمىتپاي، بورىشتى ەستە بەرىك ساقتاپ، ءسوز جوق، كىشى پەيىل، بايسالدى بولىپ، قاجىرلىلىقپەن كۇرەس جۇرگىزىپ، ءسوز جوق، كۇرەس جۇرگىزۋگە باتىل، كۇرەس جۇرگىزۋگە شەبەر بولۋ كەرەك، ىنتالاندىرعان سوزدەر جاڭا ەمتيحان تاپسىرۋ جولىندا ءتىپتى دە تاماشا جاۋاپناما تاپسىرۋدىڭ سارقىلماس كۇشى بولىپ ۇيىستى.

بۇل الەمدەگى داڭعىل جولدا ساپارلاس بولۋداي جاۋاپكەرشىلىكتى ەستە ۇستاعاندىق −

”جۇڭگو كوممۋنيستىك پارتياسىنىڭ 20 - قۇرىلتايى ماڭىزدى بەلەستىك ءىس“، ”جۇڭگو كوممۋنيستىك پارتياسىنىڭ 20 - قۇرىلتايى جۇڭگونىڭ دامۋىنىڭ تىڭ جورىققا قادام تاستايتىندىعىن ءارى حالىقارالىق ىستەردە اناعۇرلىم زور رول اتقاراتىندىعىن بىلدىرەدى“... بىرنەشە كۇننەن بەرى، شەتەل ساياسي پارتيالارىنىڭ ساياسي قايراتكەرلەرى جابال قۇتتىقتاۋ تەلەگرامماسىن، قۇتتىقتاۋ حاتىن جولدادى، شەتەل مەديالارى ۋادەلەسىپ العانداي، اپپارات كوزدەرى مەن قالام ۇشتارىن جۇڭگوعا شوعىرلاندىردى، جيىنى 900دەي شەتەلدىك ءتىلشى 20 - قۇرىلتايعا تىلشىلىك جاساۋ، حابارلاۋ قىزمەتىنە تىزىمدەلدى.

”بۇل قاپى قالۋعا بولمايتىن ماڭىزدى ءسات“. وسى جەردە جۇڭگو كوممۋنيستىك پارتياسىنىڭ مەملەكەتتىك قۇرىلتايىن حابارلاۋعا ەكىنشى رەت قاتىناسىپ وتىرعان ەفيوپيا اقپارات اگەنتتىگىنىڭ ءتىلشىسى بەرەكەت سەسسي بىلاي دەدى: ”جۇڭگونىڭ دامۋى ادامدى قايران قالدىرادى، مۇنداي دامۋ جان - جاقتى دامۋ، ونىڭ توركىنىن جۇڭگو باسشىسىنىڭ ەرەسەن باسشىلىق قابىلەتى مەن جۇڭگو حالقىنىڭ قاجىرلى قۇلشىنىسىنان بولە قاراۋعا بولمايدى“.

وسى ساتتە، باس شۋجي شي جينپيڭنىڭ ءسوزى مىعىم دا پارمەندى بولدى: ”الەم حالقى داڭعىل جولمەن بىرگە جۇرگەندە عانا، ءار ەل تاتۋ - ءتاتتى ءوتىپ، سەلبەسىپ تەڭ يگىلىككە كەنەلىپ، دۇنيە ءجۇزىنىڭ كوركەم بولاشاعىن قول ۇستاسا جاراتا الادى“، ”ءبىز ءار ەل حالقىمەن بىرگە بەيبىتشىلىك، دامۋ، ادىلدىك، تۋراشىلدىق، دەموكراتيا، ەركىندىك سىندى بۇكىل ادامزاتقا ورتاق قۇندىلىقتى اسقاقتاتىپ، دۇنيە ءجۇزىنىڭ بەيبىتشىلىگىن قورعاپ، دۇنيە ءجۇزىنىڭ دامۋىن جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ۇزدىكسىز ىلگەرىلەتەمىز“.

سان مىڭ شاقىرىم شالعايداعى تەڭىزدىڭ ارعى جاعى.

وتكەن 30 نەشە جىلدان بەرى جۇڭگونىڭ دامۋىن، وزگەرىسىن زەرتتەۋگە ءجىتى كوڭىل ءبولىپ كەلگەن امەريكانىڭ جۇڭگو ماسەلەسى جونىندەگى مامانى روبەرت كۋىن نيۋ - يوركتەگى ۇيىندە وتىرىپ، ينتەرنەت ارقىلى وسى رەتكى كەزدەسۋدى كوردى. ”ءتوراعا شي جينپيڭ بيلىك جۇرگىزگەن وسى 10 جىلدا، جۇڭگونىڭ ساياسي، ەكونوميكالىق جانە قوعامدىق جاعدايىندا كەلەلى وزگەرىستەر تۋىلدى“. كۋىن بىلاي دەدى: جۇڭگو الەمدى باسقارۋدىڭ جاڭا ۇلگىسىن قۇرۋدى ىلگەرىلەتۋگە كۇش سالىپ كەلەدى، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ جۇڭگو ۇلگىسىندەگى وسىزامانداندىرۋ نىسانالارىنىڭ ءبىرى ءارى ول دۇنيە ءجۇزىنىڭ بەيبىتشىلىگى مەن گۇلدەنۋىن جەبەۋگە دە ءتيىمدى.

جەلكەن كوتەرىلىپ، ساپار باستالدى، ءبىز اناعۇرلىم ايبىندى جورىقتا ەكپىندەي ىلگەرىلەۋدەمىز؛ وڭتايلى ساتتە قيمىلداساق، ءبىز، ءسوز جوق، اناعۇرلىم ۇلى جەڭىسكە قول جەتكىزە الامىز.

باس شۋجي شي جينپيڭ بىلاي دەپ ۇندەۋ تاستادى: ”جاڭا جورىق − داڭق پەن ارمانعا تولى ۇزاق جورىق. ۇلى جوبا جاسالدى، دابىل الدەقاشان قاعىلدى. ءبىز اسقاق جىگەرمەن قايراتتانا ۇمتىلىپ، ەرلىكپەن العا ىلگەرىلەپ، اناعۇرلىم شۇعىلالى بولاشاق جاراتۋعا قۇلشىنۋىمىز كەرەك“.

(شينحۋا اگەنتتىگىنىڭ 10 - ايدىڭ 23 - كۇنى بەيجيڭنەن بەرگەن حابارى)