شينحۋا اگەنتتىگىنىڭ 10 - ايدىڭ 23 - كۇنى بەيجيڭنەن بەرگەن حابارى. 10 - ايدىڭ 23 - كۇنى، دۇنيە جۇزىندەگى ساياسي پارتيالاردىڭ ساياسي قايراتكەرلەرى جابال تەلەگرامما جولداپ، حات جولداپ، شي جينپيڭنىڭ جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ باس شۋجيى بولىپ سايلانعاندىعىن قىزۋ قۇتتىقتادى.

رەسەيدىڭ زۇڭتۇڭى پۋتين مىنالاردى ءبىلدىردى: ءسىزدىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ تاعى ءبىر مارتە سايلانعاندىعىڭىز بايلانىسىمەن جولداعان ەڭ قىزۋ ىقىلاستى قۇتتىقتاۋىمدى قابىل العايسىز. جۇڭگو كوممۋنيستىك پارتياسى مەملەكەتتىك 20 - قۇرىلتايىنىڭ تابىسپەن وتكىزىلۋى ءسىزدىڭ اسقاق ساياسي مارتەبەڭىزدى تولىق ايگىلەپ، ءسىزدىڭ باسشىلىعىڭىزداعى جۇڭگو كوممۋنيستىك پارتياسىنىڭ ايرىقشا ىنتىماعىن كورسەتتى. وسى رەتكى قۇرىلتايدا جاسالعان ءتۇرلى قاۋلىلار جۇڭگونىڭ ەكونوميكالىق، قوعامدىق دامۋدىڭ ۇلى نىساناسىن تابىسپەن جۇزەگە اسىرۋىنا دەم بەرىپ، جۇڭگونىڭ حالىقاراداعى ورنىن ۇزدىكسىز جوعارىلاتاتىن بولادى. مەن سىزبەن ۇزدىكسىز سىندارلى كەڭەس وتكىزىپ جانە تىعىز سەلبەسىپ، رەسەي مەن جۇڭگونىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ العا قاراي دامۋىن ىلگەرىلەتۋدى قالايمىن. سىزگە زور دەنساۋلىق، ىستەرىڭىزگە ساتتىلىك، قاسيەتتى قىزمەت ورنىڭىزدا ۇزدىكسىز تىڭ تابىستارعا جەتۋىڭىزدى شىن جۇرەكتەن تىلەيمىن.

وڭتۇستىك افريكا افريكالىقتار حالىقتىق كەڭەسىنىڭ ءتوراعاسى، زۇڭتۇڭ رامافوسا مىنالاردى ءبىلدىردى: ءسىزدىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ تاعى ءبىر مارتە سايلانعاندىعىڭىزدى قۇتتىقتايمىن ءارى ءسىز ارقىلى جۇڭگو كوممۋنيستىك پارتياسى جاڭا كەزەكتى ورتالىق كوميتەتىنىڭ باسشىلىق كوللەكتيۆىنە تاماشا تىلەك جولدايمىن. جۇڭگو كوممۋنيستىك پارتياسىنىڭ 20 - قۇرىلتايى جۇڭگونىڭ پارتياسى مەن مەملەكەتىنىڭ جاڭا جورىعىنا العا باسۋ بەتالىسىن ايقىن كورسەتتى. افريكالىقتار حالىقتىق كەڭەسى ەكى پارتيانىڭ قارىم - قاتىناسىن توتەنشە قاستەرلەيدى، مارتەبەلى ءسىزدىڭ باسشىلىعىڭىزدا، جۇڭگو كوممۋنيستىك پارتياسى مەن افريكالىقتار حالىقتىق كەڭەسىنىڭ قارىم - قاتىناسى بارعان سايىن تەرەڭدەدى، جۇڭگو كوممۋنيستىك پارتياسىنىڭ ءبىزدى قولداپ - قۋاتتاعاندىعىنا جانە جول كورسەتكەندىگىنە العىس ايتامىن. جۇڭگو كوممۋنيستىك پارتياسىنىڭ دۇنيە جۇزىندەگى العاباسار كۇشتەرمەن بىرگە، دۇنيە ءجۇزىنىڭ ادىلدىگى مەن تۋراشىلدىعىن جانە بەيبىتشىلىگىن، دامۋىن جۇزەگە اسىرۋدى ۇزدىكسىز ىلگەرىلەتەتىندىگىنە سەنەمىن.

ارگەنتينا ادىلەت پارتياسىنىڭ ءتوراعاسى، زۇڭتۇڭ فەرناندەز مىنالاردى ءبىلدىردى: باس شۋجي شي جينپيڭ جۇڭگوعا باسشىلىق ەتىپ، كەدەيلىكتى جويۋ، عىلىم - تەحنيكادا جاڭالىق اشۋ، جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ سياقتى جاقتاردا وراسان زور تابىستارعا قول جەتكىزىپ، جۇڭگو حالقىنىڭ تۇرمىس دەڭگەيىن زور دارەجەدە جاقسارتىپ، دۇنيە جۇزىندەگى ەلدەرگە ۇيرەنۋ ۇلگىسىن ورناتىپ بەردى. باس شۋجي شي جينپيڭنىڭ جۇڭگوعا باسشىلىق ەتىپ، دامۋ جانە كوركەيۋ جولىن بويلاپ ۇزدىكسىز جۇرەكتىلىكپەن العا باسىپ، تاعى دا ۇزدىكسىز شۇعىلا شاشىپ، تاعى دا تاماشا ناتيجە جاراتۋىن تىلەيمىن.

وڭتۇستىك سۋدان سۋدان حالىق ازاتتىعى قوزعالىسىنىڭ ءتوراعاسى، زۇڭتۇڭ كير مىنالاردى ءبىلدىردى: جۇڭگو كوممۋنيستىك پارتياسىنىڭ ۇزاق ۋاقىتتان بەرى وڭتۇستىك سۋدان سۋدان حالىق ازاتتىعى قوزعالىسىنا جانە وڭتۇستىك سۋدانعا كورسەتكەن قىمباتتى قولداۋىنا العىس ايتامىن. مەن جانە وڭتۇستىك سۋدان سۋدان حالىق ازاتتىعى قوزعالىسى سىزبەن جانە جۇڭگو كوممۋنيستىك پارتياسىمەن تىعىز سەلبەسىپ، وڭتۇستىك سۋدان مەن جۇڭگو ەكى پارتيانىڭ، ەكى ەلدىڭ دوستىق قارىم - قاتىناسىنىڭ ۇزدىكسىز دامۋىن ىلگەرىلەتىپ، ەكى پارتيانىڭ، ەكى ەلدىڭ جانە ەكى ەل حالقىنىڭ ەڭ زور ۇقىق - مۇددەسىن جۇزەگە اسىرۋعا كۇش سالامىز.

بەلورۋسسيانىڭ زۇڭتۇڭى لۋكاشەنكو مىنالاردى ءبىلدىردى: ءسىزدىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ تاعى ءبىر مارتە سايلانۋىڭىز ءسىزدىڭ اسقاق مارتەبەڭىزدى جانە 96 ميلليوننان استام جۇڭگو كوممۋنيستىك پارتياسى مۇشەلەرىنىڭ ءسىزدى باتىل قولدايتىندىعىن تولىق ايگىلەدى. ءسىز بۇلجىماستان ۇلى جۇڭگونى باستاپ جاپپاي سوتسياليستىك وسىزاماندانعان قۇدىرەتتى ەل قۇرۋ نىساناسىن جۇزەگە اسىرۋعا قادام باستىڭىز، بۇل نىسانانىڭ، ءسوز جوق، جۇزەگە اساتىندىعىنا سەنەمىن.

قازاقستاننىڭ زۇڭتۇڭى توقايەۆ مىنالاردى ءبىلدىردى: جۇڭگو كوممۋنيستىك پارتياسى 20 - قۇرىلتايىنىڭ تولىق تابىستى بولۋى جۇڭحۋا ۇلتىنىڭ ۇلى گۇلدەنۋى جولىندا ماڭىزدى تاريحي مانگە يە. ءسىزدىڭ سايلانۋىڭىز بۇكىل جۇڭگو حالقىنىڭ ءسىزدى ايرىقشا قولداپ - قۋاتتايتىندىعىن دالەلدەدى. مەن سىزبەن بىرگە قۇلشىنىپ، ەكى ەلدىڭ ماڭگىلىك جاپپاي ستراتەگيالىق سەرىكتەستىك قارىم - قاتىناسىن ونان ارى تەرەڭدەتۋدى قالايمىن.

قىرعىزستاننىڭ زۇڭتۇڭى جاپاروۆ مىنالاردى ءبىلدىردى: جۇڭگو كوممۋنيستىك پارتياسىنىڭ 20 - قۇرىلتايىنىڭ سايلاۋ ناتيجەسى جۇڭگو كوممۋنيستىك پارتياسى مەن جۇڭگو حالقىنىڭ سىزگە دەگەن ايرىقشا سەنىمى مەن قولداپ - قۋاتتاۋىن كورسەتتى. سوڭعى جىلدارى، قىرعىزستان مەن جۇڭگو ەكى ەلدىڭ قارىم - قاتىناسى جىلدام دامىدى، قىرعىزستان جاق جۇڭگو جاقپەن ۇزدىكسىز ىشكەرىلەي سەلبەستىك جاساپ، ەكى ەل قارىم - قاتىناسىنىڭ ۇزدىكسىز العا قاراي دامۋىن ىلگەرىلەتۋدى قالايدى.

تۇركمەنستاننىڭ زۇڭتۇڭى سەردار بەردىمۇحامەتوۆ مىنالاردى ءبىلدىردى: جۇڭگو كوممۋنيستىك پارتياسىنىڭ 20 - قۇرىلتايى جۇڭگو حالقىنىڭ ءوز كوسەمىنە بۇكىلدەي سەنىم ارتاتىندىعىن، ءسىزدىڭ دانىشپان باسشىلىعىڭىزداعى جۇڭگو كوممۋنيستىك پارتياسىنىڭ مەملەكەتتىڭ جاپپاي وسىزاماندانۋىن جۇزەگە اسىرۋ، ۇلتتىڭ گۇلدەنۋىن جۇزەگە اسىرۋ جانە حالىقتىڭ قۇت - ىرىسىن مولايتۋ ساياساتتارىن بۇكىلدەي قولدايتىندىعىن تولىق ايگىلەدى. ءبىز جۇڭگو جاقپەن باي مازمۇندى، ايرىقشا ءوزارا سەنىمدى كەڭەستەردى ۇزدىكسىز ورىستەتۋدى قالايمىز.

پاكيستان مۇسىلماندار وداعىنىڭ (شەرىپ توبى) ءتوراعاسى، ۇكىمەت زۇڭليى شاھباز مىنالاردى ءبىلدىردى: باس شۋجي شي جينپيڭنىڭ كەرەمەت باسشىلىعىندا، جۇڭگو ادامزات ىستەرىنىڭ ءار سالاسىندا دۇنيە ءجۇزىن جالت قاراتقان تابىستارعا قول جەتكىزدى. باس شۋجي شي جينپيڭ ءادىل، تۋراشىل، تاتۋ - ءتاتتى الەمدىك باسقارۋ جۇيەسىن قۇرۋدا، سونداي - اق ءار ەلدىڭ شىنايى دوستىق سەلبەستىگى رۋحىن اسقاقتاتۋدا بەلسەندى رول اتقاردى.

ۆەنگريا جاس دەموكراتياشىلار وداعى − ۆەنگريا ازاماتتار وداعىنىڭ ءتوراعاسى، ۇكىمەت زۇڭليى وربان مىنالاردى ءبىلدىردى: ءسىزدىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ سايلانعاندىعىڭىزدى شىنايى قۇتتىقتايمىن. وتكەن 10 جىلدا، جۇڭگونىڭ ەكونوميكاسى، قوعامى تەز دامىدى، ۆەنگريا مەن جۇڭگو ەكى ەلدىڭ قارىم - قاتىناسىندا دا تاماشا جەتىستىكتەرگە قول جەتتى. ۆەنگريا جاق ەكى ەل اراسىندا ورناعان جاپپاي ستراتەگيالىق سەرىكتەستىك قارىم - قاتىناسقا جوعارى باعا بەرەدى، بولاشاقتا جۇڭگو جاقپەن سەلبەستىكتى اناعۇرلىم كۇشەيتۋدى ءۇمىت ەتەدى.

بۇلاردان سىرت، ماۋريتيۋس سوتسياليستىك كۇرەس قوزعالىسىنىڭ ءتوراعاسى لەسجونگارد، برازيليا سوتسيال دەموكراتتار پارتياسىنىڭ ءتوراعاسى اراۋجو، سەررا - لەون حالىق پارتياسىنىڭ باس شۋجيى كوروما قاتارلىلار دا قۇتتىقتاۋ تەلەگرامماسىن، قۇتتىقتاۋ حاتىن جولدادى.