ەرىكتى ٴتىلشى ٴدىلحۇمار حابارلايدى. قازىر كوكتەمگى ەگىس جۇمىسىنىڭ دايىندىق مەزگىلى، وتكەن جىلدارداعىعا ۇقسامايتىنى، ديقاندار بۇرىنعىداي اۋىل شارۋاشىلىق ماتەريالدارى تاراۋلارىنا بارىپ كوپ مولشەردە حيميالىق تىڭايتقىش ساتىپ المادى، قايتا اۋلا تىڭايتقىشىن اتىز باسىنا تاسىدى. «جاسىل كوكتەمگى ەگىس» تەكەس اۋدانىنىڭ كوكونىس ەگىمشىلىگىندەگى جاڭا سالتقا اينالدى. 

 ٴتىلشى 2 - ايدىڭ 21 - كۇنى تەكەس اۋدانى كوكسۋ اۋىلى تىكجول قىستاعىنىڭ تۇرعىنى باي دانداننىڭ ۇيىنە بارعاندا، ونىڭ مال قوراداعى كوڭدى قول اربامەن اتىز باسىنا تاسىپ، كوكتەمگى وندىرىسكە دايىندالىپ جاتقاندىعىن كوردى. 

اۋلا تىڭايتقىشى باي دانداننىڭ كوكتەمگى ەگىس دايىندىعىنىڭ باستى تالعامى بولدى. باي داندان بىلاي دەدى: «اۋلا تىڭايتقىشىنىڭ پايداسى مول، ەگىننىڭ وسۋىنە پايدالى بولىپ قالماستان، ەڭ باستىسى جاسىل، زالالسىز».

باي داندان 50 مۋ ەگىستىك جەرىنە نەگىزىنەن جۇگەرى سياقتى ەكونوميكالىق داقىل ەگەدى، وعان 400 دەن استام قويى مەن 30 دان استام سيىرىن قوسقاندا، جىلدىق كىرىسى 150 مىڭ يۋاننان اسادى.

 ەگىمشىلىك پەن باعىمشىلىقتى ۇشتاستىرۋ ارقىلى باعىمشىلىقتان پايدا بولعان ورگانيكالىق تىڭايتقىش لاستاۋ ماسەلەسىن شەشۋمەن بىرگە، ەگىس ٴوندىرىسىنىڭ وزىندىك قۇنىن تومەندەتىپ، ەكونوميكالىق ونىمدىلىكتى جوعارىلاتادى، مۇنان تىس، ەگىس داقىلدارىنىڭ ٴونىم مولشەرى جوعارىلاپ، استىق، ەگىس قالدىعى، مال، تىڭايتقىش كوپ بولۋ سىندى تاماشا اينالىم قالىپتاسادى. ەگىمشىلىك پەن باعىمشىلىقتى ۇشتاستىرۋ شاراسى باي دانداندى ەكولوگيالىق جاقتان اۋقاتتانۋعا باستادى.

 تاياۋ جىلداردان بەرى تەكەس اۋدانى ەكولوگيالىق وركەنيەت قۇرىلىسىن ٴتۇيىن ەتىپ، بۇقاراعا عىلمي تىڭايتقىش بەرۋدىڭ، توپىراقتى قۇنارلاندىرۋدىڭ ماڭىزدىلىعىن بەلسەنە ۇگىتتەدى، قىستاق تۇرعىندارى اۋلا تىڭايتقىشىن پايدالانۋدا جاڭا تانىم قالىپتاستىردى. قازىر كوپتەگەن ديقاندار اۋلا تىڭايتقىشىن عىلمي پايدالانۋعا ٴمان بەرىپ، شارۋالاردىڭ باعىمشىلىق كاسىبىن دامىتۋىن جەبەدى. 

تەكەس اۋدانى كوكسۋ اۋىلى، قىستاق - قالاشىق جوبا قۇرىلىسى ورتالىعىنىڭ مەڭگەرۋشىسى گو جىنشيڭ بىلاي دەدى: «تاياۋ جىلداردان بەرى كوكسۋ اۋىلى قىزمەتكەرلەردى اتىز باسىنا ىشكەرىلەي بارىپ، ديقانداردىڭ اۋلا تىڭايتقىشىن عىلمي پايدالانۋىنا جەتەكشىلىك ەتۋگە بەلسەنە ۇيىمداستىرىپ، حيميالىق تىڭايتقىشتى، ەگىس دارىلەرىن ىستەتۋدى بىرتىندەپ ازايتىپ، ەكولوگيالىق ورتانى جاقسارتىپ، ەگىس داقىلدارىنىڭ بىرلىك ٴونىمى مەن ساپاسىن جوعارىلاتتى».