بالسوقتا بۇكىل ەل بازارىنا جايعاستى

 اۆتونوميالى وبلىس شاعىن، ۇساق كاسىپورىندار ارقىلى «كوپ بولىپ شارۋاشىلىق قۇرۋ، جالپى جۇرت جاڭالىق اشۋعا» دەم بەردى

سۋرەتتە: بالسوقتا ٴوندىرۋ كاسىپورنىنىڭ قىزمەتكەرى ٴسۇت پىسىرۋدا.

لي يافىڭ فوتوسى 

ٴتىلشىمىز لي يافىڭ حابارلايدى. جاقىنعى جىلداردان بەرى اۆتونوميالى وبلىس جاڭالىق اشۋ ارقىلى دامۋعا دەم بەرۋ ستراتەگياسىن ىشكەرىلەي اتقارىپ، تۇتاس قوعامنىڭ جاڭالىق اشۋ ومىرشەڭدىگى مەن جاسامپازدىق كومەسكى كۇشىن ونان ارى تاسقىنداتىپ، «كوپ بولىپ شارۋاشىلىق قۇرۋ، جالپى جۇرت جاڭالىق اشۋ» سىندى ساياساتتىق ورتا مەن قوعامدىق اۋقىم قالىپتاستىرىپ، جاڭالىق اشۋ مەن شارۋاشىلىق قۇرۋدىڭ ىشكەرىلەي دامۋىن جەدەل ىلگەرىلەتتى.

3 - ايدىڭ 18 - كۇنى 38 جاستاعى قۇلجا قالاسى توپىدەڭ قىستاعىنىڭ تۇرعىنى امەتجان ابدىرەيىم جاڭا زاۆود ۇيىندە جۇمىس قاربالاستىعىنا ٴتۇستى، ول: «بىرنەشە كۇننەن بەرى تاپسىرىس كوبەيە باستادى، جاڭا زاۆودتى ەرتەرەك قۇرىپ، ەرتەرەك وندىرىسكە قوسۋىم كەرەك» دەدى. 

كوپ جىلدىڭ الدىندا امەتجان ابدىرەيىم ٴوزىنىڭ شاعىن اۋلاسىندا قولدان جاسالعان بالسوقتا دۇكەنىن اشقان بولاتىن. ىرگەسىندەگى ساياحات كاسىبىنىڭ دامۋىنا ىلەسە، ول «شىرىنبۇلاق» بالسوقتا ماركاسىن تىركەۋگە الدىرعان ەدى، قازىر ونىڭ ساۋداسى بارعان سايىن جاقسارىپ، جىلدىق ٴونىم قۇنى 2 ميلليون يۋانعا، قىزمەتكەرى 20 نەشەگە جەتتى. امەتجان ابدىرەيىم تەبىرەنە بىلاي دەدى: «شاعىن شەبەرحانام دامىپ، قازىر وبلىسقا توتە قاراستى ورىنداردىڭ سۋىق سۋسىن ونىمدەرىنىڭ %30 بازار ۇلەسىنە يە بولدى،بۇل پارتيا مەن ۇكىمەتتىڭ ٴتۇرلى حالىققا ٴتيىمدى ساياساتىنىڭ ارقاسى، قازىر كاسىپورىنىمىز قارادوڭ اۋىلىنداعى ورتا، شاعىن، ۇساق كاسىپورىندار ونەركاسىپ باقشاسىنا ىرگە تەۋىپ، 800 شارشى مەترلىك ولشەمدەنگەن زاۆود ٴۇيىن سالدىق، كىلەگەيلى ٴسۇت ٴوندىرىس جەلىسىن كوبەيتتىك ٴارى 200 مىڭ يۋان شارۋاشىلىق قۇرۋ قارىز اقشاسىنا ٴوتىنىش بەردىك، جىلدىق ٴونىم قۇنىن 10 ميلليون يۋانعا جەتكىزىپ، 50 دەن استام ادامدى كىرىستى ارتتىرىپ، اۋقاتتانۋعا باستاۋدى جوسپارلاپ وتىرمىز».

«باقشا رايونىمىز 51 جەكەشە ساۋدا - ونەركاسىپشىنى سەرىكتەستىك تۇزىمىندەگى كاسىپورىنعا اينالدىرىپ، كولەمنەن جوعارى 5 كاسىپورىندى جەتىلدىردى». قۇلجا قالاسى قارادوڭ اۋىلى ورتا، شاعىن، ۇساق كاسىپورىندار ونەركاسىپ باقشاسىنىڭ قاتىستى جاۋاپتىسى كايفۇر بىلاي دەدى: «باقشا رايونىندا امەتجان ابدىرەيىم سياقتى شاعىن شەبەرحاناسىن دامىتىپ، كاسىپ سالاسىندا تانىمال شارۋاشىلىق قۇرۋشىعا اينالعاندار بارشىلىق».

قورعاس ەكونوميكالىق اشۋ رايونى قۇلجا باقشا رايونىندا ٴتىلشى شينجياڭ شينزان ازىق - تۇلىك شەكتى سەرىكتەستىگىنىڭ باس ديرەكتورى تاڭ پيڭنىڭ باستاۋىندا بۇكىل ەل بويىنشا بەيزاتتىق مادەني مۇرا ۋاكىلدىك نىسانى اتاعىنا يە بولعان تۇڭعىش بالسوقتانىڭ ٴوندىرىس بارىسىنا كۋا بولدى.

تاڭ پيڭ بىلاي دەدى: «توراپ تانىمالدارى ارقىلى تانىستىرۋ، ەلەكتروندى ساۋدا تەكشەسىندە زات ساتۋ، قوعامدىق قارىم ـ قاتىناس مەديالارىندا كورسەتۋ سياقتى قاتىستى تاسىلدەر ارقىلى بالسوقتا ونىمدەرىن ەندىگارى جاز ماۋسىمىمەن عانا شەكتەلمەيتىن، ادامداردىڭ كۇندەلىكتى تۇتىناتىن <جەڭىل تاعامىنا> اينالدىردىق» دەدى.

تاڭ پيڭ تولىق سەنىممەن بىلاي دەدى: «كاسىپورىنىمىز وتكەن جىلى حاڭجوۋدا بولىمشە سەرىكتەستىك قۇرعان ەدى، بيىل تاپسىرىستىڭ كوبەيۋىنە بايلانىستى، تاعى تىكە ساتۋ دۇكەنىن اشتىق، سونداي - اق شاڭحاي، حاڭجوۋ، چىڭدۋ سياقتى جەرلەردە سۋىق تىزبەكتى ساقتاۋ قامباسىن قۇرىپ، ونىمدەرىمىز بۇكىل ەلدەگى 21 ولكە، قالانى قامتىدى، قازىر سەرىكتەستىگىمىز جياڭسۋ، شانشي سياقتى جەرلەردەگى ەل ىشىندەگى ايگىلى كورىنىس وڭىرلەرىمەن ساتۋ كەلىسىمىن جاساسىپ، ەل ىشىندەگى باسقا قالالاردا تىكە ساتۋ دۇكەندەرىن اشۋدىڭ ۇلگىسىن قالىپتاستىردى، جەلىدە جانە جەلىدەن تىس ساتۋدى سايكەستىرۋ ارقىلى 3 تە 5 جىل ىشىندە بۇكىل ەلدەگى 1 -، 2 - لەنياداعى قالالاردا شينجياڭنىڭ قولمەن جاسالعان بالسوقتا دۇكەندەرىن اشىپ، ٴتىپتى دە كوپ ادامنىڭ قولمەن جاسالعان ىلە ٴدامدى بالسوقتاسىنىڭ ٴدامىن تاتۋىنا مۇمكىندىك جاسايمىز».

قۇلجا قالالىق ساۋدا جانە ونەركاسىپ - ينفورماتسيالاندىرۋ مەكەمەسى ونەركاسىپ ٴبولىمىنىڭ جاۋاپتىسى گو ۋىنبيان مىنانى ٴبىلدىردى: «ٴبىر رايوندا كوپ باقشا بولۋ» سىندى دامۋ ۇلگىسىن قالىپتاستىرۋ ارقىلى ساپالى كاسىپورىنداردى ساتىلى جەتىلدىرۋ، سۇيەمەلدەۋ مەحانيزمىن كەمەلدەندىرىپ، كاسىپورىندارعا كومەك بەرىپ، قيىنشىلىقتان قۇتىلدىرۋ ساياساتىن دايەكتىلەندىرىپ، تياناقتاندىرىپ، ەكونوميكانى جانداندىرىپ، بۇقارانى اۋقاتتاندىرامىز.