ٴتىلشىمىز دۋ لەي حابارلايدى. بيىل وبلىسقا توتە قاراستى اۋدان - قالالاردا ٴبىر ميلليون 157 مىڭ 300 مۋ جەرگە دۇمبە ٴبيداي ەگىلدى، وبلىستىق اۋىل شارۋاشىلىعى، اۋىل - قىستاق مەكەمەسىنىڭ ورنالاستىرۋىنا ساي، 3 - ايدىڭ باسىنان باستاپ وبلىستىق اۋىل شارۋاشىلىق تەحنيكاسىن جالپىلاستىرۋ باس پۋنكتىنىڭ تەحنيكتەرى اۋدان - قالالارعا بارىپ، دۇمبە ٴبيدايدىڭ قايتا كوكتەۋ جاعدايى مەن مايسانىڭ ٴوسۋ جاعدايى جونىندە ناقتى تەكسەرۋ جۇرگىزىپ، اتىز - ارىق تەحنيكاسىنا جەتەكشىلىك ەتۋ قىزمەتىن ورىستەتتى، قازىرگى جاعدايعا تالداۋ جاساعاندا، دۇمبە ٴبيدايدىڭ قايتا كوكتەۋ جاعدايى جالپى جاقتان جاقسى بولعان.

3 - ايدىڭ 17 - كۇنى قۇلجا اۋدانى اروستەڭ قالاشىعى كوزلەك قىستاعىنىڭ دۇمبە ٴبيداي سورتتى تۇقىمىن جەتىلدىرۋ بازاسىندا وبلىستىق اۋىل شارۋاشىلىق تەحنيكاسىن جالپىلاستىرۋ باس پۋنكتىنىڭ تەحنيكتەرى مايسانىڭ ٴوسۋ جاعدايىن تەكسەرىپ، شارۋالارعا ٴادىس - امال ۇيرەتتى.

«بىلتىر تۇقىم ٴسىڭىرۋ ٴبىرشاما جاي باستالعاندىقتان، ٴبىز ٴبيداي مايساسىنىڭ وسۋىنەن الاڭداعان ەدىك، جاقىنعى كۇندەردەگى جاۋىن - شاشىن دۇمبە ٴبيدايدىڭ وسۋىنە ەرەكشە ٴتيىمدى بولىپ، ٴبيداي مايساسى تۇگەلدەي ٴوسىپ شىقتى» دەدى ەگىنشى ايسا شاكىر. 

كوزلەك قىستاعىندا دۇمبە ٴبيداي سورتتى تۇقىمىن جەتىلدىرۋ بازاسىنىڭ ەگىمشىلىك اۋماعى 700 مۋدان اسادى، بىلتىر وبلىستىق اۋىل شارۋاشىلىعى، اۋىل - قىستاق مەكەمەسىنىڭ كوزلەك قىستاعىندا تۇراتىن «ۇعىسۋ، تيىمدىلىك جاساۋ، توعىستىرۋ» قىزمەت اترەتى اۆتونوميالى رايوندىق قازىنانىڭ اۋىل شارۋاشىلىعىن ماشينالاندىرۋدى دامىتۋ ارناۋلى قارجى نىسانىنا قول جەتكىزىپ، دۇمبە ٴبيداي سورتتى تۇقىمىن جەتىلدىرۋدىڭ تۇتاس بارىسىن ماشينالاندىرۋ تەحنيكاسىن جالپىلاستىرۋدان ۇلگى كورسەتىپ، جەر جىرتۋ، جەردى مانالاۋ، تۇقىم سەبۋ، ورۋ سياقتى تۇتاس بارىستى ماشينالاندىرۋ ارقىلى دۇمبە ٴبيدايدان مول ٴونىم الۋعا نەگىز قالادى.

قىزمەت اترەتىنىڭ مۇشەسى، وبلىستىق اۋىل شارۋاشىلىق تەحنيكاسىن جالپىلاستىرۋ باس پۋنكتى ٴوسىرۋ ٴبولىمىنىڭ اعا اگرونومى جاڭ دۇڭمەي تىلشىگە بىلاي دەدى: «تاياۋدان بەرى ٴۇرتىس جاڭبىر جاۋىپ، تەمپەراتۋرا جوعارىلاپ، ەگىستىك جەردىڭ ىلعالدىعىن باسەڭدەتىپ، دۇمبە ٴبيدايدىڭ قايتا كوكتەۋىنە ٴتيىمدى بولدى. دۇمبە ٴبيدايدىڭ سورتتى تۇقىم جەتىلدىرۋ بازاسىنا باعىتتاي وتىرىپ، تاياۋدا ۇشقىشسىز ۇشاق ارقىلى ۇستەمە تىڭايتقىش بەرمەكشىمىز. كەيىنگى مەزگىلدەگى تەسەمەن توپىراعىن قوپسىتۋ، دەرت - دەربەزدەن، زياندى جاندىكتەردەن ساقتانۋ سياقتى جۇمىستاردىڭ بارلىعىن دا تۇگەلدەي وبلىستىق اۋىل شارۋاشىلىق تەحنيكاسىن جالپىلاستىرۋ باس پۋنكتى اتقارادى، قىزمەت اترەتىمىز سورتتى تۇقىم، ماشينا، تەحنيكا سياقتى جاقتاردا قىستاق تۇرعىندارىنىڭ كىرىسىن ارتتىرۋىنا قولداۋ كورسەتەدى».

ايسا شاكىر بىلاي دەدى: «15 مۋ دۇمبە ٴبيداي ەكتىك، قازىرگى ٴوسۋ جاعدايىنان قاراعاندا، 7 - ايدا وراق قويۋدى مەجەلەپ وتىرمىز. قىزمەت اترەتىنىڭ كومەگىندە، ٴبىز ەگىس اتىزدارىن عىلمي جولمەن باپتاپ - باسقاردىق، العاشقى مەجەدە ٴار مۋ جەردەگى ٴبيدايدىڭ ٴونىم مولشەرى 500 كيلوگرامنان اسادى دەپ وتىرمىز، بىلتىرعى باعا جانە شارۋالارعا ٴار مۋ جەرگە بەرىلەتىن 220 يۋان ەگىستىك جەردى قورعاۋ قوسىمشا قاراجاتى بويىنشا ەسەپتەگەندە، ٴار مۋ جەردەن ٴبىر مىڭ 350 يۋان اينالاسىندا كىرىس كىرگىزەمىز، دۇمبە ٴبيدايدى ورىپ بولعاننان كەيىن قايتادان سارى بۇرشاق پەن كوك جۇگەرى ەكسەك، ٴار مۋ جەردەن تاعى 600 دە 700 يۋان كىرىس كىرگىزەمىز».

بيىل وبلىسقا توتە قاراستى ورىنداردىڭ استىق ەگۋ مىندەتى 5 ميلليون 800 مىڭ مۋ، ەرەكشە، جوعارى ٴونىمدى ەگىمشىلىك مىندەتى 2 ميلليون 200 مىڭ مۋ بولىپ، ەرتە باستان ناقتى يگەرۋدى تياناق ەتۋ نەگىزىندە وبلىستىق اۋىل شارۋاشىلىق، اۋىل - قىستاق مەكەمەسى ٴبىر تۇتاس جوسپارلاپ، ٴتۇرلى قىزمەتتەردى بار كۇشپەن ىلگەرىلەتىپ، جاقسى باستاما اشۋعا، جاقسى قادام تاستاۋعا كەپىلدىك ەتتى.

قۇلجا قالاسى جاڭاجەر قالاشىعى ليۋچيدۋان قىستاعىنىڭ تۇرعىنى دۇڭ حايشان ەگىستىك جەرىنىڭ دىمقىلدىعىن تەكسەرىپ كوردى. «150 مۋ جەرىمىزدى بىلتىر 11 - ايدا اۋداردىق، ويتكەنى قىستا قار ٴبىرشاما از جاۋادى، ەگەر جۋىقتان بەرگى بۇلتتى، جاڭبىرلى اۋا رايى بولماسا، ەگىستىك جەردىڭ ىلعالدىعى كوڭىلدەگىدەي بولمايتىندىعى داۋسىز، بيىل جۇگەرى ەگۋ ۋاقىتى بۇرىنعى جىلدارداعىدان كەشەۋىلدەگەنىمەن، ٴونىم الۋعا ىقپال جاسامايدى» دەدى دۇڭ حايشان.

دۇڭ حايشان تىلشىگە بىلاي دەدى: «بيىل 100 مۋ جەرگە دۇمبە ٴبيداي ەكتىك، قازىر تۇگەلدەي قايتا كوكتەدى. كوكتەمگى ەگىس كەزىندە 150 مۋ جەرگە جۇگەرى ەگەمىز، قازىر 10 توننا حيميالىق تىڭايتقىش، 300 كيلوگرام جۇگەرى تۇقىمىن دايىندادىق، اۋا رايى جاقسارسا بولعانى، ەگىستىك جەردىڭ ىلعالدىق جاعدايىنا قاراي تەز ارادا ەگەمىز».

وبلىستىق اۋىل شارۋاشىلىعى، اۋىل - قىستاق مەكەمەسى ەگىنشىلىك جانە اۋىل شارۋاشىلىق دارىلەرى باسقارماسىنىڭ جاۋاپتىسى سۇڭ سايميڭ بىلاي دەدى: «وبلىستىق اۋىل شارۋاشىلىعى، اۋىل - قىستاق مەكەمەسى بيىلعى كوكتەمگى ەگىس ٴوندىرىسى قىزمەتىن الدىن الا جوسپارلاپ، ورنالاستىرىپ، اۋدان، قالالارعا استىق داقىلدارى مەن ەرەكشە داقىلداردى ەگۋ جوسپارىن دەر كەزىندە ٴتۇسىرىپ، مىندەتتى اۋدان، قالالارعا ٴبولدى. اۋىل شارۋاشىلىق ٴوندىرىس قۇرال - جابدىقتارىن زاپاس ساقتاۋ قىزمەتىن بەلسەنە مىقتى يگەردى، قازىرگە دەيىن 318 مىڭ 200 توننا اۋىل شارۋاشىلىق ماتەريالىن زاپاس ساقتادىق، بۇل جوسپارداعى زاپاس مولشەرىنىڭ %104 ىندەي. سونىمەن بىرگە، دۇمبە ٴبيداي اتىزىن باسقارۋ قىزمەتىن مىقتى يگەرىپ، <ىلە وبلىسىنا توتە قاراستى ورىندارداعى دۇمبە ٴبيدايدىڭ قىستان امان ٴوتۋىنىڭ تەحنيكالىق شارالارىن> جاسادىق، سونداي - اق اۋىل - قالاشىقتارعا، ەگىنشىلەرگە دەيىن ۇگىتتەدىك. قازىر وبلىس، اۋدان دارەجەلى اۋىل شارۋاشىلىق تەحنيكاسىن جالپىلاستىرۋ قىزمەتكەرلەرى اتىز باسىندا شارۋالارعا قىزمەت وتەپ جانە جەتەكشىلىك ەتىپ، دۇمبە ٴبيدايدىڭ الدەنۋىنە، ٴونىم مولشەرىنىڭ ورنىقتىلىعىنا كەپىلدىك ەتۋدە».