ەرىكتى تىلشىلەر ۋاڭ شيجۇن، حاۋ يران، فۋ جوۋمين حابارلايدى. 3 - ايدىڭ 17 ـ كۇنى قورعاس اۋدانى 2022 ـ جىلعى ٴبىرىنشى توقسانداعى كەلەلى نىسانداردىڭ جۇمىسىن شوعىرلى قالپىنا كەلتىرۋ، جۇمىس باستاۋ سالتىن وتكىزدى، تۇتاس اۋداندا نىسان قۇرىلىسىنىڭ جاڭا ورلەۋى كوتەرىلدى.

بيىل قورعاس اۋدانى 5 ميلليون يۋاننان جوعارى قارجى قوسىلاتىن 91 ٴتۇيىندى نىسان جوبالاپ، بيىل 7 ميلليارد 168 ميلليون يۋان قارجى قوسۋدى جوسپارلاعان. وسى رەت 34 نىساندا جۇمىستى شوعىرلى قالپىنا كەلتىرىپ جانە جۇمىس باستاپ، بيىل 3 ميلليارد 175 ميلليون يۋان قارجى قوسۋدى جوسپارلاعان، بۇل ونەركاسىپ، قاتىناس، سۋ يگىلىگى، ەنەرگيا، حالىق تۇرمىسى، قالا قۇرىلىسى سياقتى كوپتەگەن سالالارعا سايادى. وسى نىسانداردا جۇمىس باستاۋ، ٴسوز جوق، قورعاس اۋدانىنىڭ جوعارى ساپالى دامۋىنا تىڭ ومىرشەڭدىك كۇش ۇستەپ، جاڭا قوزعاۋشى كۇش توپتايدى.

بيىل قورعاس اۋدانى نىسان قۇرىلىسىن جوعارى ساپامەن جوسپارلاپ، نىسانداردا ەرتە جۇمىس باستاۋدى، ەرتە سالۋدى، ەرتە پايدالانۋعا بەرۋدى بار كۇشپەن ىلگەرىلەتكەن؛ قىزمەت ەتۋدى قامتاماسىزداندىرۋدى بارىنشا كۇشەيتىپ، «مىڭ ادام مىڭ كاسىپورىنعا (نىسانعا) كومەكتەسۋ، قىزمەت ەتۋ ارقىلى دامۋدى جەبەۋ» قيمىلىن تىڭعىلىقتى ورىستەتىپ، «تومەنگە بەرۋ، باسقارۋ، قىزمەت وتەۋ» رەفورماسىن ۇزدىكسىز تەرەڭدەتىپ، كاسىپورىندارعا بار ىنتا ـ پەيىلىمەن قىزمەت وتەگەن؛ زاپاس نىسانداردى بار كۇشپەن ويداعىداي يگەرىپ، «ەكى قورعاس، ەكى قۇلجانى» ٴبىر تۇلعالاندىرىپ دامىتۋ، اۋەجاي قۇرىلىسى سياقتى ماڭىزدى ورايدى مىقتى يگەرىپ، نەگىزدى بەكەمدەيتىن، يقۋاتتى ارتتىراتىن، ۇزاق ۋاقىت پايدالانۋعا بولاتىن كەلەلى نىسانداردى جوعارى ساپامەن جوبالاپ، ەكونوميكانىڭ دامۋىن كۇشەيتكەن.

قورعاس اۋدانى فىڭچۋان قورا - جاي اشۋ شەكتى جاۋاپكەرلىك سەرىكتەستىگىنىڭ باس جوراسى دۇڭ جى - يۇڭ بىلاي تانىستىردى: سەرىكتەستىگىمىز قارجى قوسىپ سالعان قورعاس اسەرى 1762 مادەنيەت ـ ساياحات قالاسى نىسانىنا مەجەمەن 520 ميلليون يۋان قارجى قوسىلادى، قۇرىلىس اۋماعى 100 مىڭ شارشى مەتر بولىپ، قالا مادەنيەت ـ ساياحاتى، ساۋدا جالپىلىق تۇلعاسى ٴتۇيىنى قالىپتاستىرىلادى. سەرىكتەستىك نىساننىڭ اياق الىسىن جەدەلدەتىپ، قۇرىلىس ساپاسىنا كەپىلدىك ەتىپ، ەرتە سالىنۋىن، ەرتە ونىمدىلىك جاراتۋىن قۇلشىنا جۇزەگە اسىرادى.

شينجياڭ حۇيجيا بيو عىلىم ـ تەحنيكا شەكتى سەرىكتەستىگىنىڭ باس ديرەكتورى جوۋ گاڭ بىلاي تانىستىردى: سەرىكتەستىگىمىز تابيعي وسىمدىكتەن الىناتىن زاتتاردى زەرتتەپ اشۋ، ٴوندىرۋ جانە ساتۋمەن شۇعىلداناتىن جوعارى عىلىم ـ تەحنيكالى سىرتقا باعىتتالعان كاسىپورىن. بيىل نىسانعا جالپى 150 ميلليون يۋان قارجى قوسىپ، جىلىنا مىڭ توننا ٴتاتتى جاپىراقتى كۇرەڭكەي ٴوندىرۋ جەلىسىنەن ەكەۋىن، سونداي - اق ولشەمدەنگەن سەح، زاۆود ۇيلەرىن، سايكەستى قۇرىلعىلارىن سالادى. سەرىكتەستىك «زاۆود+ سەلبەستىك كووپەراتيۆى+ شارۋا وتباسىلارى» تيجارات ۇلگىسى ارقىلى اۋىل شارۋاشىلىعىنىڭ ونىمدىلىگىن، شارۋالاردىڭ كىرىسىن ارتتىرۋدى اناعۇرلىم جەبەپ، قورعاس اۋدانىنىڭ ەكونوميكاسىنىڭ جوعارى ساپالى دامۋىنا ۇلەس قوسادى.